பாகிஸ்தானுக்கு அமெரிக்காவின் நவீன ஆயுதங்கள்: நிருபமா ராவ்

அமெரிக்கா பாகிஸ்தானுக்கு நவீன ஆயுதங்கள் வழங்கி வருவது குறித்து இந்தியா ஆழ்ந்த கவலை தெரிவித்துள்ளது. இதற்கு முன்னர் அமெரிக்காவிடமிருந்து பெறப்பட்ட நவீன ஆயுதங்களை பாகிஸ்தான் இந்தியாவுக்கு எதிராகவே பயன்படுத்தி வந்துள்ளது என்று இந்திய வெளியுறவுச் செயலர் நிருபமா ராவ் கூறினார்.
தனியார் தொலைக்காட்சிக்கு அளித்த பேட்டியில் அவர் இவ்வாறு கூறியிருந்தார்.

பாகிஸ்தானுக்கு அமெரிக்கா வழங்கி வரும் நவீன ஆயுதங்கள் எப்போதும் இந்தியாவுக்கு எதிராகவே பயன்படுத்தப்பட்டுள்ளதை அமெரிக்காவின் கவனத்துக்கு இந்தியா கொண்டு சென்றுள்ளது.

பயங்கரவாதிகளை ஒடுக்க பாகிஸ்தானுக்கு அளிக்கப்படும் நிதி, ஆயுதங்கள் இந்தியாவுக்கு எதிராகப் பயன்படுத்துவது தொடர்கதையாக உள்ளது என்றார் அவர்.

இந்த விஷயத்தில் இந்தியாவின் கவலையை அமெரிக்கா நன்கு அறிந்தே உள்ளது.

பாகிஸ்தானுக்கு அமெரிக்கா | 7150 கோடி மதிப்பிலான எப். 16 ரக போர் விமானங்களை வழங்கி உள்ளது. அது மட்டுமன்றி பாகிஸ்தானின் விமானப் படையை நவீனப்படுத்த | 2400 கோடியில் உபகரணங்களையும், நவீன தளவாடங்களையும் வழங்கி உள்ளது. மேலும் 20 ஏஎச்- 1எப் கோப்ரா தாக்குதல் ஹெலிகாப்டர்கள், 2 நவீன ஏவுகணை தாக்கு தளங்களும் தரப்பட்டுள்ளன.

இந்த நவீன ஆயுதங்களை பயங்கரவாதிகளுக்கு எதிராக பயன்படுத்துவதாக நாடகமாடிவிட்டு அவற்றை இந்தியாவுக்கு எதிராகப் பயன்படுத்துவது வாடிக்கையாகி விட்டது. இதை நாம் அமெரிக்காவிடம் தொடர்ந்து வலியுறுத்தி வருகிறோம் என்றும் அவர் கூறினார்.

எனவே பாகிஸ்தானுக்கு நவீன ஆயுதங்கள் வழங்கப்படுவதால் ஏற்படும் விளைவுகளை முன்பைவிட அமெரிக்கா தற்போது நன்றாக உணர்ந்துள்ளது.

தலிபான் மற்றும் அல் காய்தா தீவிரவாதிகளை ஒடுக்குவதற்காகவே அமெரிக்கா பாகிஸ்தானுக்கு ஏராளமான அளவில் ஆயுத உதவிகளை செய்து வருகிறது.

இந்தியா- அமெரிக்கா இடையே உறவை மேம்படுத்த வேண்டியது அவசியம்தான். அதேவேளையில் பாகிஸ்தானுக்கும் இந்தியாவுக்கும் இடையே உள்ள பிரச்னைகளுக்குத் தீர்வு காணும் நடவடிக்கைகளில் மூன்றாவது நாடுகள் மூக்கை நுழைக்க அனுமதிக்க முடியாது என்று நிருபமா திட்டவட்டமாகக் கூறினார்.

இந்தியாவும் அமெரிக்காவும் பல்வேறு துறைகளில் ஒருங்கிணைந்து செயலாற்றி வருகின்றன. அமெரிக்காவின் உறவு இந்தியாவுக்கு மிக மிக முக்கியமானதுதான். ஆனால் காஷ்மீர் பிரச்னையில் அமெரிக்கா தலையிட அனுமதிக்க மாட்டோம் என்றும் அவர் கூறினார்.

ஆப்கானிஸ்தானில் உள்ள அமெரிக்கப் படைகள் மீது தாக்குதல் நடத்தி வரும் தலிபான்கள் மற்றும் அல் காய்தா பயங்கரவாத அமைப்புகளை எதிர்த்துப் போராடுவதற்காக பாகிஸ்தானுக்கு அமெரிக்கா ஏராளமான உதவிகளைச் செய்து வருகிறது என்றார்.