கொலை மற்றும் பாலியல் குற்றங்கள், வன்முறை அதிகரிப்பு

புதுடில்லி:


டில்லியில், போலீசாரின் எண்ணிக்கை அதிகரிக்கப்பட்ட
போதிலும், அங்கு கொலை மற்றும் பாலியல் வன்முறைகள் அதிகரித்து வருவது தெரிய
வந்துள்ளது. டில்லியில், போலீசாரின் எண்ணிக்கை அதிகரிக்கப்பட்டுள்ளது.
2007ம் ஆண்டு முதல் 22 ஆயிரம் பேர் பணியில் சேர்க்கப்பட்டுள்ளனர். ஆனால்,
அங்கு கொலை மற்றும் பாலியல் வன்முறை குற்றங்கள் ஆண்டுதோறும் அதிகரித்து
வருகின்றன. கடந்த மூன்று ஆண்டுகளில், இந்த குற்றங்கள் அதிக அளவில்
பதிவாகியிருப்பதாக, அதிகாரப்பூர்வமான புள்ளி விவரங்கள் தெரிவிக்கின்றன.
இந்த ஆண்டில், முதல் ஆறு மாதங்களில் மட்டும் 274 கொலை வழக்குகள்
பதிவாகியுள்ளன. 2009ம் ஆண்டு இதே காலகட்டத்தில் 254 வழக்குகளும், 2008ம்
ஆண்டு 259 வழக்குகளும் பதிவாகின. 2007ம் ஆண்டு 215 வழக்குகள் பதிவாகின.
இந்த ஆண்டில், முதல் ஆறு மாதங்களில் 277 கற்பழிப்பு வழக்குகளும், 2009ல்
237 வழக்குகளும், 2008ல் 258 வழக்குகளும் பதிவாகியுள்ளன. 2007ம் ஆண்டில்
297 கற்பழிப்பு வழக்குகள் பதிவாகியுள்ளன. இதே போன்று 2010, 2009, 2008,
2007ம் ஆண்டுகளில் முறையே 318, 258, 262, 264 வழிப்பறி மற்றும் கொள்ளை
வழக்குகள் பதிவாகியுள்ளன. டில்லி போலீசில் 80 ஆயிரம் போலீசார் உள்ளனர்.
கடந்த 2007ம் ஆண்டு முதல் மூன்று ஆண்டுகளில் 22,160 பேர் போலீசில்
சேர்க்கப்பட்டுள்ளனர். எனினும், அங்கு, குற்றச்செயல்கள் நாளுக்கு நாள்
அதிகரித்து வருகின்றன. போலீஸ் உயர் அதிகாரிகள் கூறியதாவது: டில்லியில்,
கடந்த 40 ஆண்டுகளாக குற்றச் செயல்களின் எண்ணிக்கை விகிதம் மிகவும் குறைந்த
அளவிலேயே உள்ளது. மக்கள் தொகை அடிப்படையில், ஒரு லட்சம் பேருக்கு வைத்து
கணக்கிடும் போது, குற்ற எண்ணிக்கை விகிதம் இந்த ஆண்டு 281.05 ஆக உள்ளது.
இந்த அளவுகோல், உலகம் முழுவதும் பின்பற்றப்படும் முறையாகும். 2009ம்
ஆண்டில், இந்த விகிதம் 283.50 ஆகவும், 2008ம் ஆண்டில் 286.32 ஆகவும்
இருந்தது. இதிலிருந்து ஆண்டுதோறும் குற்றங்களின் விகிதம் குறைந்து வருவது
தெரியும். இந்த ஆண்டு 28 ஆயிரத்து 270 குற்ற வழக்குகள் பதிவு
செய்யப்படுள்ளன. இதில், மோட்டார் சைக்கிள் திருட்டு மற்றும் சிறு சிறு
குற்றங்களையும் சேர்த்து 3,317 ஆக உயர்ந்துள்ளன. மேலும், இந்த ஆண்டில்,
பல்வேறு கொலை வழக்குகளில் தொடர்புடைய 483 பேர் கைது செய்யப்பட்டுள்ளனர்.
இதில், 93 சதவீதம் பேர் முதன்முதலாக இத்தகைய குற்றங்களில் ஈடுபட்டவர்கள்
ஆவர். இவ்வாறு அவர்கள் கூறினர்.