எண்ணெய் கசிவு நிறுத்தப்பட்டது : மும்பை துறைமுகம் 15ல் செயல்படும்

மும்பை :

மும்பை அருகே இரண்டு கப்பல்கள் மோதிக் கொண்டதால், ஏற்பட்ட
எண்ணெய் கசிவு தற்போது நிறுத்தப்பட்டுள்ளது. இருப்பினும் மும்பை
துறைமுகத்தில் கப்பல் போக்குவரத்து இன்னும் சீரடையவில்லை. கசிவு நின்ற
தகவலை மாநில முதல்வர் சவானும், மத்திய சுற்றுச்சூழல் அமைச்சர் ஜெய்ராம்
ரமேஷும் உறுதி செய்தனர்.
மும்பை அருகே 10 கி.மீ., தொலைவில், பனாமா நாட்டைச் சேர்ந்த கலீஜியா -
சித்ரா என்ற இரண்டு சரக்கு கப்பல்கள், கடந்த 7ம் தேதி ஒன்றோடு ஒன்று
மோதிக் கொண்டன. இதில், எம்.எஸ்.வி.சித்ரா என்ற கப்பலில் இருந்து எண்ணெய்
கசிந்தது. சேதமடைந்த இந்த கப்பலில் இருந்த இரண்டு பாகிஸ்தானியர் உட்பட 33
ஊழியர்கள் பத்திரமாக மீட்கப்பட்டனர். சரக்கு கப்பலான சித்ரா ஒரு பக்கமாக
சாய்ந்து விட்டதால், அது மூழ்கும் அபாயம் ஏற்பட்டுள்ளது. இந்த கப்பலில்
இருந்த 1,219 சரக்கு பெட்டகங்களில், 300க்கும் அதிகமான கன்டெய்னர்கள்
கடலில் மூழ்கிவிட்டன.
இந்த பெட்டகங்களில் விஷத்தன்மை மிக்க ஆர்கானோ பாஸ்பரஸ், சோடியம் ஹைட்ரோ
குளோரைடு, "பைரிதிராய்டு' என்ற பூச்சிக் கொல்லி மருந்துகள் உள்ளிட்ட
ரசாயனங்கள் இருந்தன. இவற்றினால் கடல் உயிரினங்கள் அழியும் அபாயம்
ஏற்பட்டுள்ளது. இந்த கப்பலில் இருந்து கச்சா எண்ணெய் கசிவது நின்று
விட்டது. இருப்பினும் இரண்டு கிலோ மீட்டர் சுற்றளவுக்கு எண்ணெய் படலம்
மிதந்தது. மேலும், இந்த எண்ணெய் படலம் பரவாதவாறு கடற்படையினரும், கடலோர
காவல் படையினரும் ரசாயனங்களை தெளிக்கும் பணியில் ஈடுபட்டுள்ளனர்.
இதையடுத்து, இந்த பகுதியில் கப்பல் போக்குவரத்து நிறுத்தப்பட்டுள்ளது.
இதனால், மும்பை துறைமுகத்தில் சகஜநிலை பாதிக்கப்பட்டுள்ளது.\
முதல்வர் பேட்டி:

தற்போதுள்ள நிலவரம் குறித்து மகாராஷ்டிர
முதல்வர் சவான் கூறியதாவது: கப்பலில் இருந்து எண்ணெய் கசிவு நின்றது.
மொத்தம் 500 டன் கச்சா எண்ணெய் கசிவு ஏற்பட்டிருக்கும் என்று
மதிப்பிடப்பட்டிருக்கிறது. சித்ரா கப்பலில் இருந்து கசிவு
நிறுத்தப்பட்டது. அதில் உள்ள எஞ்சிய எண்ணெயை அப்புறப்படுத்தும் முயற்சி
நடக்கிறது. மத்திய அரசு உதவியுடன், சுற்றுச்சூழல் பாதிப்பு முழுவதும்
விரைவில் அகற்றப்படும். இவ்வாறு சவான் கூறினார். மத்திய சுற்றுச்சூழல்
அமைச்சர் ஜெய்ராம் ரமேஷ் கூறுகையில், வரும் 15ம் தேதி மும்பைத் துறைமுகம்
வழக்கப்படி முற்றிலும் செயல்படும் என்று நம்பிக்கை தெரிவித்தார்.