இளம்பெண் படுகொலை: பாதுகாப்பாற்ற நிலையில் அரசு பள்ளிக்கூடம் இரவு நேரத்தில் சமூக விரோதிகள் அட்டூழியம்

சென்னை,

சைதாப்பேட்டை அரசு பள்ளி வளாகத்தில் இளம்பெண் ஒருவர் கொலை செய்யப்பட்டு பிணமாக கிடந்தார். இரவு
நேரத்தில் சமூக விரோதிகள் எளிதில் புகுந்து விடுவதால் பள்ளி வளாகத்தில்
சமூக விரோத செயல்கள் சர்வ சாதாரணமாக நடப்பதாக ஆசிரியர்கள் புகார்
கூறுகிறார்கள்.

இந்த
பள்ளிக்குள் செல்ல 3 வாசல்கள் உள்ளன. இரவு நேரத்தில் இந்த வாசல்களை மூடி
விடுவார்கள். பள்ளிக்கு பின் பகுதியில் பெரிய விளையாட்டு மைதானம் உள்ளது.
இந்த மைதானத்தை ஒட்டியுள்ள காம்பவுண்டு சுவரில் மிகப்பெரிய துவாரம்
உள்ளது. மேலும் ஒரு கார் உள்ளே வரும் அளவுக்கு காம்பவுண்டு சுவர்
இடிக்கப்பட்டுள்ளது.

இதன்
வழியாக சமூக விரோதிகள் இரவு நேரத்தில் உள்ளே சென்று பெண்களுடன் உல்லாசமாக
இருப்பது, மது அருந்துவது போன்ற சம்பவங்களில் ஈடுபடுவது வாடிக்கையாக
உள்ளது.

பள்ளி வளாகம் முழுக்க காலி மது பாட்டில்கள், தண்ணீர் பாட்டில்கள் சிதறி கிடக்கின்றன.

பஸ்
நிலையத்தில் பஸ்சுக்கு காத்திருப்பவர்களும் அவசரம் என்றால் அந்த துவாரம்
வழியாக உள்ளே சென்று இயற்கை உபாதைகளை தணித்து கொள்வார்கள்.

பள்ளி நிர்வாகம் சார்பில் பலமுறை அந்த துவாரத்தை அடைத்துள்ளார்கள். அதை இரவோடு இரவாக இடித்து விடுகிறார்கள்.

இந்த
பகுதியைச் சேர்ந்த பெண் ஒருவர் நீண்ட நாட்களாக கஞ்சா விற்று வருகிறார்.
இவரது தொழில் நண்பர்கள் பள்ளி வளாகத்தில் வைத்து கஞ்சா பொட்டலங்களையும்
விற்பனை செய்கிறார்கள்.

மேலும் கழிவறை கதவுகள், பல்புகள், மின் வயர்கள் ஆகியவற்றை இரவு நேரத்தில் சமூக விரோதிகள் சேதப்படுத்தி விடுகிறார்கள்.

கடந்த
ஒரே மாதத்தில் 6 முறை பள்ளியில் கதவு, வயர், நாற்காலிகள் திருட்டு போய்
உள்ளது. இதுகுறித்து சைதாப்பேட்டை போலீசில் பல முறை புகார்
செய்யப்பட்டுள்ளது. ஆனால் இது வரை யாரும் கைது செய்யப்பட்டதில்லை.

இங்கு
பணிபுரியும் ஊழியர்கள் கூறும்போது, பணி முடிந்து மாலையில் சென்று
விடுகிறோம். இரவில் இங்கு என்ன நடந்தாலும் கேட்க ஆளில்லை. மறுநாள் நாங்கள்
வரும்போது சேர் இருந்தால்தான் உண்டு. இல்லையென்றால் நாங்கள் தரையில்தான்
அமர வேண்டும் என்றனர்.

இந்த
பள்ளியில் மாணவர்களும், மாணவிகளும் சேர்ந்து படிக்கிறார்கள். பள்ளி
வளாகத்தில் கிடக்கும் மதுபாட்டில்கள், ஆணுறைகளை பார்த்து முகம்
சுளிக்கிறார்கள்.

இந்த பள்ளியை சீரமைத்து பாதுகாப்பான இடமாக மாற்றி தர வேண்டும் என்று ஆசிரியர்களும், மாணவர்களும் குமுறுகிறார்கள்.