பாலியல் புகார் - ஹெச்.பி. கணிப்பொறி நிறுவன சி.இ.ஓ பணி நீக்கம்!

உலகின் முன்னணி கணிப்பொறி நிறுவனங்களில் ஒன்றான ஹெ.பியின் சி.இ.ஓ மார்க் ஹர்ட், நடிகையுடனான உறவு புகாரைத் தொடர்ந்து பணியிலிருந்து நீக்கப்பட்டுள்ளார். நடிகையின் மீதான ஈடுபாட்டால், தவறான செலவுகளுக்கு வித்திட்டு நிறுவனத்துக்கு நஷ்டத்தை ஏற்படுத்தியுள்ளதாக நிறுவனம் கூறியுள்ளது.

முன்னாள் அமெரிக்க ஹாலிவுட் நடிகை ஜோடி பிஸர் (Jodie Fisher) கடந்த ஜுன் மாதம், உலகின் முன்னணி நிறுவனமான ஹெச்.பி. நிறுவன சி.இ.ஓ. மார்க் ஹர்ட் மீது நீதிமன்றத்தில் பாலியல் குற்றச்சாட்டு வழக்கு தொடர்ந்தார்.

இந்நடிகை 1990ஆம் ஆண்டு வெற்றிபெற்ற Blood Dolls மற்றும் Sheer Passion போன்ற படங்களிலும் 1997ஆம் ஆண்டு Age of Love என்ற தொலைகாட்சி நாடகத்திலும் நடித்தவர். மேலும் ரியல் எஸ்டேட் தொழிலும் செய்து வந்தார். 2007ஆம் ஆண்டு முதல் 2009ஆம் ஆண்டு வரை ஹெச்.பி. நிறுவனத்தில் ஒப்பந்த அடிப்படையில் உள்நாடு மற்றும் வெளிநாட்டு மேல் மட்ட வாடிக்கையாளர்கள் மற்றும் நிறுவன மேலாளர்களை ஒருங்கிணைக்கும் நிகழ்வுகளில் முக்கிய பொறுப்பாற்றினார். ஒரு மகனுக்குத் தாயான இவர், திருமணம் ஆகாதவர் என்பது குறிப்பிடத்தக்கது.

நடிகை ஜோடி பிஸர் பணிபுரிந்த போது ஹெச்.பி நிறுவன சி.இ.ஓ. அவருக்குப் பாலியல் ரீதியாக தொல்லை தந்ததாகக் கூறிஅவரின் மீது நீதிமன்றத்தில் நடிகை வழக்கு தொடர்ந்தார். இதனைத் தொடர்ந்து, ஹெச்.பி. நிறுவனம் அதன் சி.இ.ஓ மார்க் ஹர்டை பணியில் இருந்து நீக்கியுள்ளது. மார்க் ஹர்ட், நடிகையின் மீது இருந்த பற்றால், தவறான செலவுகளுக்கு வித்திட்டு நிறுவனத்துக்கு நஷ்டம் ஏற்படுத்தியதாக ஹெ.பி ஹர்ட் மீது புகார் கூறியுள்ளது. ஆனால் நடிகை, தனக்கும் மார்க் ஹர்டிற்கும் எவ்வித உறவும் இல்லை என்று தொலைகாட்சி பேட்டியில் கூறியுள்ளார். மேலும் மார்க் ஹர்டை வேலையில் இருந்து நீக்கம் செய்வது தனது நோக்கம் இல்லை என்றும் கூறியுள்ளார்.

இந்நிலையில் ஹெச்.பி. நிறுவன பங்குதாரர்கள் சந்திப்பில் மார்க் ஹர்டிற்கு ஆதரவலைகள் ஏற்பட்டுள்ளது.
நன்றி :இந்நேரம்