கல்விக்கண் திறக்க ஊனம் ஒரு தடையில்லை : கால்கள் செயலிந்தும் மனம்தளராத இளம்பெண்

முசிறி:

கால்கள் செயல் இழந்த நிலையில், படிப்பின் மேல் கொண்ட ஆர்வம்
காரணமாக தன்னம்பிக்கை, விடாமுயற்சியுடன் தொடர்ந்து படித்து வரும்
தொட்டியம் மாணவி அனைவருக்கும் எடுத்துக்காட்டாய் திகழ்ந்து வருகிறார்.
திருச்சி மாவட்டம், தொட்டியம், சுண்ணாம்புக்கார தெருவில் வசிப்பவர்
கூலித்தொழிலாளி வெங்கடாஜலம். இவரது மனைவி நிர்மலா. இவர்களுக்கு திருமணமாகி
பத்து ஆண்டுக்கு பிறகு பிறந்த மகள் திவ்யா(20). இவர் தொட்டியம் அரசு
பெண்கள் மேல்நிலைப்பள்ளியில் தற்போது ப்ளஸ் ஒன் வகுப்பு படிக்கிறார்.
மாணவி திவ்யா எட்டாம் வகுப்பு படித்து வந்தபோது தான் அவர் வாழ்வில் சோகம்
ஏற்பட்டது. அரையாண்டு தேர்வின்போது கை, கால் தடுமாற்றம் ஏற்பட்டு, உடல்
நிலை சரியில்லாமல் போனது. இதனால் அந்தாண்டு படிப்பை தொடர முடியவில்லை.
விடா முயற்சியுடன் மீண்டும் எட்டாம் வகுப்பில் சேர்ந்து படித்துள்ளார்.
ஒன்பதாம் வகுப்பு அரையாண்டு தேர்வின்போது மீண்டும் உடல் நிலை சரியில்லாமல்
போனது. அப்போது நரம்பு கோளாறு காரணமாக அவரது இரு கால்களும் செயல்இழந்தது.
கண்பார்வையும் சரிவர தெரியாமல் போய்விட்டது. திவ்யா சென்னை அரசு
மருத்துவமனையில் தங்கி சிகிச்சைப் பெற்றார். சிகிச்சையில் மீண்டும்
கண்பார்வை பெற்று கால் ஊனமான நிலையில் திரும்பி வந்துள்ளார். தற்போது எந்த
ஒரு துணையும் இன்றி நிற்கவோ, உட்காரவோ முடியாத நிலையில், வாக்கர் கருவி
கொண்டு நடந்து வருகிறார்.
இத்தகைய தொடர் சோகத்தின் விளைவாக மாணவி திவ்யா பள்ளியில் தொடர்ந்து
படிப்பை தொடர முடியவில்லை. இருப்பினும் உடல் ஊனத்தைப் பார்க்காமல்
படிப்பின் மீதுள்ள ஆர்வம் காரணமாக கடந்த ஏப்ரல் எஸ்.எஸ்.எல்.ஸி.,
தனித்தேர்வு எழுதி தேர்ச்சி பெற்றார். இதனால் அவருக்கு மேலும் படிக்க
வேண்டும் என்ற ஆர்வத்தை ஏற்படுத்தியது. தற்போது தனது வீட்டிலிருந்து ஒரு
கிலோ மீட்டர் தூரத்தில் உள்ள தொட்டியம் அரசு மேல்நிலைப்பள்ளியில் ப்ளஸ் 1
படிக்கிறார். மாணவி திவ்யாவுக்கு தமிழக அரசின் திட்டமான மாற்றுத்திறனாளி
நிதியிலிருந்து உதவி தொகையாக மாதம் ரூபாய் 400 கிடைக்கிறது. படிப்பின்
மீது ஆர்வம் கொண்ட திவ்யா மூன்று சக்கர மோட்டார் வாகனம் வாங்க கூடிய வசதி
அவர் குடும்பத்தினரிடம் இல்லாததால் தினந்தோறும் பள்ளிக்கு ஆட்டோவில்
சென்று வருகிறார். ஆட்டோ வாடகை மாதம் 300 ரூபாய்க்கு மேல்
தரவேண்டியுள்ளதால், மூன்று சக்கர மோட்டார் வாகனமும் வாங்க முடியாத
நிலையில் உள்ளார். தற்போது மாணவி திவ்யாவுக்கு இரண்டு கால்களும் செயல்
இழந்த நிலையில் பள்ளியில் தொடர்ந்து 10 நிமிடத்திற்கு மேல் எழுதவும்
முடியாது.
விடாமுயற்சியுடன் படித்துவரும் மாணவி திவ்யா கூறியதாவது:

பள்ளிக்கு செல்ல வேண்டிய ஆர்வம் இருந்தாலும், நடந்து செல்ல முடியாத
நிலையில் உள்ள நான் ஆட்டோவை நம்பியே பள்ளிக்கு சென்று வருகிறேன். ஆட்டோ
வராத நாளில் பள்ளி செல்ல முடியாது. இன்ஜினியரிங் படிக்க வேண்டும் என்பது
எனது கனவு. அது நிறைவேறாத போது, படித்து ஆசிரியர் பணியாவது பெற்று மாணவ,
மாணவிக்கு தன்னால் இயன்ற பணி செய்ய வேண்டும். தமிழக அரசோ, தொண்டு
நிறுவனங்களோ 95976 56061 என்ற எண்ணில் தொடர்பு கொண்டு, மருத்துவ வசதியும்,
மூன்று சக்கர மோட்டார் வாகனம் வழங்கினால், தனது படிப்பைத் தொடர முடியும்.
இவ்வாறு அவர் கூறினார். பெண் உரிமை, கல்வியறிவு, சமூக விழிப்புணர்வு
குறித்து அக்கறை கொள்ளும் அரசும், தொண்டு நிறுவனங்களும் இம்மாணவியின்
எதிர்கால நலனை கருதி உதவ வேண்டும் என்பதே அனைவரின் கோரிக்கை.