ஆளில்லா லெவல் கிராசிங்கில் விபத்து கார் மீது ரயில் மோதி நால்வர் பலி

மாராரிக்குளம்:

ஆளில்லாத ரயில்வே லெவல் கிராசிங்கில் சென்ற கார் மீது,
ரயில் மோதியதால் ஏற்பட்ட விபத்தில் கார் அப்பளம் போல் நொறுங்கியது. இதில்
பயணம் செய்த ஜெர்மனி நாட்டைச் சேர்ந்த இருவர் உட்பட நான்கு பேர்
பலியாயினர். ஜெர்மனி நாட்டில் ஹானோவர் பகுதியைச் சேர்ந்தவர் மான்பிரெட்
ஹெர்பட் குஸ்தாப் ரடோல்ப் மரியா (54). இவரது மனைவி காதரீன் சூசன்னா (47).
இவர்களது வளர்ப்பு குழந்தைகள் ரூபா (6) மற்றும் மாக்லோக் (13) ஆகியோரும்
கேரளா வந்தனர். இத்தம்பதியினர் வளர்ப்பு குழந்தைகளில் ரூபாவை ஒரிசா
தலைநகர் புவனேஸ்வரில் இருந்தும், மாக்லோக் என்ற சிறுமியை வியட்நாம்
நாட்டில் இருந்தும் தத்து எடுத்துள்ளனர். இவர்கள் ஆலப்புழா அருகே
மாராரிக்குளம் பகுதியில் உள்ள பீச் ரிசார்ட்டுக்கு 7ம் தேதி காலை 11.30
மணிக்கு வந்து தங்கினர்.நேற்று முன்தினம் காலை காதரீனுக்கு திடீரென
வயிற்று வலி ஏற்பட்டது. இதை அடுத்து, தத்து குழந்தைகளை ரிசார்ட்டிலேயே
விட்டு, விட்டு சேர்த்தலா பகுதியில் உள்ள தனியார் மருத்துவமனைக்கு காரில்
செல்ல முடிவெடுத்தனர். அத்தம்பதியினருடன், அர்த்துங்கல் போலீஸ் நிலைய
டிரைவராக பணியாற்றி வரும் ஷாஜி என்பவரது மகள் ஷானிமோள் (21) என்பவர்
உதவியாக சென்றார். இவர் பெங்களூரில் தனியார் கல்லூரியில், சுற்றுலா
நிர்வாகத் துறையில் முதுகலை கல்வி முடித்து மேற்கண்ட ரிசார்ட்டில் பயிற்சி
பெற்று வந்தார். அம்மூவரும் காரில் சேர்த்தலா மருத்துவமனைக்கு
புறப்பட்டனர். கார் பூப்பள்ளிக்காவு பகுதியில் உள்ள ஆளில்லா லெவல்
கிராசிங்கை கடக்கும்போது, சென்னை சென்ட்ரலில் இருந்து ஆலப்புழா நோக்கிச்
சென்ற எக்ஸ்பிரஸ், அந்த கார் மீது வேகமாக மோதியது. கார் 50 மீட்டர்
தூரத்திற்கு வீசி எறியப்பட்டது. ரயில் மோதியதால், அப்பளம் போல் நொறுங்கிய
கார் வயல்வெளியில் விழுந்தது. இதை அறிந்த அப்பகுதி பொதுமக்கள் விரைந்து
வந்து மீட்பு பணியில் ஈடுபட்டனர். காரின் பின் பகுதியில், உயிருக்குப்
போராடிக் கொண்டிருந்த காதரீனை காப்பாற்றி மருத்துவமனைக்கு அனுப்பினர்.
அங்கு அவரை பரிசோதித்த டாக்டர்கள் அவர் இறந்து விட்டதாக தெரிவித்தனர்.
விபத்துக்குள் ளான காரை ஓட்டிய டிரைவர் தங்கச்சன் ஆன்டனி (34), மான்பிரெட்
ஹெர்பெட், ஷானிமோள் ஆகியோர் காரிலேயே உடல் நசுங்கி பலியாயினர்.போலீசாரும்,
தீயணைப்பு படையினரும் விரைந்து வந்து காரை வெல்டிங் கருவி கொண்டு,
துண்டித்து உடல்களை வெளியே எடுத்தனர். சீட் பெல்ட் அணிந்து காரை
செலுத்திய டிரைவரது உடல் நீண்ட நேர போராட்டத்திற்கு பின் வெளியே
எடுக்கப்பட்டது. விபத்தில் அவரது தலை பிளந்து காணப்பட்டது. விபத்தை
உண்டாக்கிய ரயில் சிறிது தூரத்தில் நிறுத்தப்பட்டது. இதுகுறித்து, தகவல்
கிடைத்ததும் ரயில்வே இணை அமைச்சர் அகமது, வேணுகோபால் எம்.பி., மாநில
அமைச்சர் ரத்னாகர் உட்பட பலரும் அங்கு விரைந்து சென்று பார்வையிட்டனர்.
மீண்டும் அனாதைகளான குழந்தைகள்: ஜெர்மனி நாட்டு தம்பதியினர்
ஆசையோடு தத்தெடுத்த ஒரிசா மாநில தலைநகர் புவனேஸ்வரம் பகுதியைச் சேர்ந்த
ரூபா (6) மற்றும் வியட்நாம் நாட்டைச் சேர்ந்த மாக்லோக் (13) ஆகியோரை
எப்படி எல்லாம் வளர்க்கவேண்டும் என்று நினைத்திருந்தனரோ தெரியவில்லை.
ஆனால் விதி வலியது என்பதற்கிணங்க, காரில் பயணம் செய்த தம்பதியினரின்
கனவுகளை எமன் வடிவில் வந்த ரயில் சின்னாபின்னமாக்கியது. மேலும்,
தங்களுக்கு ஆசையான பெற்றோர் கிடைத்துள்ளனர் என்ற மகிழ்ச்சியில் இருந்த,
அக்குழந்தைகள்
தங்களது வளர்ப்பு பெற்றோரை பறிகொடுத்த நிலையில், மீண்டும் அனாதைகளாக
கண்ணீருடன் நிற்கின்றனர். விபத்தில் தங்களது வளர்ப்பு பெற்றோர் இறந்து
விட்ட செய்தியை ரிசார்ட் நிர்வாகம் முதலில் தெரிவிக்க தயங்கியது.
இருப்பினும் வேறு வழியின்றி, அக்குழந்தைகளிடம் மெதுவாக நிலைமையை விளக்கிக்
கூறியதும், அவர்களது முகம் வாடி சோகத்துடன் காணப்பட்டது.