புத்தகம் படிக்கும் பழக்கம் அதிகரிக்க வேண்டும்: புதுவை முதல்வர் வி.வைத்திலிங்கம்

ஈரோடு, மக்களிடம் புத்தகங்கள் படிக்கும் பழக்கம் அதிகரிக்க வேண்டும் என்று புதுவை முதல்வர் வி.வைத்திலிங்கம் கூறினார்.
மக்கள் சிந்தனைப் பேரவை சார்பில் ஈரோட்டில் நடைபெற்ற புத்தகத்
திருவிழாவின் நிறைவு நாள் விழா செவ்வாய்க்கிழமை இரவு நடைபெற்றது. சக்தி
மசாலா நிறுவனங்களின் தலைவர் பி.சி.துரைசாமி தலைமை வகித்தார்.
இயக்குநர் சாந்தி துரைசாமி முன்னிலை வகித்தார். மக்கள் சிந்தனைப் பேரவைத்
தலைவர் த.ஸ்டாலின்குணசேகரன் வரவேற்றார். வ.உ.சிதம்பரனாரின்
மகன் வ.உ.சி.வாலேஸ்வரன், பேத்தி மரகத மீனாட்சிராஜா, தென்னிந்திய புத்தகப்
பதிப்பாளர்கள் சங்கத் தலைவர் சேது சொக்கலிங்கம் ஆகியோர் வாழ்த்துரை
வழங்கினர். பேராசிரியர் கு.ஞானசம்பந்தன் கருத்துரையாற்றினார். இதில்,
சிறப்பு விருந்தினராகப் பங்கேற்ற புதுவை முதல்வர் வி.வைத்திலிங்கம்
பேசியது: ஈரோடு பெரியார் தோன்றிய மண். பகுத்தறிவு இயக்கம்
ஆரம்பித்த பூமி. மக்கள் சுயமரியாதை இழந்த நேரத்தில், அவர்களின்
உணர்வுகளைத் தட்டியெழுப்பி, சுயமரியாதைக்கு வித்திட்டது ஈரோடுதான்.
அதனால்தான் இங்கு நடைபெறும் புத்தகத் திருவிழாவிற்கு மக்கள் மிகப்பெரிய
ஆதரவை அளித்துள்ளனர். பல ஊர்களில் புத்தகக் கண்காட்சிகள் நடைபெற்றாலும்,
இந்த அளவிற்கு வெற்றிகரமாக நடைபெற பலதரப்பினரின் ஊக்குவிப்புதான் காரணம்.
இவ்விழாவில் தியாகத்தின் உருவமான வஉசி-யின் குடும்பத்தார்
வந்திருக்கிறார்கள். சுதந்திர தினத்தைக் கொண்டாடுவதுபோல் புத்தகத்
திருவிழாவின் நிறைவு விழா கொண்டாடப்படுவது பெரும் மகிழ்ச்சியளிக்கிறது.
இரு தினங்களுக்கு முன் வெள்ளையனே வெளியேறு இயக்க நினைவு தின நிகழ்ச்சிகள் நடைபெற்றன. வெள்ளையரை
வெளியேற்ற பல்லாயிரக்கணக்கானோர் சிறை சென்றார்கள். இச்சமயத்தில் அறியாமையை
வெளியேற்றும் புத்தகங்களுக்குத் திருவிழா நடத்தப்பட்டுள்ளது மிகவும்
பாராட்டுக்குரியது. ஒரு புத்தகத்தை எழுதவும், அதை வெளியிடவும்,
மக்களிடம் கொண்டு சேர்க்கவும் எழுத்தாளர்களும், பதிப்பாளர்களும் மிகுந்த
சிரமப்படுகிறார்கள். அப்புத்தகங்களுக்கு மக்கள் அளிக்கும் ஆதரவுதான்
அவர்களை மீண்டும் புத்தகம் வெளியிட ஊக்குவிக்கும். எனவே மக்கள் அதிக
புத்தகங்களைப் படித்து அவர்களுக்கு ஆதரவளிப்பதுடன், தங்களது
சிந்தனைகளையும் மேம்படுத்திக் கொள்ள வேண்டும். ஈரோடு, நாமக்கல்
பகுதிகளில் அதிக அளவில் கல்வி நிலையங்கள் அமைந்துள்ளன. லட்சக்கணக்கான
மாணவர்கள் உயர்கல்வி பயில்கின்றனர். இதுபோல் நாட்டின் அனைத்துப் பகுதியிலும் கல்வி மேம்பட வேண்டும்.
புதுவையில்தான் பாரதமாதா சிலை உருவாக்கப்பட்டது. பல சுதந்திரப் போராட்டத்
தியாகிகள் அங்கிருந்தவாறே நாட்டின் சுதந்திரத்திற்குப் போராடியுள்ளனர்.
எனவே வஉசி-யின் குடும்பத்தார் போன்ற சுதந்திரப் போராட்டத் தியாகிகளின்
வாரிசுகளை புதுவைக்கும் அழைத்துச் சென்று கெüரவிக்க விரும்புகிறோம்
என்றார் வைத்திலிங்கம். மக்கள் சிந்தனைப் பேரவைச் செயலர் க.நா.பாலன் நன்றி கூறினார். புத்தகத் திருவிழாவில் அரங்குகள் அமைத்த புத்தக நிறுவனத்தார் உள்ளிட்டோருக்கு விருதுகள் வழங்கப்பட்டன.

பலவற்றையும் படித்தால்தான் பண்டிதன் ஆகமுடியும்