சபரிமலை நடை 25ம் தேதி அடைப்பு

சபரிமலை:

ஆவணி மாத மற்றும் ஓணம் பண்டிகை பூஜைகளுக்காக சபரிமலை நடை நேற்று
மாலை திறக்கப்பட்டது. புதிய தந்திரியாக கண்டரரு ராஜீவரரு பொறுப்பேற்று
கொண்டார். 10 தினங்கள் தொடர்ந்து திறந்திருக்கும் நடை வரும் 25ம் தேதி
இரவு அடைக்கப்படும். ஒவ்வொரு மாத பூஜைகளுக்காகவும், பண்டிகைகள், முக்கிய
தினங்களில் சபரிமலை நடை திறக்கப்படுவது வழக்கம். அதேபோல், ஆவணி மாத பூஜை
மற்றும் ஓணம் பண்டிகைக்காக சபரிமலை நடை, நேற்று மாலை 5.30 மணிக்கு
திறக்கப்பட்டது. கோவில் மேல்சாந்தி விஷ்ணு நம்பூதிரி நடையை திறந்தார்.
நேற்று மாலை சிறப்பு பூஜைகள் ஏதும் நடைபெறவில்லை. இதுவரை தந்திரியாக
பணியாற்றி வந்த கண்டரரு மகேஸ்வரரு பணிக்காலம் முடிவடைந்து விட்டது. புதிய
தந்திரியாக நியமிக்கப்பட்டுள்ள கண்டரரு ராஜீவரரு இன்று அதிகாலை 5.30
மணிக்கு அஷ்ட திரவிய மகா கணபதி ஹோமம் நடத்தி முறைப்படி தந்திரி
பொறுப்புக்களை ஏற்று கொள்வார். இன்று காலை 7 மணிக்கு தந்திரியின்
முன்னிலையில் பிரம்ம கலச பூஜையும், அதனை தொடர்ந்து லட்சார்ச்சனையும்
நடைபெறும். இந்நிகழ்ச்சியில் 25 பிராமணர்கள் கலசத்தை சுற்றிலும் அமர்ந்து
ஹரிஹரபுத்திர சகஸ்ரநாம அர்ச்சனை நடத்துவர். உச்சிக்கால பூஜைக்கு முன்பாக 1
லட்சம் மந்திரங்கள் உச்சரிக்கப்பட்டு கலசத்தின் நீர் மூலவருக்கு அபிஷேகம்
செய்விக்கப்படும். அதனை தொடர்ந்து அய்யப்பனுக்கு சந்தன அபிஷேகம்
செய்விக்கப்படும். சபரிமலையில் 5 தினங்களுக்கு சகஸ்ரகலசாபிஷேகம்
நடைபெறும். வரும் 20ம் தேதி முதல் (22ம் தேதி தவிர) 25ம் தேதி வரை சகஸ்ர
கலசாபிஷேகம் நடக்கும். நடை திறந்திருக்கும் அனைத்து நாட்களிலும் உதயாஸ்தமன
பூஜையும் படி பூஜையும் நடைபெறும். வரும் 21ம் தேதி முதல் 25ம் தேதி வரை
அய்யப்ப பக்தர்களுக்காக ஓணம் சத்தியா (விருந்து) நடைபெறும். இதில் வரும்
22ம் தேதி மேல்சாந்தி ஜி.விஷ்ணு நம்பூதிரி சார்பில் உத்ராட விருந்தும்,
23ம் தேதி டாக்டர் மணிகண்டன் சார்பில் திருவோண விருந்தும், 24ம் தேதி
குவைத் நாட்டை சேர்ந்த பக்தர் கிருஷ்ணன் சார்பில் அவிட்டம் விருந்தும்,
25ம் தேதி சதய விருந்தும் நடைபெறும். பொதுவாக, மண்டல மகர விளக்கு சீசன்
நாட்களுக்கு அடுத்து ஓணம் பண்டிகை நாளில் தான் அதிக பக்தர்கள் சபரிமலையில்
கூடுவது வழக்கம். அதனால் திருவிதாங்கூர் தேவஸ்வம் போர்டு சார்பில்
பக்தர்களுக்கு தேவையான அனைத்து வசதிகளும் செய்யப்பட்டுள்ளது. மாத பூஜை
மற்றும் ஓணம் பூஜை ஆகியவை முடிந்து, வரும் 25ம் தேதி இரவு 10 மணிக்கு
ஹரிவராசனம் பாடல் பாடி நடை அடைக்கப்படும்.