பசிக்காதவனுக்கு படையல் சாதம்

கோவை. மு. சரளா · கோவை. மு. சரளா Tue Aug 24, 2010 4:13 pm

அமைதியின்
ஆக்கிரமிப்பில்
அடைபட்டு கிடந்தது
அந்த அறை

தங்களை மதிப்பிடும்
கேள்விகனைகளை
எதிர்நோக்கி
தியானத்தில் அனைவரும்

கற்று தெளிந்த அனைத்தும்
காற்றில் கற்பூரமாய்
கரைந்தது போல இருந்தாலும்
மனம் மட்டும் ஏனோ
கனத்து இருந்தது

கேள்விகளை கண்களால்
துலாவிய நொடி
தெரிந்தவைகள் கூட
மறந்துபோக தயாராகி கொண்டிருக்க

அவசரமாக குறிபெடுத்து கொண்டது கைகள்
வினா தாளிலும் விடை தாளிலும்
தெரிந்ததை எழுத
வேகம் அதிகரித்தது விரல்கள்

விறு விறு வென எழுதினாலும்
விரைவாக எழுத முடியவில்லை
இடையில் விழுந்த சந்தேகத்தை
தீர்க்க ஆழ்ந்து யோசித்ததில்
ஆழமான நித்திரைக்கு
அழைப்பு வந்தது

அவசரமாக மறுத்து
அரை நித்திரையில்
விடைகளை எழுதி
விடைபெற்று வெளியே வந்த பின்

கேள்விக்கான பதில்கள்
கேட்காமலே வருகிறது
பசிக்காதவனுக்கு
படையல் சாதம் தருவது போல