ரேஷன் கடை கேட்டு 10 ஆண்டாக போராட்டம்

அன்னூர்:

"தொட்டியனூரில் ஒரு மாதத்தில் ரேஷன் கடை அமைக்கப்படும்' என,
மத்திய அமைச்சர் ராசா அறிவித்து, நான்கு மாதங்களாகியும் ரேஷன் கடை
செயல்படவில்லை. பிள்ளையப்பம்பாளையத்தில், கரியாம்பாளையம் தொடக்க வேளாண்
கூட்டுறவு வங்கி சார்பில் முழு நேர ரேஷன் கடை இயங்கி வருகிறது. இங்கு
வேலாயுதம்பாளையம், தொட்டியனூர், பிள்ளையப்பம்பாளையம் ஆகிய மூன்று
கிராமங்களை சேர்ந்த 650 குடும்பங்கள் ரேஷன் பொருள் வாங்குகின்றன.
தொட்டியனூர் மக்கள் ரேஷன் பொருள் வாங்க ஒவ்வொரு மாதமும் நான்கு முறை
அதிக தூரம் நடக்க வேண்டியுள்ளது.தொட்டியனூர் மக்கள்
கூறியதாவது:தொட்டியனூரில், 200 குடும்பங்கள் உள்ளன. இங்கு பகுதி நேர ரேஷன்
கடை அமைக்க 10 ஆண்டுகளாக கோரி வருகிறோம்.ரேஷன் பொருள் வாங்க 2.5 கி.மீ.,
தூரம் செல்ல வேண்டி உள்ளது. அதுவும் ஒரே நாளில் அனைத்து பொருட்களும்
கிடைப்பதில்லை. அரிசிக்கு ஒரு முறை, மண்ணெண்ணைக்கு, சர்க்கரைக்கு என
ஒவ்வொரு பொருளுக்காகவும் மாதம் நான்கு முறை செல்ல வேண்டி உள்ளது.
தொட்டியனூரிலிருந்து பிள்ளையப்பம்பாளையம் செல்ல பஸ் வசதி இல்லை. ரோடு
மோசமாக உள்ளது.
அண்ணா மறுமலர்ச்சி திட்டப்பணிகள் நிறைவு விழாவுக்கு
பிள்ளையப்பம்பாளையம் வந்த மத்திய அமைச்சர் ராசாவிடம் கூறினோம். அமைச்சர்
பழனிச்சாமி மற்றும் வட்ட வழங்கல் அலுவலர் முன்னிலையில் மத்திய அமைச்சர்
ராசா "ஒரு மாதத்தில் தொட்டியனூரில் ரேஷன் கடை அமைக்கப்படும்' என, மேடையில்
அறிவித்தார். ஆனால்,நான்கு மாதங்களாகியும் ரேஷன் கடை
திறக்கப்படவில்லை.இவ்வாறு அவர்கள் கூறினர்.இது குறித்து ஊராட்சி தலைவர்
ராணி கூறுகையில்,""தொட்டியனூரில் ரேஷன் கடை வைக்க இலவசமாக கட்டடம் ஏற்பாடு
செய்துள்ளோம். கடைக்கு தேவையான டேபிள், சேர், எடை பார்க்கும் இயந்திரமும்
ஏற்பாடு செய்துள்ளோம். கலெக்டர், வழங்கல் அலுவலரிடம் பல முறை
தெரிவித்துள்ளோம். கடை அமைக்க முயற்சி செய்து வருகிறோம்,'' என்றார்.