பிரபாகரன் உயிருடன் இருப்பதாகக் கூறி புலிகள் நிதி சேகரிக்கின்றனர்! - பேர்னார்ட் குணதிலக்க

by நிசாந்தன் Fri Aug 13, 2010 11:09 am

தமிழீழ விடுதலைப் புலிகளின் தலைவர் வேலுப்பிள்ளை பிரபாகரன் உயிருடன் இருப்பதாகக் கூறி விடுதலைப் புலிகளுக்கு ஆதரவான அமைப்புக்கள் புலம்பெயர்ந்த தமிழ் மக்களிடம் நிதி சேகரித்து வருவதாக சிறிலங்கா அரசாங்கத்தின் சமாதான செயலகத்தின் முன்னாள் பணிப்பாளர் பேர்னார்ட் குணதிலக்க தெரிவித்துள்ளார்.

சிறிலங்கா ஜனாதிபதி மகிந்த ராஜபக்சவால் நியமிக்கப்பட்ட உண்மைகளைக் கண்டறிவதற்கான நல்லிணக்க ஆணைக்குழுவின் முன்னிலையில் நேற்று சாட்சியமளிக்கும் போதே அவர் இது குறித்து தெரிவித்துள்ளார். பிரபாகரனின் கையெழுத்திட்ட ஆவணங்களைப் பயன்படுத்தி விடுதலைப் புலிகளுக்கு ஆதரவான அமைப்புக்கள் புலம்பெயர்ந்த தமிழ் மக்களிடம் நிதி சேகரித்து வருவதாக பேர்னார்ட் குணதிலக்க கூறியுள்ளார்.

ஜனாதிபதி மகிந்த ராஜபக்சவால் நியமிக்கப்பட்ட உண்மைகளைக் கண்டறிவதற்கான நல்லிணக்க ஆணைக்குழு தனது முதலாவது விசாரணையை நேற்று ஆரம்பித்திருந்தது. சிறிலங்காவின் முன்னாள் சட்டமா அதிபர் சி.ஆர்.டி.சில்வா தலைமையிலான எட்டுப் பேரைக் கொண்ட இந்த உண்மைகளைக் கண்டறிவதற்கான நல்லிணக்க ஆணைக்குழு கொழும்பிலுள்ள லக்ஷ்மன் கதிர்காமர் நிலையத்தில் இவ் விசாரணைகளை ஆரம்பித்திருந்தது.

சிறிலங்காவின் சமாதானச் செயலகத்தின் முன்னாள் பணிப்பாளரும், தமிழீழ விடுதலைப் புலிகளுடனான பேச்சுவார்த்தைகளின் போது ஐக்கிய தேசியக் கட்சியின் தூதுக் குழுவில் கலந்து கொண்டவருமான பேர்னார்ட் குணத்திலக இந்த ஆணைக்குழு முன் இன்று சாட்சியமளித்திருந்தார். அதேவேளை, சிறிலங்காவின் படைத்துறையின் செயலாளர் கோத்தபாய ராஜபக்ச இம் மாதம் 17ஆம் திகதி இந்த ஆணைக்குழு முன் சாட்சியமளிப்பதற்கு பெயர் குறிப்பிடப்பட்டுள்ளது. எதிர்வரும் 25ஆம் திகதி வரை இடம்பெறவுள்ள இவ் விசாரணையில் அரசாங்க அதிகாரிகள், முன்னாள் இராஜதந்திரிகள், கல்வியாளர்கள், புத்திஜீவிகள் எனப் பலரும் சாட்சியமளிக்கவுள்ளதாக உண்மைகளைக் கண்டறிவதற்கான நல்லிணக்க ஆணைக்குழுவின் செயலாளர் எஸ்.எம். சமரகோன் தெரிவித்துள்ளார்.

அத்துடன், எஸ்.எல்.குணசேகர, ஆனந்தசங்கரி, கொட்பிறி குணதிலக்க, ஹிரந்த விஜேமான, மங்கள சமரவீர, ஓஸ்டின் பெர்னாண்டோ, ராஜன் ஆசிர்வாதம், ரஜீவா விஜேசிங்க, நிஹால் ரொட்ரிகோ, மானல் அபேசேகர, ஜயந்த தனபால, அசோக குணசேகர ஆகியோரும் இந்த விசாரணைகளின் போது சாட்சியமளிக்கவுள்ளதாக தெரிவிக்கப்பட்டுள்ளது.

அதேவேளை, இம் மாதம் 14, 15ஆம் திகதிகளில் வவுனியாவில் உண்மைகளைக் கண்டறிவதற்கான நல்லிணக்க ஆணைக்குழுவின் விசாரணைகள் இடம்பெறவுள்ளதாக அறிவிக்கப்பட்டுள்ளது. வன்னியில் கடந்த வருடம் இடம்பெற்ற இனப்படுகொலைப் போரின் போது சிறிலங்கா படைத்தரப்பால் மேற்கொள்ளப்பட்ட போர்க்குற்றங்கள் மற்றும் மனிதவுரிமை மீறல்களுக்கு எதிராக ஐக்கிய நாடுகள் சபையின் செயலாளர் நாயகம் பான் கீ மூன் நியமித்த நிபுணர்கள் குழு தமது நடவடிக்கைகளை விரைவுபடுத்தியுள்ள நிலையில், இவ் விசாரணைகள் இடம்பெற்றுள்ளன.

இந் நிலையில் சர்வதேச நியமங்களுக்கு எதிராக சிறிலங்காப் படைத்தரப்பால் மேற்கொள்ளப்பட்ட போர்க்குற்றங்கள் மற்றும் மனிதவுரிமை மீறல்களுக்கு எதிரான விசாரணைகளில் பாதிக்கப்பட்ட தமிழ் மக்களின் பிரதிநிதிகளுக்கே முக்கியத்துவம் வழங்கப்பட வேண்டும் என சட்ட வல்லுநர்கள் சுட்டிக்காட்டியுள்ளனர்.