ரிலையன்ஸை பின்னுக்கு தள்ளி டாடா மீண்டும் முதலிடம்!

புதுடெல்லி:

இந்தியாவில் உள்ள தொழில் நிறுவனங்களில் முகேஷ் அம்பானியின் ரிலையன்ஸ்
தொழில் நிறுவனம் கடந்த சில ஆண்டுகளாக முதல் இடத்தில் இருந்து வந்தது. சமீப
காலமாக ரிலையன்ஸ் நிறுவன பங்குகளில் ஏற்ற இறக்கம் காணப்பட்டது. இதன்
விளைவாக நம்பர்-ஒன் பணக்கார நிறுவனம் என்ற அந்தஸ்தை ரிலையன்ஸ் நிறுவனம்
இழந்துள்ளது.




இந்திய
தொழில் துறையில் மாபெரும் புரட்சி ஏற்படுத்திய டாடா தொழில் நிறுவனம் நீண்ட
நாட்கள் முதலிடத்தில் இருந்து பிறகு பின் தங்கி இருந்தது. தற்போது டாடா
நிறுவனம் மீண்டும் முதலிடத்தைப் பிடித்துள்ளது. டாடா நிறுவனத்தின் சொத்து,
சந்தை மதிப்புப்படி ரூ.3 லட்சத்து 71 ஆயிரம் கோடியாக உள்ளது. இதன் மூலம்
இந்திய பணக்காரர்களில் ரத்தன் டாடா முதல் இடத்தைப் பிடித்துள்ளார்.



முகேஷ்
அம்பானியின் ரிலையன்ஸ் தொழில் நிறுவனம் ரூ.3 லட்சத்து 21 ஆயிரத்து 750
கோடி சொத்துக்களுடன் 2-வது இடத்தில் உள்ளது. அனில் அகர்வாலின் ஸ்டெர் லைட்
குரூப் ரூ.1 லட்சத்து 35 ஆயிரத்து 300 கோடி சொத்துக்களுடனும், அணில்
அம்பானி நிறுவனம் ரூ.1 லட்சத்து 25 ஆயிரம் கோடி சொத்துக்களுடனும், 3-வது,
4-வது இடங்களில் உள்ளன.



அம்பானி
சகோதரர்கள் இருவரது சொத்துக்களும் சேர்த்தால் ரூ.4 லட்சத்து 47 ஆயிரம்
கோடி வருகிறது. அந்த நிலையில் அவர்கள் இந்தியாவில் அசைக்க முடியாத
நம்பர்-ஒன் பணக்காரர்களாக உள்ளனர். சமீபத்தில் முகேஷ் அம்பானி
குழுமத்துக்கு ரூ.35 ஆயிரம் கோடி இழப்பு ஏற்பட்டது. இதனால் முகேஷ்
நம்பர்-ஒன் பணக்காரர் இடத்தை இழந்தார்.



அதே
சமயத்தில் டாடா நிறுவனத்தின் டாடா மோட்டார்ஸ், டாடா ஸ்டீல்ஸ் போன்ற
பிரிவுகளில் பங்கு சந்தை மதிப்பு அதிக அளவு உயர்ந்தது. இதன் மூலம்
டாடாவின் சொத்து மதிப்பு மளமளவென உயர்ந்து முதலிடத்தை பிடித்துள்ளது.