ராமதாசுக்கு யோசனை

அதிக பரபரப்பு இல்லாமலிருக்கும் மருத்துவர் ஐயா ராமதாசு அவர்களே... சுதந்திர இந்திய வாக்காளனின் சில யோசனைகள்... தாங்கள் இயக்கம் ஆரம்பிக்கும் போது, அது அரசியல் கட்சியாக அமையவில்லை; நாளடைவில், அரசியல் கட்சியாக மாறியபோது, தங்களின் திருவாயால், "நானோ, என் உறவினர்களோ, பதவிக்கு வர மாட்டோம்; இது அனைத்து தமிழ் மக்களுக்கும், உதவும் நோக்கோடு ஆரம்பிக்கப் பட்ட அரசியல் கட்சி. அப்படி மீறி, பதவி ஏற்றால், எங்களை முச்சந்தியில் கட்டி வைத்து அடியுங்கள்' என்றீர்கள். ஆனால், தமிழக வாக்காளர்கள், பண்பாடு அறிந்தவர்கள்; அதனால் தான், ஓட்டால் அடித்து விட்டனர். தற்போது, தாங்கள் அறிந்தோ, அறியாமலோ, தங்களின் வாயால், "இப்படி தேர்தல் நடந்தால், நாங்கள் போட்டியிடாமல், சமுதாய இயக்கமாக, கட்சியை மாற்றுவோம்; இனிமேல் எவனிடமும் தேர்தல் சீட்டுக்காக கையேந்த மாட்டோம்' என்றும் வீராப்புடன் பேசியுள்ளீர். இவைகளில் இனி உறுதியாக இருக்க வேண்டும். விஜயகாந்தை எடுத்துக் கொள்ளுங்கள்... தனி ஒருவராக, மானஸ்தராக அவர் நடந்து கொண்டார். அந்த தைரியமாவது இனிமேல் உங்களுக்கு வரட்டும்!

இதெல்லாம் உங்களுக்கும் நன்கு தெரியும். இருந்தாலும், இந்த சுதந்திர இந்திய வாக்காளனின் சில யோசனைகள்...


* தாங்களும், தங்கள் மகனும் ஆற்றல் பெற்ற மருத்துவர்கள். இனிமேல் தங்களுக்கு, சொத்து, சுகம், காசு, பணம் தேவையில்லை; எனவே, தங்கள் ஊரிலோ, சென்னையிலோ தங்கி, வரும் நோயாளிகளுக்கு, இலவச மருத்துவ சிகிச்சை அளியுங்கள்.


* தங்களிடம் குவிந்துள்ள கோடிகளை வைத்து, இலவசமாக அனைத்து தரப்பு மக்களுக்கும், கல்வி, திருமணம், வேலை வாய்ப்பு போன்றவைகளை செய்யுங்கள்.


* பசுமை தாயக இயக்கத்தில் முழுக்க முழுக்க ஈடுபட்டு, தமிழகத்தில் விவசாய புரட்சி ஏற்படுத்தி, தங்கள் கட்சியை வலுப்படுத்தினால், ஒருவேளை, உங்களுக்குப் பின்னர் உங்கள் அன்பு மகன், அன்புமணியால் கூட வளர்ச்சி பெற்று, ஆளும் கட்சியாக மாறலாம்! நன்றாக யோசித்து, அரசியல் கட்சியா, சமுதாய இயக்கமா என்று முடிவெடுங்கள்.

நல்ல யோசனை தான் ,

ஆனால் நீங்க விஜயகாந்தை நல்லவன்னு சொல்லுறீங்க , காங்கிரஸ் மற்றும் திமுகவிடம் பணம் வாங்கிக்கொண்டு ஓட்டு பிரிக்கிற வேலையை கன கச்சிதமாக செய்தவர் நம்ம கேப்டன் அண்ணாச்சி தான்

புதுசா கட்சி ஆரம்பிக்கிர எல்லா அரசியல்வாதிகளும் தனியாத்தான் தேர்தலை சந்திப்பாங்க.....நீங்கள் குறிப்பிட்ட ராம்தாசும் கட்சி ஆரம்பித்த புதிதில் மூன்று தேர்தலை தனியாகத்தான் சந்தித்தார்கள்...அதன் பிறகுதான் கூட்டணி வைத்தார்கள்.....ஆணால் விஜய்காந்த் மாதிரி கேவலமாக ரெண்டு கட்சிகிட்ட பனம் வாங்கிட்டு இன்னொரு கட்சியோட ஓட்டை பிரிக்கல.....