தனியார் நிறுவனங்களின் ஒத்துழைப்பின்மையால் "இ-கவர்னன்ஸ்' செயல்படுத்துவதில் சிக்கல்

புதுடில்லி:


நாடு முழுவதும் மின் ஆளுமை (இ-கவர்னன்ஸ்) திட்டத்தைச்
செயல்படுத்த, மத்திய அரசு தீவிர முயற்சி மேற்கொண்டுள்ளது. தனியார்
நிறுவனங்களின் ஒத்துழைப்பு இல்லாமை போன்ற காரணங்களால், இத்திட்டம் இலக்கை
எட்ட முடியாமல் தடுமாறி வருகிறது. நாடு முழுவதும் உள்ள மக்கள், தங்களுக்கு
தேவையான சேவைகளை மிகவும் எளிமையான முறையில் பெறுவதற்கு வசதியாக மின் ஆளுமை
திட்டத்தைச் செயல்படுத்த, மத்திய தகவல் தொழில்நுட்பத் துறை திட்டமிட்டது.
நாடு முழுவதும் உள்ள அனைத்து ஊராட்சிகளிலும் இத்திட்டத்தை
நடைமுறைப்படுத்துவதற்கான முயற்சிகள் மேற்கொள்ளப்பட்டன. இதற்காக, வரும்
2012க்குள் நாடு முழுவதும் 2.50 லட்சம் பொதுச் சேவை மையங்களை
(சி.எஸ்.சி.,) அமைக்க திட்டமிடப்பட்டது. கல்வி, சுகாதாரம், டெலிமெடிசின்,
பொழுதுபோக்கு போன்றவற்றை மக்களுக்கு அளிக்கும் நோக்கத்துடன் இந்த மையங்களை
அமைக்க முடிவு செய்யப்பட்டது. இதன்படி, கடந்த 2008 மார்ச்சுக்குள் ஒரு
லட்சம் சேவை மையங்கள் அமைக்கப்பட்டிருக்க வேண்டும். ஆனால், இதுவரை 81
ஆயிரத்து 25 மையங்கள் தான் அமைக்கப்பட்டுள்ளன. அனைத்து பொதுச் சேவை
மையங்களுக்கான பணிகளும் 2010 செப்டம்பருக்குள் முடிவடைந்திருக்க வேண்டும்
என்று இலக்கு நிர்ணயிக்கப்பட்டுள்ளதால், அதற்கு பலன் கிடைக்காமல்
போய்விடும் நிலை உள்ளது. தனியார் நிறுவனங்களின் ஒத்துழைப்பு இல்லாதது
போன்ற காரணங்களால் தான், இந்த பணிகள் தாமதமாகி வருவதாகக் கூறப்படுகிறது.
இதுகுறித்து, "3 ஐ இன்போடெக்' என்ற தகவல் தொழில்நுட்ப நிறுவனத்தின்
உயரதிகாரி அமர் சிந்தோபந்த் கூறுகையில், "12 ஆயிரத்து 500 சேவை மையங்களை
அமைக்க ஏலம் எடுத்திருந்தோம். ஆனால், 6,500 மையங்களைத் தான் அமைக்க
முடிந்தது. இதற்கு முக்கிய காரணம், இத்திட்டத்துக்கான புள்ளி விவரங்களைப்
பெறுவதில் ஏற்பட்ட கால தாமதம்; மேலும், நிதிப் பிரச்னையும் முக்கிய
காரணம்' என்றார். இது போன்ற காரணங்களுக்காக சில தனியார் நிறுவனங்கள்,
இத்திட்டத்தில் இருந்து வெளியேறியுள்ளன. இதுகுறித்து தகவல் தொழில்நுட்பத்
துறைச் செயலர் சந்திரசேகர் கூறியதாவது: பொதுச் சேவை மையங்களுக்கான டெண்டர்
கோருவதில் பிரச்னை உள்ளது. சில நேரங்களில் டெண்டர் பெறுவதற்கு ஆள் இல்லாத
சூழ்நிலையும் ஏற்பட்டது. இதனால், இரண்டாவது ரவுண்டு, மூன்றாவது ரவுண்டு
என, டெண்டர் விவகாரம் தாமதமானது. பொதுச் சேவை மையங்கள் அமைப்பது என்பது,
மின்சாரம், தொடர்பு உள்ளிட்ட மற்ற வசதிகளையும் சார்ந்துள்ளது. இதுவும்
திட்டம் தாமதமாவதற்கு முக்கிய காரணம். நிதிப் பிரச்னை இதற்கு பெரிய அளவில்
காரணம் இல்லை. இத்திட்டத்தை படிப்படியாக நிறைவேற்றுவதற்காக சட்டம் கொண்டு
வருவதற்கும் பரிந்துரை செய்துள்ளோம். இவ்வாறு சந்திரசேகர் கூறினார். கடந்த
ஜூன் மாதம் வரை, புதுச்சேரி, அரியானா, குஜராத், டில்லி, சண்டிகார், கோவா,
ஜார்க்கண்ட் உள்ளிட்ட மாநிலங்களில் மட்டுமே, இத்திட்டம் முழுமையாக
நிறைவேற்றப்பட்டுள்ளது. மகாராஷ்டிரா, ஆந்திரா, உ.பி., போன்ற பெரிய
மாநிலங்களில் இத்திட்டம், 50 சதவீதம் அளவுக்கே நிறைவேற்றப்பட்டுள்ளது.