இன்று திருச்சியில் ஜெ. தலைமையில் ஆர்ப்பாட்டம்

திருச்சியில் இன்று நடைபெறும் பிரமாண்டமான கண்டன ஆர்ப்பாட்டத்தில் அதிமுக பொதுச் செயலாளர் ஜெயலலிதா பங்கேற்கிறார். கோவையில் கிளப்பிய புயலைத் தொடர்ந்து நடக்கும் ஆர்ப்பாட்டம் என்பதால் அவர் என்ன சொல்லப் போகிறார் என்ற எதிர்பார்ப்பு ஏகமாக உள்ளது.

விலைவாசி உயர்வு, விவசாயிகள், மீனவர் பிரச்னையை தீர்க்க நடவடிக்கை எடுக்காத தி.மு.க., அரசை கண்டித்தும், மணல் கொள்ளையால் நீராதாரம் பாதிக்கப்படுவதை கண்டித்தும், அ.தி.மு.க., சார்பில், திருச்சி, பொன்மலை ஜி கார்னர் ரயில்வே மைதானத்தில் இன்று கண்டன ஆர்ப்பாட்டம் நடக்கிறது.

ஜெயலலிதா இதற்குத் தலைமை தாங்குகிறார். குட்டி மாநாடு போல ஆர்ப்பாட்டங்களை மாற்றி புதிய சாதனை படைத்துள்ள அதிமுகவினர், இந்த ஆர்ப்பாட்டத்தையும் பிரமாண்டமான கூட்டத்தைக் கூட்டி திமுகவுக்கு அதிர்ச்சி வைத்தியம் அளிக்கத் திட்டமிட்டுள்ளனர்.

இதற்காக தமிழகத்தின் பல பகுதிகளிலிருந்தும் வேன்கள், பஸ்கள், கார்களில் அதிமுகவினர் திருச்சியை நோக்கி திரண்டு வந்து கொண்டிருக்கின்றனர். நேற்று இரவே இந்த பயணம் தொடங்கி விட்டது. நெல்லை, குமரி உள்ளிட்ட தென்கோடி மாவட்டங்களிலிருந்தும் அதிமுகவினர் வந்து கொண்டிருக்கின்றனர்.

இன்று மாலை தனி விமானம் மூலம் திருச்சி விமான நிலையம் வரும் ஜெயலலிதா, அங்கிருந்து கார் மூலம் பொதுக்கூட்ட மேடையை சென்றடைகிறார்.மாலை 4 மணிக்கு தலைமை உரையாற்றுகிறார். அதற்காக, ஜி கார்னர் மைதானத்தில் பிரம்மாண்ட மேடை அமைக்கப்பட்டுள்ளது.

ஆர்ப்பாட்டத்தை முடித்த கையோடு, மீண்டும் 6.30 மணிக்கு தனி விமானம் மூலம் சென்னை செல்கிறார்.ஜெயலலிதா வருகையை முன்னிட்டு திருச்சி மாநகரம் முழுவதும் திரும்பும் திசையெல்லாம் அ.தி.மு.க., கொடி, ப்ளக்ஸ் பேனர், சுவர் விளம்பரமாக காட்சியளிக்கிறது.

லட்சக்கணக்கான தொண்டர் வருகை தரவிருப்பதால், மைதானத்தில் தடுப்பு வேலி, தடுப்புக் கட்டை அமைத்து ஒழுங்குப்படுத்தப்பட்டுள்ளது. தொண்டர்கள் வரும் வாகனம் நிறுத்த இடம் முன்பதிவு செய்யப்பட்டுள்ளது.

வெளியூர்களிலிருந்து இருந்து வரும் வாகனங்கள் நிறுத்துவதற்கான இடங்கள் அறிவிக்கப்பட்டுள்ளன. கோவை போராட்டத்தின்போது அதிமுகவினரின் வாகனங்கள் திருச்சிக்குள் நுழையாமல் தடுக்க போலீஸார் கடுமையான நடவடிக்கையில் ஈடுபட்டதாக கூறப்படுகிறது. இதையடுத்து திருச்சிக்குள் வாகனங்களை நுழையவிடாமல் தடுக்கும் போலீஸாரைக் கண்காணிக்க, ஆங்காங்கே இரண்டு பேர் கொண்ட அ.தி.மு.க. வக்கீல் குழு அமைக்கப்பட்டுள்ளது.

ஆர்ப்பாட்டம் நடக்கும் மைதானத்தை போலீஸார் பார்வையிட்டு, பாதுகாப்பு ஏற்பாடுகளை செய்கின்றனர். ஆனால், ஜெயலலிதா பாதுகாப்புப் பணியில், சீருடை அணிந்த ஜெயலலிதா பேரவையினர் ஈடுபட உள்ளனர்.

ஆர்ப்பாட்ட ஏற்பாடுகளை கட்சி பொருளாளர் ஓ.பன்னீர்செல்வம், தலைமை நிலையச் செயலாளர் செங்கோட்டையன், திருச்சி மாவட்டப் பொறுப்பாளர் ஜெயக்குமார், மாநகர் மாவட்டச் செயலாளர் மனோகரன் செய்துள்ளனர்

நன்றி :தட்ஸ்தமிழ்