பள்ளி மாணவி தற்கொலை: ஆசிரியையை கைது செய்யக்கோரி உறவினர்கள் முற்றுகை

திண்டுக்கல் : மாணவி ஒருவரை வகுப்பறையில் ஆசிரியை அடித்ததால், விஷம்
குடித்து தற்கொலை செய்து கொண்டதாக கூறி உறவினர்கள் பள்ளியை
முற்றுகையிட்டனர்.
கொடைக்கானல் நாயுடுபுரத்தை சேர்ந்தவர் லாசர். இவரது மனைவி அமலஜோதி.
இவர்களின் மகள் மரியசெல்வி(16). அங்குள்ள செயின்ட் சேவியர் பெண்கள்
மேல்நிலைப்பள்ளியில் பிளஸ் 1 படித்தார். நேற்று முன்தினம் இரவு வீட்டிற்கு
சோகத்துடன் வந்த அவர், வீட்டில் விஷம் குடித்து தற்கொலை செய்து கொண்டார்.
இறந்த மாணவியின் உறவினர்கள் நேற்று பள்ளியை முற்றுகையிட்டனர்.
அவர்கள் கூறியதாவது:

மாணவியை உதவி தலைமை ஆசிரியை செரீன்மேரி
திட்டியதோடு, அவரை கம்பால் அடித்துள்ளார்.இதில் மாணவி வகுப்பறையிலேயே
மயங்கி விழுந்துள்ளார். ஆசிரியை அடித்ததில் மாணவிக்கு உடலில் பல இடங்களில்
காயம் உள்ளது. மனமுடைந்து அவர் தற்கொலை செய்து கொண்டார்.ஆசிரியை அடித்ததை
பல மாணவியர் பார்த்துள்ளனர்.சம்பந்தப்பட்ட ஆசிரியையை கைது செய்ய வேண்டும்
இவ்வாறு அவர்கள் கூறினர். பின்னர் நாயுடுபுரத்தில் ரோடு மறியல்
செய்தனர்.காலை 9 மணி முதல் மதியம் 1மணிவரை, இந்த போராட்டம் நடந்தது. சம்பவ
இடத்திற்கு சென்ற டி.எஸ்.பி., பாஸ்கரன், பிரேத பரிசோதனை அறிக்கையின்படி,
வழக்குப்பதிவு செய்வதாக உறுதி அளித்ததின் பேரில் கலைந்து சென்றனர்.
பள்ளி நிர்வாகம் கூறியதாவது:
அனைத்து மாணவியரையும் எங்கள்
குழந்தைகளை போலத்தான் பாவிக்கிறோம். இதில் பாரபட்சம் கிடையாது.
சம்பந்தப்பட்ட மாணவி, வகுப்பறையில் பாட புத்தகங்களுடன் சினிமா நடிகர்களின்
படங்களை வைத்துள்ளார்.இதை உதவி தலைமை ஆசிரியை செலின் கண்டித்துள்ளார்.
பின்பு மாணவியை திட்டி, அவரின் புத்தகங்களையும், நோட்டுகளையும் வாங்கிக்
கொண்டு வீட்டிற்கு அனுப்பியுள்ளார். இவ்வளவு தான் நடந்தது. இதை சிலர்
பெரிது படுத்துகின்றனர். மாணவியை யாரும் அடிக்கவில்லை. இவ்வாறு நிர்வாகம்
கூறியுள்ளது.