மருத்துவரின் அலட்சியத்தால் பெண்ணின் முகம் கோரமான கொடுமை!

ரபீக் · ரபீக் Tue Aug 10, 2010 4:58 pm

தனியார் மருத்துவர் ஒருவரின் அலட்சியமான மருத்துவத்தால் பெண்ணின் முகம் சிதைந்து கோரமான நிகழ்வு சென்னை மக்களிடையே பெரும் அதிர்ச்சியை ஏற்படுத்தியுள்ளது. மருத்துவருக்கு எதிராக நடவடிக்கை எடுக்க வேண்டும் என புகாரும் பதிவு செய்யப்பட்டுள்ளது.

சென்னை, பழவந்தாங்கலைச் சேர்ந்தவர் ராம்நாத். இவர் ஒரு டெய்லர். இவரது மனைவி குணசுந்தரி. 21 வயதே நிரம்பிய இவர் இரண்டு மாத குழந்தைக்குத் தாய். கடந்த மாதம் குணசுந்தரிக்கு இருமல், குளிர்காய்ச்சல் வந்ததைத் தொடர்ந்து, நங்கநல்லூர் பகுதியில் உள்ள ஒரு தனியார் மருத்துவமனைக்குச் சென்று மருத்துவரைச் சந்தித்தார். அந்தத் தனியார் மருத்துவமனையில் பணியிலிருந்த மருத்துவர், இவருக்கு இருந்த அலர்ஜியை அறியாமல் எழுதி தந்த மருந்துகளை உட்கொண்டதால் உடலில் கொப்புளங்கள் தோன்றி, முகம் கோரமாக மாறியது.

இதைத் தொடர்ந்து அவரது கணவர் காவல்துறையிடம் அளித்துள்ள புகாரில் "மருத்துவமனையில் ஐந்து நாட்களுக்கு மருந்து அளிக்கப்பட்டது. அதில் மூன்று நாட்கள் மருந்து சாப்பிட்ட போதே உடலில் கொப்புளங்கள் தோன்றின. நாங்கள் அங்கு கேட்கச் சென்றோம். அவர்கள் குணசுந்தரிக்கு வேறு ஏதோ நோய் வந்திருப்பதாக கூறியதுடன், அட்மிட் செய்யுமாறு கூறினர். ஆனால், நாங்கள் சந்தேகத்தின் பேரில், ராயப்பேட்டை அரசு மருத்துவமனைக்கு அழைத்து சென்றோம். அங்குள்ள மருத்துவர்கள் பரிசோதித்து, இது "அலர்ஜி" என்றும், மருந்து செலுத்தினால் இரண்டு நாட்களில் சரியாகும் என்றும் கூறினர். அங்கும் சரியாகாததால், அரசு பொது மருத்துவமனையில் சேர்த்துள்ளோம்.

இங்கு நிலைமை மோசமானதால் தீவிர சிகிச்சைப் பிரிவில் சேர்க்கப்பட்டுள்ளார். கண்பார்வை மிகவும் மோசமாக பாதிக்கப்பட்டுள்ளது, இரண்டு மாத குழந்தைக்குத் தாய்ப்பால் கொடுக்க முடியாத நிலையில் உள்ளார். தவறான சிகிச்சை அளித்த அந்த மருத்துவமனை மீது நடவடிக்கை எடுக்க வேண்டும்" என்று கேட்டுக் கொண்டுள்ளார்.
நன்றி:இந்நேரம்