பாலிடெக்னிக் கல்லூரி மாணவர்கள் முற்றுகையால் பரபரப்பு

புதுக்கோட்டை:


புதுக்கோட்டை அருகே தனியார் பாலிடெக்னிக் கல்லூரி
நிர்வாகத்தை கண்டித்து மாணவர்கள் வகுப்பு புறக்கணித்துவிட்டு கல்லூரியை
முற்றுகையிட்ட சம்பவம் பரபரப்பை ஏற்படுத்தியது.
புதுக்கோட்டை அடுத்த கைக்குறிச்சியில் வெங்கடேஸ்வரா பாலிடெக்னிக்
கல்லூரி உள்ளது. இங்கு புதுக்கோட்டை மட்டுமின்றி பல்வேறு மாவட்டங்களைச்
சேர்ந்த மாணவர்கள் 1,000க்கும் மேற்பட்டோர் படிக்கின்றனர். கல்லூரி
விடுதியில் வழங்கப்படும் உணவு தரமற்றதாக உள்ளதாக கல்லூரி நிர்வாகத்திடம்
புகார் தெரிவித்த முதலாமாண்டு மாணவர் டிட்டோ அரவிந்தை விடுதி காப்பாளர்
மற்றும் ஆசிரியர்கள் தரக்குறைவான வார்த்தையால் கண்டித்துள்ளனர். சக
மாணவர்கள் முன்னிலையில் ஆசிரியர்கள் கண்டித்ததால் அவமானமடைந்த அவர் விஷம்
குடித்து தற்கொலை செய்துகொண்டார். இந்த சம்பவம் சக மாணவர்கள் மத்தியில்
அதிர்ச்சியையும், ஆத்திரத்தையும் ஏற்படுத்தியுள்ளது. மாணவர் டிட்டோ
அரவிந்த் மரணத்துக்கு காரணமான கல்லூரி நிர்வாகம் மற்றும் ஆசிரியர்களை
கண்டித்தும், அவரது குடும்பத்துக்கு நிதி உதவி வழங்க வேண்டும்.
வகுப்பறைக்குள் மாணவர்களை தகாத வார்த்தைகளால் அவமரியாதை செய்வதை
கைவிடவேண்டும்.
விடுதி மாணவர்களுக்கு தரமான உணவு வழங்க வேண்டும், உயர்த்தப்பட்ட விடுதி
கட்டணத்தை குறைக்க வேண்டும், மாணவர்களிடம் அபராதத் தொகை வசூல் செய்வதை
கைவிட வேண்டும் உள்ளிட்ட கோரிக்கைகளை வலியுறுத்தியும் நேற்று வகுப்புகளை
புறக்கணித்தனர். முதல்வர் அறையை மாணவர்கள் முற்றுகையிட்டு கல்லூரி
நிர்வாகத்துக்கு எதிராக கோஷம் எழுப்பினர். இதையடுத்து கல்லூரிக்கு
விடுமுறை அளிக்கப்பட்டுள்ளதாக நிர்வாகம் அறிவிப்பு வெளியிட்டது. முதல்வர்
அறை, நிர்வாக அலுவலக அறை, ஆசிரியர்கள் அறை, வகுப்பறை, விடுதி மற்றும்
கல்லூரி மெயின்கேட் அவசர, அவசரமாக இழுத்து பூட்டப்பட்டது. ஆத்திரமடைந்த
மாணவர்கள் கல்லூரி முன் சாலை மறியல் போராட்டத்தில் ஈடுபட முயன்றனர்.
அனுமதி மறுத்த போலீஸார், தடையை மீறி மறியலில் ஈடுபட்டால் கைது செய்வதாக
எச்சரித்தனர். இதனால் அப்பகுதி பரபரப்புக்கு உள்ளானது. மறியலை கைவிட்ட
மாணவர்கள் கல்லூரி மெயின்கேட் முன் தரையில் அமர்ந்தவாறு ஆசிரியர்களுக்கு
எதிராக கோஷங்கள் எழுப்பினர்.