லஞ்ச, ஊழல்வாதிகளை காட்டிக் கொடுப்பவர்களுக்கு பாதுகாப்பு

புதுடில்லி :
ஊழலை அம்பலப்படுத்தும் நபர்களை பாதுகாக்கவும், அவர்கள்
காட்டிக் கொடுக்கும் நபர்களுக்கு கடும் தண்டனை வழங்கவும் வகை செய்யும்
சட்டத்தை மத்திய அரசு கொண்டு வர உள்ளது. இதற்கு மத்திய அமைச்சரவை நேற்று
ஒப்புதல் அளித்தது.
மத்திய அமைச்சரவை கூட்டம், பிரதமர் மன்மோகன் சிங் தலைமையில் நேற்று
நடந்தது. இந்தக் கூட்டத்தில் எடுக்கப்பட்ட முடிவுகள் விவரம் வருமாறு:
அரசுத் துறையில் ஊழியர்களின் லஞ்ச விவகாரங்களை வெளிப்படுத்தும்
நபர்களுக்கு பாதுகாப்பு அளிக்கவும், ஊழலை வெளிப்படுத்துவோரை காட்டிக்
கொடுக்கும் நபர்களுக்கு கடும் தண்டனை வழங்கவும், ஊழலை வெளிப்படுத்துவோரை
பழி வாங்க முற்படும் மேலதிகாரி மீது நடவடிக்கை எடுக்கவும் மத்திய அரசு
தீர்மானித்துள்ளது. இதற்காக, மசோதா ஒன்றை தயாரித்துள்ளது. பார்லிமென்டில்
நிறைவேற்றப்பட உள்ள இந்த மசோதாவுக்கு, மத்திய அமைச்சரவை நேற்று ஒப்புதல்
அளித்தது.இந்த மசோதா சட்டமாகி அமலுக்கு வந்தால், மத்திய லஞ்ச ஒழிப்பு
மற்றும் கண்காணிப்பு ஆணையத்திற்கு, சிவில் கோர்ட்டுக்கு உள்ள அதிகாரம்
கிடைக்கும். லஞ்ச லாவண்யத்தை வெளிப்படுத்துவோரை காட்டிக் கொடுக்கும்
நபர்களுக்கு கடும் தண்டனை வழங்க முடியும்.
மத்திய, மாநில மற்றும் பொதுத் துறை நிறுவன ஊழியர்களுக்கு இந்த புதிய
சட்டம் பொருந்தும்.அது மட்டுமல்ல, பொதுத் துறை நிறுவனம், மத்திய, மாநில
அரசு சம்பந்தப்பட்ட அமைப்புகளில் நடக்கும் ஊழலை வெளிக்கொண்டு வருபவர்
தகவல் தந்து, அதே சமயம் அவர் பாதுகாப்பாக இருக்க அந்தந்த பகுதிகளில் தனி
அமைப்புகள் உருவாக்கப்படும். இந்த சட்டம் அமலானால், ஊழலை
வெளிப்படுத்துவோர் எண்ணிக்கை அதிகரிக்கும். இம்மாதிரி செயல்படும் போது
என்ன பாதிப்பு வருமோ என்ற அச்சமும் இருக்காது. அகில இந்திய மருத்துவ
அறிவியல் நிறுவனம் போன்ற ஆறு நிறுவனங்களை நடத்திச் செல்ல சங்கங்கள்
அமைக்கும் திட்டத்திற்கும் மத்திய அமைச்சரவை ஒப்புதல் கொடுத்துள்ளது.
பிரதம மந்திரி சுவஸ்திய சுரக்ஷா யோஜனா திட்டத்தில் அமைக்கப்படும்
நிறுவனங்களை இந்த சங்கங்கள் நடத்தும்.ராணுவ வீட்டு வசதி திட்டத்தை
முடிப்பதற்கான காலக்கெடுவும் டிசம்பர் 31ம் தேதி வரை
நீட்டிக்கப்பட்டுள்ளது. ராணுவம், கடற்படை மற்றும் விமானப் படையில்
பணியாற்றுவோருக்கு 57 ஆயிரத்து 875 வீடுகளைக் கட்ட திட்டமிட்டு, அதற்காக
5,329 கோடி ரூபாய் அனுமதிக்கப்பட்டது.
தற்போது, இந்த வீட்டு வசதி திட்டத்திற்கான செலவு 6,032 கோடி ரூபாயாக
உயர்த்தப்பட்டுள்ளது. இதுதவிர, இரண்டாவது கட்டமாக 3,265 வீடுகளைக்
கட்டவும் அமைச்சரவை ஒப்புதல் அளித்துள்ளது.ராணுவத்தினரின் குழந்தைகளுக்கு
கல்வி போதிக்கத் தேவையான பள்ளிகளை ஜம்மு காஷ்மீரில் சம்பாவிலும்,
பஞ்சாபில் நாபாவிலும், மணிப்பூரில் இம்பாலிலும் கட்ட, கேந்திரிய வித்யாலயா
சங்டனுக்கு ராணுவ நிலத்தை வழங்கவும் மத்திய அரசு ஒப்புதல் அளித்தது.
தொழிலாளர் பயன் பெறும்புதிய ஓய்வூதிய திட்டம் :

அமைப்பு சாரா
தொழிலாளர்களுக்கு ஓய்வூதியம் வழங்குவதற்காக ஆண்டுக்கு ஆயிரம் கோடி ரூபாய்
ஓய்வூதிய நிதி வழங்கவும் மத்திய அமைச்சரவை ஒப்புதல் அளித்துள்ளது. இதன்
மூலம் 30 கோடி மக்கள் மத்தியில் சேமிக்கும் பழக்கம் அதிகரிக்கும். அவர்கள்
ஆண்டுக்கு ஆயிரம் முதல் 12 ஆயிரம் ரூபாய் வரையிலான தொகையை இந்த ஓய்வூதியத்
திட்டத்திற்கு செலுத்த நேரிடும். மீதமுள்ள தேவைக்குத் தான் அரசின் நிதி
பயன்படும். ஆரம்பத்தில் இந்த திட்டத்தின் கீழ் ஆண்டுக்கு 10 லட்சம்
தொழிலாளர்கள் பயனடைவர்; நான்கு ஆண்டுகளில் 40 லட்சம் பேர் பயனடைவர்.இந்த
புதிய ஓய்வூதியத் திட்டம் ஆரம்பத்தில் மத்திய அரசு ஊழியர்களுக்காகத்தான்
செயல்படுத்தப்பட்டது. 2004 ஜனவரி 1ம் தேதி அமலுக்கு வந்தது. ஆனால், கடந்த
ஆண்டு மே 1ம் தேதி முதல் இந்த திட்டம், அனைத்து குடிமக்களுக்கும்
நீட்டிக்கப்பட்டுள்ளது.