தி.மு.க.,எம்.எல்.ஏ.,மீது போலீசில் புகார் வழக்கு பதிவு செய்ய அதிகாரிகள் தயக்கம்

திருநெல்வேலி :
தி.மு.க.,எம்.எல்.ஏ.,தாக்கியதாக ஆசிரியர் போலீசில்
புகார் செய்தார். வழக்கு பதிவு செய்ய முடியாமல் அதிகாரிகள் கலக்கத்தில்
உள்ளனர்.திருநெல்வேலி அண்ணா பல்கலையில் கடந்த 7ம்தேதி பட்டமளிப்பு விழா
நடந்தது. துணைமுதல்வர் ஸ்டாலின் பட்டங்களை வழங்கினார். பல்கலையின்
சிண்டிகேட் உறுப்பினரான திருநெல்வேலி தொகுதி
தி.மு.க.,எம்.எல்.ஏ.,மாலைராஜா, விழா முடிந்த பிறகு தமது ஆதரவாளர்களுடன்
துணைவேந்தர் அறைக்கு சென்று வாக்குவாதத்தில் ஈடுபட்டார். அப்போது
துணைவேந்தர் காளியப்பன், உடற்கல்வி ஆசிரியர் தேவதாஸ் ஆகியோர்
தாக்கப்பட்டதாக தகவல் வெளியானது. சம்பவம் குறித்து துணைவேந்தர்
காளியப்பன், பல்கலையின் வேந்தரான கவர்னரிடம் புகார் தெரிவிக்க சென்னை
சென்றுள்ளார். உடற்கல்வி ஆசிரியர் தேவதாஸ் நேற்று நிருபர்களை சந்தித்தார்.

அப்போது அவர் கூறுகையில், பட்டமளிப்பு விழாவிற்கு சிண்டிகேட்
உறுப்பினர் என்ற முறையில் 3 மணிக்கு பல்கலையில் இருந்திருக்கவேண்டும்.
ஆனால் விழா துவங்குவதற்கு 5 நிமிடத்திற்கு முன்புதான் வந்தார். அவரது
கையில் அங்கி வழங்கப்பட்டது. அவர் அணியாமல் தூரவீசிவிட்டு சென்றார். விழா
முடிந்தபிறகு அவரது உதவியாளர் வெங்கடேசன் மேலும் இருவருடன் வந்து எங்களை
தரக்குறைவாக திட்டியதோடு தாக்கவும் செய்தார். அப்போது பல்கலையில் பதிவாளர்
செண்பகவிநாயக மூர்த்தி,மதுரை பல்கலை இளைஞர் நலத்துறை அதிகாரி செல்லத்துரை,
சென்னை அண்ணா பல்கலை அதிகாரி கணேசன், தனியார் இன்ஜினியரிங் கல்லூரி
சேர்மன் சுயம்பு உள்ளிட்டோர் இருந்தனர்.
ஆயுதங்களுடன் வந்தவர் எங்களை திட்டமிட்டே தாக்கினார்கள். எங்களை
குடும்பத்தோடு கொல்லாமல் விடமாட்டோம் என மிரட்டிவிட்டு சென்றனர். எனவே
எனக்கும், துணைவேந்தர் குடும்பத்திற்கும் பாதுகாப்பு வேண்டும்.
எம்.எல்.ஏ.,மாலைராஜா சிண்டிகேட் உறுப்பினராக வந்த பின்னர் பல்கலையில் 4
நபர்களுக்கு வேலை கேட்டு துணைவேந்தர் நியமித்துள்ளார். மேலும் 15 பேருக்கு
வேலை கேட்டார். புதிய பல்கலை என்பதால் தரமுடியவில்லை. இதனால் அவருக்கு
ஆத்திரம். இது ஏற்கனவே திட்டமிட்டு நடத்திய தாக்குதல்
என்றார்.பேட்டியின்போது நெல்லை பல்கலை, உடற்கல்வி ஆசிரியர் சங்க தலைவர்
சண்முகநாதன் உள்ளிட்டோர் இருந்தனர்.
சம்பவம் குறித்து தேவதாஸ் நெல்லை போலீஸ் கமிஷனர் ஏ.கே.சிங்கிடம் புகார்
மனுகொடுத்தார். அவர் சம்பந்தப்பட்ட போலீஸ் ஸ்டேஷனில் கொடுக்கச்சொன்னார்.
பெருமாள்புரம் போலீசில் புகார் கொடுத்தபோது ரசீது மட்டுமே கொடுத்தவர்கள்
மேலிடத்தில் கேட்டுவிட்டு எப்.ஐ.ஆர்.,பதிவு செய்வதாக அனுப்பிவைத்தனர்.
நேற்று இரவு வரையிலும் வழக்குபதிவு செய்யவில்லை.