வன்முறையை கைவிட்டு பேச வருமாறு நக்சல்களுக்கு அழைப்பு:லால்கர் பேரணியில் மம்தா பங்கேற்பு

லால்கர் :

"நக்சலைட்கள் வன்முறையை உடனடியாக கைவிட வேண்டும்; அரசுடன்
பேச்சு நடத்த முன்வர வேண்டும்' என, திரிணமுல் காங்., தலைவர் மம்தா பானர்ஜி
பேசினார். மேற்கு வங்கத்தில், நக்சலைட்கள் ஆதிக்கம் அதிகம் உள்ள
லால்கரில், "பயங்கரவாதத்துக்கு எதிரான களம்' என்ற தலைப்பில் நேற்று பொதுக்
கூட்டம் நடந்தது. இந்த கூட்டம், நக்சலைட் ஆதரவுடன் நடப்பதாக மேற்கு வங்க
மாநில அரசு ஏற்கனவே குற்றம் சாட்டியிருந்தது. இந்நிலையில், பலத்த
பாதுகாப்பு ஏற்பாடுகளுக்கு இடையே பொதுக் கூட்டம் நேற்று நடந்தது.
இதில், ரயில்வே அமைச்சரும், திரிணமுல் காங்., தலைவருமான மம்தா பானர்ஜி
பேசியதாவது: நக்சலைட்கள் வன்முறையை உடனடியாகக் கைவிட்டு, அமைதி பேச்சு
வார்த்தைக்கு திரும்ப வேண்டும்; கொலை செய்வதையும் தவிர்க்க வேண்டும்.
இதற்கான ஏற்பாடுகளை அவர்கள் இன்றே துவக்க வேண்டும். இந்த விஷயத்தில், மற்ற
மாநிலங்களுக்கு மேற்கு வங்கம் முன் மாதிரியாக திகழட்டும். உங்களுக்கு
என்னிடம் ஏதாவது பிரச்னை இருந்தால், சமூக சேவகர்களான மேதா பட்கர், சுவாமி
அக்னிவேஷ் ஆகியோரை அணுகி, உங்கள் பிரச்னைகளை தெரிவிக்கலாம். இந்த
பகுதியின் வளர்ச்சிக்கு உங்களுக்கு என்ன தேவையோ, அதை நிறைவேற்றுவேன் என
உறுதி அளிக்கிறேன். பள்ளி, சாலை, கல்லூரி, மின்சாரம் என, எந்த தேவையாக
இருந்தாலும் நிறைவேற்றித் தருகிறேன். தேவைப்பட்டால், ரயில் பெட்டி
தயாரிப்பு தொழிற்சாலையை கூட, இங்கு அமைக்க நடவடிக்கை எடுப்பேன். மேற்கு
வங்கத்தில் நீண்ட காலமாக மார்க்சிஸ்ட் கம்யூனிஸ்ட் கட்சியின் ஆட்சி
நடக்கிறது. ஆனால், இன்னும் ஒரு மருத்துவமனையைக் கூட இங்கு அவர்களால்
ஏற்படுத்த முடியவில்லை. எனக்கு துப்பாக்கிகளின் மொழி புரியாது; அமைதியின்
மொழி தான் புரியும். ஜனநாயக நடவடிக்கைகள் மூலம் வெற்றி பெற முடியும் என்ற
நம்பிக்கை உள்ளது. இவ்வாறு மம்தா கூறினார். இதற்கிடையே, கூட்டம் நடந்த
இடத்திற்கு அருகே, போலீசாருக்கு எதிரான மக்கள் நடவடிக்கை குழுவைச் சேர்ந்த
நான்கு பேரை, போலீசார் கைது செய்தனர். லோக்சபாவில் எதிரொலி: மம்தா
பானர்ஜி, லால்கர் பொதுக் கூட்டத்தில் பேசிய சம்பவம், லோக்சபாவில் நேற்று
எதிரொலித்தது.
மார்க்சிஸ்ட் எம்.பி., சம்பத் பேசியதாவது: நக்சலைட் ஆதரவுடன் நடந்த
கூட்டத்தில் மத்திய அமைச்சர் ஒருவர் பங்கேற்றுள்ளார். இதில், தங்களது நிலை
என்ன என்பதை மத்திய அரசு தெரிவிக்க வேண்டும். நக்சலைட்கள், நாட்டின் மிகப்
பெரிய ஆபத்து என பிரதமர் கூறியுள்ளார். ஆனால், நக்சலைட் ஆதரவுடன்
நடக்கும் கூட்டத்தில், மத்திய அமைச்சர் பங்கேற்கிறார். இது ஆச்சர்யமாக
உள்ளது. இவ்வாறு சம்பத் பேசினார். ஆனால், திரிணமுல் காங்கிரஸ் சுதீப்
பந்தோபாத்யாயா பேசுகையில், "அமைதி மற்றும் நல்லிணக்கத்தை ஏற்படுத்த மம்தா
அங்கு சென்றிருக்கிறார்' என்றார்.