100 ஆண்டுகளுக்கு பிறகு மும்பை மக்களை மிரட்டிய 16 அடி ராட்சத அலை

by **சிவா** Sat Jul 25, 2009 10:01 pm

மும்பையில் கடந்த 2 நாட்களாக கடலில் அலையின் சீற்றம் அதிகமாக காணப்பட்டது. நேற்று 16 அடி உயரத்துக்கு அலைகள் எழும்பின.

கேட்வே ஆப் இந்தியா, மரின் டிரைவ், ஜுகு, வொர்லி உள்ளிட்ட பல இடங்களில் இது போன்ற ராட்சத அலைகள் எழுந்தன.

ஆர்ப்பரித்து எழுந்த ராட்சத அலைகளை பார்த்து மக்கள் பயந்தனர். நரிமன் பாயண்ட், கொலாபா, கியூப் பரேடு, மரின் டிரைவ், ஹாகுதி அலி, ஒர்லி சீபேஷ், பந்த்ரா பேன்டு ஸ்யிண்டு, ஜுகு, வெர்சோவா, மார்வ், கோரை, பந்துப்மற்றும் விக்ரோலி ஆகிய இடங்களில் கடல் அரிப்பை தடுக்க கட்டப்பட்டிருந்த சுவர்களின் ஓரம் போடப்பட்டிருந்த பாறைகளை தாண்டி கடல் நீர் வெளியே வந்தது.

பிரபாதேவி, வொர்லி, பந்த்ரா, கேட்வே ஆப் இந்தியா, தாஜ்மகால் பேலஸ் மற்றும் டவர் ஓட்டல் பகுதிகளில் ரோட்டில் கடல் நீர் வெள்ளம் போல் ஓடியது. இதைப் பார்த்த மக்கள் கடல் பொங்கி ஊருக்குள் புகுந்து விடுமோ என பயந்தனர்.

மும்பையின் அருகேயுள்ள கடற்கரை பகுதியான தானே, பயந்தா, உத்தன், பல்சார், பொய்சார், தானு போன்ற இடங்களில் வழக்கத்தை விட அதிக உயரத்தில் இரைச்சலுடன் ஆர்ப்பரித்து அலைகள் எழும்பின.

மதியம் 2.05 மணிக்கு ஆர்ப்பரிக்க தொடங்கிய அலை இரவு 8.09 மணிக்குதான் அடங்கியது. பின்னர் சாதாரணமான அலையாக மாறியது. ராட்சத அலையை பார்த்து பயந்தாலும் துணிச்சலுடன் சென்று பொதுமக்கள் வேடிக்கை பார்த்தனர்.

ராட்சத அலைகள் தோன்றியதை தொடர்ந்து முன் எச்சரிக்கை நடவடிக்கைகளை அதிகாரிகள் மேற்கொண்டனர். கடலோரத்தில் குடியிருந்த 200 குடும்பங்கள் வெளியேற்றப்பட்டனர். கடலுக்கு அருகில் யாரும் செல்லவேண்டாம் என எச்சரிக்கை விடப்பட்டது.

கடலோரத்தில் உள்ள பல அடுக்கு மாடிகளில் ஏராள மானவர்கள் தங்கியுள்ளனர். இருந்தாலும் அவர்கள் தைரியமாக பால்கனியில் நின்று வேடிக்கை பார்த்தனர். தகவல் அறிந்ததும் அவர்களுடன் சேர்ந்து அக்கம் பக்கத்தினரும், நண்பர்கள் மற்றும் உறவினர்களும் கடல் சீற்றத்தை பார்த்தனர்.

மும்பையில், 100 ஆண்டுகளுக்கு பிறகு இதுபோன்ற ராட்சத அலைகள் உருவாகியுள்ளன. இதனால் உயிர் சேதம் மற்றும் பொருட்சேதம் ஏற்படவில்லை.