தவறான சிகிச்சையால் பெண்ணுக்கு பாதிப்பு தனியார் மருத்துவமனை மீது கணவன் புகார்

சென்னை:

தனியார் மருத்துவமனையின் தவறான சிகிச்சையால் பாதிக்கப்பட்ட
இளம்பெண் குறித்து அவரது கணவர் போலீசில் புகார் அளித்துள்ளார். சென்னை,
பழவந்தாங்கல் 17வது தெருவைச் சேர்ந்தவர் ராம்நாத் (30). டெய்லர். இவரது
மனைவி குணசுந்தரி (21). இவர்களுக்கு இரண்டு மாத குழந்தை உள்ளது. கடந்த
மாத இறுதியில் குணசுந்தரிக்கு இருமல், குளிர்காய்ச்சல் போன்ற பிரச்னைகள்
ஏற்பட்டன. தொடர்ந்து, நங்கநல்லூர் பகுதியில் உள்ள ஒரு தனியார்
மருத்துவமனைக்கு சென்று அங்கு டாக்டர்கள் எழுதித் தந்த மருந்துகளை வாங்கி
சாப்பிட்டார்.
அந்த மருந்தை சாப்பிட்ட குணசுந்தரிக்கு உடலில்
கொப்புளங்கள் தோன்றி, முகம் கோரமாக மாறியது. தற்போது, குணசுந்தரி அரசு
பொது மருத்துவமனையில் தீவிர சிகிச்சைப் பிரிவில் சேர்க்கப்பட்டுள்ளார்.
நேற்று காலை சென்னை போலீஸ் கமிஷனர் அலுவலகத்திற்கு வந்து ராம்நாத் புகார்
அளித்தார். அப்போது அவர் கூறியதாவது:
மருத்துவமனையில் ஐந்து
நாட்களுக்கு மருந்து அளிக்கப்பட்டது. அதில் மூன்று நாட்கள் சாப்பிட்ட போதே
உடலில் கொப்புளங்கள் தோன்றின. நாங்கள் அங்கு கேட்கச் சென்றோம். அவர்கள்
குணசுந்தரிக்கு வேறு ஏதோ நோய் வந்திருப்பதாக கூறியதுடன், அட்மிட்
செய்யுமாறு கூறினர். ஆனால், தவறான சிகிச்சையினால் இப்படி
ஏற்பட்டிருக்கலாமோ என்ற சந்தேகத்தில், ராயப்பேட்டை அரசு மருத்துவமனைக்கு
அழைத்து வந்தோம். அரசு டாக்டர்கள் பரிசோதித்து, "டிரக் அலர்ஜி' என்றும்,
மருந்து செலுத்தினால் இரண்டு நாட்களில் சரியாகும் என்றும் கூறினர்.
அங்கும் சரியாகாததால், அரசு பொது மருத்துவமனையில் சேர்த்துள்ளோம். இங்கு
நிலைமை மோசமானதால் தீவிர சிகிச்சைப் பிரிவில் சேர்க்கப்பட்டுள்ளார்.
கண்பார்வை மிகவும் மோசமாக பாதிக்கப்பட்டுள்ளதுடன், இரண்டு மாத குழந்தைக்கு
தாய்ப்பால் கொடுக்க முடியாத நிலையில் உள்ளார். தவறான சிகிச்சை அளித்த அந்த
மருத்துவமனை மீது நடவடிக்கை எடுக்க வேண்டும். இவ்வாறு ராம்நாத் கூறினார்.