கஷ்மீர் வெள்ளப் பெருக்கில் இந்திய ராணுவ வீரர்கள் 33 பேர் பலி?

லடாக் பகுதியில் ஏற்பட்ட வெள்ளப் பெருக்கில் சிக்கிய இந்திய ராணுவ வீரர்கள் 33 பேர் பாகிஸ்தான் ஆக்கிரமிப்பு காஷ்மீருக்குள் அடித்துச் செல்லப்பட்டிருக்கலாம் என்று அஞ்சப்படுகிறது. அவர்களைத் தேடுவதற்கு பாகிஸ்தானின் உதவி கோரப்பட்டுள்ளது.

காஷ்மீர் லே மாவட்டத்தில் வெள்ளிக்கிழமை இரவு திடீரென கனமழை பெய்ததால் பலபகுதிகளில் வெள்ளம் பெருக்கெடுத்தது. இதனால் வீடுகள், கட்டிடங்கள், அலுவலகங்கள் சேதமடைந்துள்ளன. சாலைகளும் பெயர்த்து எடுக்கப்பட்டு அலங்கோலமாக காட்சி அளிக்கின்றன.

மழை மற்றும் வெள்ளப் பெருக்கு காரணமாக லே மாவட்டத்தில் இதுவரை 160 பேர் பலியாகி இருப்பதாகச் சொல்லப்படுகிறது. அவர்களது உடல்கள் அனைத்தும் மீட்கப்பட்டன. மேலும் 600க்கும் மேற்பட்டோரை காணவில்லை. இவர்கள் நிலச்சரிவில் சிக்கி உயிரோடு புதையுண்டு இறந்திருக்கலாம் என அஞ்சப்படுகிறது.

அன்றைய தினம் லடாக் பகுதியில் சியாச்சின் பனிமலை அருகே எல்லைக் கட்டுப்பாட்டு கோட்டு பகுதியில் பாதுகாப்பு பணியில் ஈடுபட்டிருந்த 33 இந்திய ராணுவ வீரர்கள் ஆற்று வெள்ளத்தில் அடித்துச் செல்லப்பட்டதாகத் தெரிகிறது.

டர்டக் ராணுவ முகாமில் இருந்த வீரர்கள் அனைவரும் கரைபுரண்டு வந்த ஆற்றுவெள்ளத்தில் இழுத்துச் செல்லப்பட்டனர்.அவர்களை இதுவரை கண்டுபிடிக்க முடியவில்லை. வெள்ளத்தில் சிக்கி 3 நாட்களாகியும் அவர்கள் இதுவரை கண்டுபிடிக்கப்படாததால் பாகிஸ்தான் ஆக்கிரமிப்பு காஷ்மீருக்குள் அடித்துச் செல்லப்பட்டிருக்ககூடும் என்று அஞ்சப்படுவதாக மூத்த ராணுவ உயரதிகாரி ஒருவர் கூறியிருக்கிறார்.

மீட்புபணிகளுடன் ராணுவ வீரர்களைத் தேடும் பணியும் நடந்து வருகிறது. அதன் ஒரு பகுதியாக ஆற்றுவெள்ளத்தில் இழுத்துச் செல்லப்பட்ட ராணுவ வீரர்களை தேடுவதற்கு பாகிஸ்தானிடம் உதவி கோரப்பட்டுள்ளது. மூன்று நாட்களுக்கு மேலாகியும் ராணுவ வீரர்களை கண்டுபிடிக்க முடியாததால் அவர்கள் இறந்திருக்கக் கூடுமென அஞ்சப்படுகிறது. எனினும் அது குறித்த அதிகாரபூர்வ தகவல்கள் எதுவும் இல்லை.
நன்றி :இந்நேரம்

ஏற்கனவே காஷ்மீரில் அரசியல், தீவிரவாதம், பிரிவினைவாதம் போன்ற பிரச்சனைகள். இப்போது இறைவனின் சோதனை, நிலச்சரிவினால் ஏகப்பட்ட உயிரிழப்புகள், நாம் நம் சகோதர, சகோதரிகளுக்காக பிரார்த்தனை செய்வோம்.