பருவ நிலை மாற்றத்தால் உப்பு உற்பத்தி மந்தம்

தூத்துக்குடி:

தூத்துக்குடி மாவட்டத்தில் இந்த ஆண்டு பருவநிலை சாதகமாக அமையாததால் உப்பு உற்பத்தி மந்த நிலையில் காணப்படுகிறது.
உப்பு உற்பத்தி சீசன் முடிய இன்னும் சில வாரங்களே உள்ள நிலையில் மொத்த
உற்பத்தி அளவில் 80 சதவித அளவையே எட்டும் என எதிர்பார்க்கப்படுகிறது.
தூத்துக்குடி மாவட்டத்தில் வேம்பார், தூத்துக்குடி, முத்தையாபுரம்,
முள்ளக்காடு, ஆறுமுகனேரி பகுதிகளில் சுமார் 20 ஆயிரம் ஏக்கரில் உப்பளங்கள்
அமைந்துள்ளன. இவைகளில் சுமார் 50 ஆயிரம் தொழிலாளர்கள் வேலை
செய்து வருகின்றனர். ஆண்டுக்கு சராசரியாக 20 லட்சம் டன் உப்பு உற்பத்தி
செய்யப்பட்டு வந்தது. நாட்டின் உப்பு உற்பத்தியில் குஜராத் மாநிலத்துக்கு அடுத்தபடியாக தூத்துக்குடி மாவட்டம் 2-வது இடத்தில் உள்ளது. இம்
மாவட்டத்தைப் பொருத்தவரை ஜனவரி மாதம் உப்பு உற்பத்திக்கான ஆரம்பகட்டப்
பணிகள் தொடங்கும். ஏப்ரல் முதல் ஆகஸ்ட் வரை 5 மாதங்கள்தான் உப்பு
உற்பத்திக்கான உச்சகட்ட காலங்கள். 3 ஆண்டுகளாக ஜனவரி முதல் மார்ச் வரை காலம் தவறிய கனமழை அவ்வப்போது பெய்த காரணத்தால் உப்பு உற்பத்தி பாதிப்படைந்தது. இதனால்,
மாவட்டத்தின் சராசரி உப்பு உற்பத்தி அளவு குறைந்தது. 2007, 2008}ம்
ஆண்டுகளில் 12 லட்சம் டன் அளவுக்கே உப்பு உற்பத்தி இருந்தது. சென்ற ஆண்டு மழை பெரிய அளவில் குறுக்கிடவில்லை என்பதால் 18 லட்சம் டன் உப்பு உற்பத்தியானது. இந்த
ஆண்டு காலம் தவறிய மழை எதுவும் இதுவரை பெய்யவில்லை. இதனால், மாவட்டம்
முழுவதும் உப்பு உற்பத்தி கடந்த 5 மாதங்களாக முழு வீச்சில் நடைபெற்றது.
இதனால், இந்த ஆண்டு உப்பு உற்பத்தி, மாவட்டத்தின் சராசரி அளவான 20 லட்சம்
டன்னை எட்டும் என்ற நம்பிக்கை ஏற்பட்டது. ஆனால், இந்த ஆண்டும்
எதிர்பார்த்த அளவுக்கு உப்பு உற்பத்தி இல்லை. அக்டோபர் முதல் வாரத்தில்
பருவமழை தொடங்கிவிடும் என்பதால், உப்பு உற்பத்திக்கு இன்னும் 7 வார காலம்
மட்டுமே பாக்கியுள்ளது. இந்த நிலையில் இதுவரை 50 சதவீதம் அளவு உப்பு மட்டுமே உற்பத்தியாகியுள்ளது. அதாவது 10 லட்சம் டன்கள் மட்டுமே உற்பத்தியாகியுள்ளன. மீதமுள்ள 7 வாரங்களிலும் இதே நிலை நீடித்தால் அதிகபட்சமாக இன்னும் 30 சதவீதம் வரை உப்பு உற்பத்தியாகும். எனவே,
இந்த ஆண்டு 80 சதவீதம் அளவுக்குதான், அதாவது 16 லட்சம் டன் முதல் 17
லட்சம் டன்கள் வரைதான் உப்பு உற்பத்தி இருக்கும் என்றார், தூத்துக்குடி
மாவட்ட சிறு உப்பு உற்பத்தியாளர் சங்கச் செயலர் ஏ.ஆர்.ஏ.எஸ். தனபாலன்.
இந்த ஆண்டு மழை எதுவும் குறுக்கிடவில்லை. மேலும், நல்ல வெயில் கொளுத்திய
போதிலும் உப்பு உற்பத்தியில் மந்த நிலை ஏற்பட்டதற்கு காற்று இல்லாததே
காரணம். வழக்கமாக ஜூலை, ஆகஸ்ட் மாதங்களில் மேற்கில் இருந்து பலத்த காற்று வீசும். இந்த காற்று தான் உப்பு உற்பத்திக்கு சாதகமாக அமையும். ஆனால், இந்த ஆண்டு மாவட்டத்தில் காற்றே வீசவில்லை. இதனால், தான் உப்பு உற்பத்தியும் எதிர்பார்த்த அளவு இல்லை என்றார் அவர்.
இதேநேரத்தில் உப்பு விலையும் தொடர்ந்து குறைவாகவே இருந்து வருகிறது. கடந்த
3 ஆண்டுகளோடு ஒப்பிடும் போது இந்த ஆண்டு உப்பு விலை மிக மிக குறைவாக
உள்ளது. 4 மாதங்களாகவே ஒரு டன் உப்பு | 400 முதல் | 500 வரைதான் விற்கப்படுகிறது.
தூத்துக்குடியில் இருந்து இந்த ஆண்டு இந்தோனேசியா மற்றும் கொரியா ஆகிய
நாடுகளுக்கு சுமார் 40 ஆயிரம் டன் உப்பு ஏற்றுமதி செய்யப்பட்டுள்ளது. இதனால்தான்
உப்பு விலை 4 மாதங்களாக ஒரே சீராக இருந்து வருகிறது. இல்லையெனில் இதையும்
விட விலை மிகவும் சரிவடைந்திருக்கும் என்கின்றனர் உப்பு உற்பத்தியாளர்கள். உற்பத்தியில்
மந்தம், விலை குறைவு போன்ற காரணங்களால் இந்த ஆண்டும் வழக்கம்போல,
தூத்துக்குடி மாவட்ட உற்பத்தியாளர்களுக்கு எதிர்பார்த்த லாபம் இல்லை.
உற்பத்தி செலவு கிடைத்தால் போதும் என்ற நிலையிலேயே சிறு உப்பு
உற்பத்தியாளர்கள் உள்ளனர். ஏதோ தொழிலை விடக்கூடாது என தொடர்ந்து
செய்து வருகிறோம். இதே நிலை சில ஆண்டுகள் நீடித்தால் தூத்துக்குடி
மாவட்டத்தில் பாரம்பரிய உப்பு தொழில் கேள்விக்குறியாகும். எனவே,
உப்புத் தொழிலைக் காப்பாற்ற உற்பத்திச் செலவைக் குறைக்கும் வகையில் சலுகை
கட்டணத்தில் மின்சாரம் உள்ளிட்ட சில சலுகைகளை வழங்க அரசு முன்வர வேண்டும்
என்பதுதான் உப்பு உற்பத்தியாளர்களின் ஒட்டுமொத்தக் கோரிக்கை.