டாஸ்மாக் வேலை நிறுத்தம் தோல்வி

நவீன் · நவீன் Thu Aug 12, 2010 9:20 am

புதுக்கோட்டை:

புதுக்கோட்டை மாவட்டத்தில் டாஸ்மாக் பணியாளர்களின்
வேலைநிறுத்தப் போராட்டம் தோல்வியை தழுவியது. ஒருமணிநேர காலதாமதத்துக்கு
பின் அனைத்து கடைகளும் திறக்கப்பட்டு விற்பனை நடந்தது. இதர அரசுத்துறை
ஊழியர்களுக்கு இணையான ஊதியம் மற்றும் சலுகை வழங்கவேண்டும், வார விடுமுறை
ழங்கவேண்டும் உள்ளிட்ட கோரிக்கைகளை வலியுறுத்தி நேற்று ஒருநாள்
வேலைநிறுத்தப் போராட்டத்தில் ஈடுபடப் போவதாக தமிழ்நாடு டாஸ்மாக்
பணியாளர்கள் சங்கம் அறிவித்தது. இப்போராட்டத்துக்கு கம்யூனிஸ்ட்
ஆதரவுபெற்ற சி.ஐ.டி.யு., ஏ.ஐ.டி.யு.சி., சங்கங்கள், அ.தி.மு.க.,
ஆதரவுபெற்ற டாஸ்மாக் அண்ணா தொழிற்சங்கம் ஆகியவை ஆதரவு அளித்தது. அரசுக்கு
எதிரான போராட்டமாக அமையும் என்பதால் வேலை நிறுத்தப் போராட்டத்தை
முறியடித்து வழக்கம்போல் கடை திறக்க அரசுத்துறை அதிகாரிகள் நடவடிக்கை
எடுத்தனர். டாஸ்மாக் பணியாளர் ஒவ்வொருவரிடமிருந்தும் வேலைநிறுத்தப்
போராட்டத்தில் ஈடுபடப் போவதில்லை என எழுதிவாங்கிக் கொண்டனர். இதற்கு கடும்
கண்டனம் தெரிவித்த தொழிற் சங்கங்கள் திட்டமிட்டபடி டாஸ்மாக் பணியாளர்
வேலைநிறுத்தப் போராட்டம் நடக்கும் என அறிவித்தனர். புதுக்கோட்டை
மாவட்டத்தில் காலை 10 மணிக்கு திறக்கவேண்டிய டாஸ்மாக் கடை 11 மணிவரை
திறக்கப்படவில்லை. இதன்காரணமாக பார்களிலும் வியாபாரம் ஸ்தம்பித்தது.
ஆத்திரமடைந்த பார் உரிமையாளர் மற்றும் பணியாளர் கடையை திறக்குமாறு
டாஸ்மாக் பணியாளரை வற்புறுத்தினர். இதனால் இருதரப்பினருக்கும் இடையே
வாக்குவாதம் ஏற்பட்டது. வருவாய்த்துறையினர் மற்றும் போலீஸார் உதவியுடன்
கடைகளை திறக்க டாஸ்மாக் அதிகாரிகள் நடவடிக்கை மேற்கொண்டனர். இதன்பின்னரே
கடை ஒவ்வொன்றாக திறக்கப்பட்டது. அன்னவாசல், இலுப்பூர், ஆலங்குடி,
கீரமங்கலம் போன்ற கிராமப் பகுதிகளில் உள்ள டாஸ்மாக் கடை பெரும்பாலும்
இரண்டுமணி நேர காலதாமதத்துக்கு பின்னரே திறக்கப்பட்டது. வேலைநிறுத்தப்
போராட்டத்தை முறியடிக்க அதிகாரிகள் மேற்கொண்ட நடவடிக்கைக்கு கண்டனம்
தெரிவித்த டாஸ்மாக் பணியாளர்கள் சங்க மாவட்டச் செயலாளர் ஜீவானந்தம்,
கோரிக்கை நிறைவேறும் வரை போராட்டம் தொடரும் என அறிவித்துள்ளார்.

டாஸ்மாக் வேலை நிறுத்தம் தோல்வி

டாஸ்மாக் வேலை நிறுத்தம் தோல்வி

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக