லே பேய்மழையில் இறந்ததில் 23 பேர் வெளிநாட்டவர்கள்

by நவீன் Wed Aug 11, 2010 10:13 am

லே :

காஷ்மீரில் பெய்த கனமழைக்கு இதுவரை 23 வெளிநாட்டினர் உட்பட, 166
பேர் பலியாகியுள்ளனர். 400க்கும் மேற்பட்டவர்களின் கதி என்ன ஆனது என
தெரியவில்லை; சேற்றில் சிக்கிய பலர், தங்களது கண்பார்வையை இழந்துவிட்டனர்.
காஷ்மீர், லடாக் பிராந்தியத்தின் லே மாவட்டத்தில் கடந்த வெள்ளிக் கிழமை
இரவு திடீரென மழை கொட்டியது. இதனால் ஏற்பட்ட வெள்ளத்தில், சோக்லும்சர்,
சபு, பியாங், நிம்மூ உட்பட ஐந்து கிராமங்கள் மூழ்கின. இந்நிலையில், இந்த
கனமழையில் பிரான்ஸ், இத்தாலி மற்றும் ஸ்பெயின் நாட்டைச் சேர்ந்த 23 பேர்
பலியானதாக தற்போது தெரியவந்துள்ளது. அவர்களுடன், நேபாளத்தைச் சேர்ந்த 16
பேரும், திபெத்தைச் சேர்ந்த இருவரும் பலியாகியுள்ளனர். பலத்த மழை காரணமாக
பல்வேறு பகுதிகளில் ஏற்பட்ட நிலச்சரிவு போன்ற இடர்பாடுகளில் சிக்கி
காயமடைந்த 49 பாதுகாப்பு படை வீரர்கள் உட்பட 73 பேர், சிகிச்சைக்காக,
லேவிலிருந்து விமானப்படை விமானம் மூலம் உதாம்பூருக்கு அழைத்து
செல்லப்பட்டனர்.
வெளியுறவு அமைச்சக வட்டாரங்கள் கூறுகையில், "விபத்தையொட்டி, சிறப்பு
தகவல் கட்டுப்பாட்டு மையம் அமைக்கப்பட்டுள்ளது. இதில் இறந்தவர்கள் மற்றும்
வெளிநாட்டைச் சேர்ந்தவர்கள், காயமடைந்தவர்களின் விவரங்கள்,
சேகரிக்கப்பட்டு, உரியவர்களுக்கு அளிக்கப்படுகிறது' என்றன. இதற்கிடையே, லே
பகுதியில் சுற்றுலா சென்ற டாக்டர்கள் குழுவினர், மனிதாபிமான அடிப்படையில்
காயமடைந்தவர்களுக்கு சிகிச்சை அளித்து வருகின்றனர். இங்குள்ள ராணுவ
மருத்துவமனை டாக்டர்களுடன் இணைந்து, பாதிக்கப்பட்டவர்களுக்கு சிகிச்சை
அளித்தனர். இதில் பெரிய அளவில் 22 அறுவை சிகிச்சையும், சிறிய அளவில் 42
அறுவை சிகிச்சையும் செய்யப்பட்டன. சேற்றில் சிக்கிய பலர், தங்கள்
கண்பார்வையை இழந்துவிட்டதாக டாக்டர்கள் தெரிவித்துள்ளனர்.
லே பகுதியில் ஏற்பட்ட திடீர் மழையால் பாதிக்கப்பட்டவர்களுக்கு உதவும்
வகையில், அவர்களது நிவாரணம் மற்றும் மறுவாழ்விற்காக, மாநில அமைச்சர்கள்
மற்றும் சட்டசபை உறுப்பினர்கள் தங்களது ஒருமாத சம்பளத்தை நன்கொடையாக வழங்க
வேண்டும் என, முதல்வர் ஒமர் அப்துல்லா வேண்டுகோள் விடுத்துள்ளார்.