நக்சலைட்களை துரத்திய கிராம மக்கள் : அட்டூழியம் தாங்க முடியாததால் ஆத்திரம்

மிட்னாபூர் :

மேற்கு வங்கத்தில் நக்சலைட்களின் அட்டூழியத்தை தாங்கிக்
கொள்ள முடியாத கிராம மக்கள், கோபத்தில் வெகுண்டு எழுந்து, அவர்களை
துரத்தியடித்த சம்பவம் நடந்துள்ளது.
மேற்கு வங்கத்தின் மிட்னாபூர், ஜார்கிராம் ஆகிய மாவட்டங்களில்
நக்சலைட்களின் ஆதிக்கம் உள்ளது. இங்குள்ள கிராமங்களில் பழங்குடியினர்
அதிகம் வசிக்கின்றனர். அவர்களை, தங்கள் கட்டுப்பாட்டுக்குள் வைத்துள்ள
நக்சலைட்கள், பல்வேறு அட்டூழியங்களை நிகழ்த்தி வருகின்றனர். பொறுத்துப்,
பொறுத்து பார்த்த இந்த கிராம மக்கள் தற்போது திருப்பித் தாக்கத் துவங்கி
விட்டனர். சமீபத்தில் ராதாநகர் என்ற கிராமத்தை சேர்ந்த மக்கள், அங்கு
முகாமிட்டிருந்த நக்சலைட்களை, கிராமத்தில் இருந்து விரட்டி அடித்து
விட்டனர். இது, அந்த சுற்று வட்டாரத்தில் உள்ள மற்ற கிராம மக்களுக்கு
உற்சாகத்தை ஏற்படுத்தியுள்ளது. மக்லா, பாதர்போரா, கொல்டங்கா, கஜிஜோரா,
சத்பதி ஆகிய கிராமங்களில் வசிக்கும் மக்கள், தாங்களாக ஒன்று சேர்ந்து,
"கிராமத்தை காப்போம்'என்ற தலைப்பில் ஒரு அமைப்பை ஏற்படுத்தியுள்ளனர்.
"இனிமேல் நக்சலைட்களின் அடக்குமுறைக்கு கட்டுப்பட மாட்டோம்'என, உறுதி
எடுத்துள்ள அந்த கிராம மக்கள், பாதுகாப்புப் படையினரின் உதவியோடு,
நக்சலைட்களை விரட்டப் போவதாக தெரிவித்துள்ளனர்.
ராதாநகர் கிராமத்தை சேர்ந்த கீதா பால் என்ற பெண் கூறியதாவது: சில
வாரங்களுக்கு முன் தான், எனக்கு பெண் குழந்தை பிறந்தது. எங்கள்
கிராமத்தில் இருந்த நக்சலைட்கள், தங்களின் பயிற்சியில் பங்கேற்கும்படி
என்னை கட்டாயப்படுத்தினர். என் உடல் நிலை அதற்கு இடம் கொடுக்கவில்லை.
இருந்தாலும், நக்சலைட்கள் என்னை விடவில்லை. என் கையில் இருந்த பச்சிளம்
குழந்தையை பறித்து, கீழே போட்டு விட்டனர். இது எனக்கு மட்டுமல்ல, அங்கு
திரண்டிருந்த கிராம மக்களுக்கும் பெரும் ஆத்திரத்தை ஏற்படுத்தியது. இதற்கு
பின் தான், அனைவரும் ஒன்று சேர்ந்து நக்சலைட்களை எங்கள் கிராமத்தில்
இருந்து அடித்து துரத்தி விட்டோம். எங்களைப் பின்பற்றி மற்ற
கிராமத்தினரும் நக்சலைட்களை துரத்துவதாக தகவல்கள் வருகின்றன. இது
உண்மையிலேயே மகிழ்ச்சியாக உள்ளது. இவ்வாறு கீதா பால் கூறினார்.