வெளிநாட்டு வேலை வாங்கித் தருவதாக ரூ.4 லட்சம், 15 சவரன் நகை மோசடி

சேலம்:

சேலத்தில், நில புரோக்கர் மகன்களுக்கு வெளிநாட்டில் வேலை வாங்கித் தருவதாக
கூறி, நான்கு லட்ச ரூபாய் மற்றும் 15 சவரன் நகை மோசடி செய்த தம்பதியரை,
குற்றப்பிரிவு போலீசார் தேடி வருகின்றனர். சேலம், அழகாபுரத்தை
சேர்ந்த நில புரோக்கர் பழனி - செல்லம்மாள் தம்பதியருக்கு, பட்டப்படிப்பு
படித்த இரு மகன்கள் உள்ளனர். நான்கு மாதத்திற்கு முன், கேரளாவை சேர்ந்த
ராம்குமார் - கவுரி ரீனா தம்பதியர், ஐந்து குழந்தைகளுடன், இவர்கள்
வீட்டருகே குடி வந்தனர். கணவர் ராம்குமார் துபாயில் வேலை செய்வதாகவும்,
விடுமுறைக்கு வந்துள்ள அவருடன், சேலத்தில் குடியேறியுள்ளதாக
செல்லம்மாளிடம் கவுரி ரீனா தெரிவித்துள்ளார். இரண்டு குடும்பத்தினரும்
நெருங்கி பழகி வந்த நிலையில், மகன்கள் இருவருக்கும் துபாயில் வேலை
வாங்கித் தரும்படி, செல்லம்மாள் கேட்டார். அதற்கு ராம்குமார்,
"பாஸ்போர்ட், விசா மற்றும் நிறுவனத்தில் சேர்வதற்கான ஆவணங்கள் தயாரிக்க,
நான்கு லட்ச ரூபாய் வரை செலவாகும்' என தெரிவித்தார்.இதை நம்பி நில
புரோக்கர் பழனி, நான்கு லட்சம் ரூபாயை ராம்குமாரிடம் கொடுத்தார்.
செல்லம்மாள் கழுத்தில் போட்டிருந்த 15 சவரன் தங்க நகை போல, தனக்கும் செய்ய
வேண்டும். மாடலுக்காக அந்நகையை கொடுத்து உதவும்படி, கவுரி ரீனா
கேட்டுள்ளார். செல்லம்மாளும் கழுத்தில் இருந்த நகையை கடந்த மாதம் கழட்டி
கொடுத்துள்ளார். பணம், நகை வாங்கிய சில நாட்களில், பெங்களூரில்
இருந்து விமானம் மூலம் கணவர் ராம்குமாரை அனுப்பி விட்டு வருவதாகக் கூறி,
பெட்டி படுக்கையுடன் கவுரி ரீனா குடும்பத்துடன் கிளம்பிச் சென்றார். ஒரு
மாதம் ஆகியும் வீடு திரும்பாத நிலையில், ஏமாற்றப்பட்டதை அறிந்து,
பழனியும், அவரது மனைவி செல்லம்மாளும், சேலம் மத்திய குற்றப்பிரிவு
போலீசில் புகார் செய்தனர். விசாரணையில், ராம்குமார் - கவுரி ரீனா
தம்பதியர், போலி முகவரி கொடுத்து, மோசடியில் ஈடுபட்டது தெரிந்து, அவர்களை
மத்திய குற்றப்பிரிவு போலீசார் தேடுகின்றனர்.