பெங்களூரில் |3.45 கோடி கொள்ளை

பெங்களூர்,

தங்கக் கட்டிகள் மொத்த விற்பனையாளர் அலுவலகத்தில் இருந்து |3.45 கோடி ரொக்கப்பணம் கொள்ளையடிக்கப்பட்டது.இதுதொடர்பாக அலுவலகத்தின் காவலாளியை போலீஸôர் தேடி வருகிறார்கள். பெங்களூர்
அவென்யூ சாலையில் உள்ளது மைக்ரோ இன்டர்நேஷனல் நிறுவனம். இதன் உரிமையாளர்
நேரேஷ். இவர் தங்க கட்டிகளை மொத்தமாக விற்பனை செய்து வருகிறார்.
இவரது கடையில் 21 பேர் பணியாற்றுகிறார்கள். தினமும் தங்க நகை கடைகளுக்குச்
சென்று இந்த ஊழியர்கள் தங்க பிஸ்கட்களை ஆர்டரின் பேரில் விற்பனை செய்து
வருவார்கள். தினமும் 18 முதல் 30 கிலோ வரையிலான தங்கக்கட்டிகளை விற்பனை
செய்து வருகிறார்கள். சனிக்கிழமை வங்கி விடுமுறை என்பதால், அன்று
தங்க பிஸ்கட் மூலம் கிடைத்த பணம் |3.45 கோடியை அலுவலகத்தில் உள்ள இரண்டு
லாக்கர்களில் வைத்திருந்ததாகத் தெரிகிறது.அலுவலகத்தின் மேலாளராக
சுரேஷ் என்பவர் பணியாற்றி வருகிறார். அவர் நரேஷின் நம்பிக்கைக்குப்
பாத்திரமானவர். எனவே அலுவலகத்தின் அனைத்து நிர்வாகப் பொறுப்பையும் சுரேஷே
கவனித்து வந்தார். தினமும் அலுவலகத்தைப் பூட்டிவிட்டு சாவியை
நரேஷிடம் கொடுத்துவிட்டுச் செல்வார். இந்த நிறுவனத்தில் காவலாளியாக
நேபாளத்தைச் சேர்ந்த தன்சிங் பணியாற்றி வந்தார். சனிக்கிழமை இரவு
பணி முடிந்ததும் ஊழியர்கள் புறப்பட்டுச் சென்றுவிட்டனர். நரேஷிடம் சாவியை
கொடுத்துவிட்டு சுரேஷும் சென்றதாகத் தெரிகிறது. திங்கள்கிழமை காலை 10 மணி
அளவில் சுரேஷ் அலுவலகத்துக்கு வந்தார். அப்போது அலுவலக கதவு உடைக்கப்பட்டு
லாக்கரில் இருந்த |3.45 கோடி கொள்ளையடிக்கப்பட்டு இருப்பது தெரியவந்தது. இதுபற்றி
நரேஷுக்குத் தகவல் தெரிவித்தார். அவர் உடனடியாக அல்சூர் கேட் காவல்
நிலையத்தில் புகார் செய்தார். போலீஸôர் அங்குவிரைந்து சென்று பார்த்தனர்.
அலுவலக காவலாளி தன்சிங்கை தேடியபோது அவரை காணவில்லை. சம்பவ இடத்தை
அல்சூர் கேட் உதவி போலீஸ் கமிஷனர் கசினகட்டி சென்று பார்த்தார்.
இதுகுறித்து அவர் கூறியதாவது: கொள்ளை போன பணம் 1000, 500 மற்றும் 100
ரூபாய் | நோட்டுகள் ஆகும். இவற்றின் மொத்த எடை 50 முதல் 55 கிலோ
இருக்கும். எனவே தன்சிங்குடன் வேறு சிலரும் சேர்ந்து இந்தக் கொள்ளையில்
ஈடுபட்டிருக்க வேண்டும்.தன்சிங் நேபாளத்தைச் சேர்ந்தவர். இவர்
கொள்ளையடித்த பணத்துடன் விமானத்திலோ, அல்லது ரயிலிலோ நேபாளத்துக்கு
தப்பியிருக்கலாம். இதனால் விமான நிலையம், ரயில் நிலையத்தில்
வைக்கப்பட்டுள்ள சிசிடிவியை பரிசோதித்து பார்க்க உள்ளோம். மைக்கோரோ
இன்டர்நேஷனல் அலுவலகத்தில் சிசிடிவி வைக்கப்பட்டுள்ளது. ஆனால் கொள்ளை
நடந்தபோது மின்சாரம் இல்லை. மேலும் சிசிடிவி கேமரா வேறுபக்கமாக திருப்பி
வைக்கப்பட்டுள்ளது. எனவே திட்டம் போட்டு இந்தக் கொள்ளையை தன்சிங்
நடத்தியுள்ளதாகத் தெரியவந்துள்ளது என்றார். இந்தச் சம்பவம் குறித்து அல்சூர் கேட் போலீஸôர் வழக்குப் பதிவு செய்து தப்பியோடிய கொள்ளையர்களைத் தேடி வருகிறார்கள்.