இலவச "டிவி'யை விற்று உயிர் வாழும் மூதாட்டி ;விரட்டும் உறவினர்

ராமநாதபுரம்:

ராமநாதபுரம் மாவட்டம் கமுதி அருகே உடப்பன் குளத்தில்
கணவர் மறைவுக்கு பின், சொத்து கேட்டு உறவினர் விரட்டுவதால், இலவச "டிவி'யை
விற்று உயிர் வாழும் நிலைக்கு மூதாட்டி தள்ளப்பட்டார். உடப்பன் குளத்தை
சேர்ந்தவர் தாயம்மாள் (65). இவரது கணவர் சின்னபாலு கடந்த ஆண்டு இறந்தார்.
குழந்தைகள் இல்லாத நிலையில், இவர்களுக்கு சொந்தமாக நிலம் மற்றும் வீடு
உள்ளது. கணவர் மறைவுக்கு பின் தாயம்மாள் மட்டுமே இவற்றை கண்காணித்து வந்த
நிலையில், கணவரின் அண்ணன் மகன் செல்வம், சித்தப்பா சொத்து தனக்கு தான்
சொந்தம் எனக் கூறி, தாயம்மாள் வசித்து வந்த வீட்டுக்கு பூட்டு போட்டார்.
நிலங்களை கைப்பற்றும் முயற்சியிலும் இறங்கினார். தான் இருப்பதால்
சொத்துகளை அபகரிப்பதில் செல்வத்துக்கு சிக்கல் இருப்பதை உணர்ந்த
தாயம்மாள், தனது உயிரை காப்பாற்றும் நோக்கில் அங்கிருந்து வெளியேறினார்.
முன்னதாக செல்வத்தின் மிரட்டல் வரத் தொடங்கிய நேரத்தில், பக்கத்து
வீட்டில் கொடுத்து வைத்திருந்த தனக்கு வழங்கிய இலவச "டிவி'யை விற்று,
அங்கிருந்து வெளியூரில் இருக்கும் தனது உறவினர் வீடுகளுக்கு சென்றார்.
இதற்கிடையில், தாயம்மாளை செல்வம் தேடி வருவதாக தகவல் கிடைத்தது. இதை
அறிந்து கீழக்கரையில் உள்ள தனது உறவினர் வீட்டுக்கு சென்ற தாயம்மாளுக்கு,
உடல் நிலை பாதிக்கப்பட்டது. ராமநாதபுரம் அரசு மருத்துவனையில் உள்நோயாளியாக
சிகிச்சை பெற்று வந்த நிலையில், உணவுக்காக இலவச "டிவி'யை விற்ற பணத்தை
செலவழித்து வந்தார். அந்த பணமும் தீர்ந்து போக, தன்னை தேடி வரும்
செல்வத்தால், தனது உயிருக்கும் பாதுகாப்பில்லை என, நேற்று ராமநாதபுரத்தில்
கலெக்டர் அலுவலக அதிகாரிகளிடம் புகார் செய்தார். தாயம்மாள் கூறியதாவது:
எனக்கு குழந்தைகள் இல்லாததால், என் கணவர் இறந்ததும், சொத்தை அபகரிக்க
முயற்சிக்கின்றனர். இலவச "டிவி'யை விற்ற 1,000 ரூபாயில் கிடைத்ததை வாங்கி
சாப்பிட்டு உயிர் வாழ்ந்து வருகிறேன். பணம் காலியாக போகிறது. எனக்கான கொலை
மிரட்டலும் நெருங்கி வருகிறது. வேறு வழியின்றி முறையிட வந்தேன். இவ்வாறு
தாயம்மாள் கூறினார்.