ராகுலை கடுமையாக விமர்சித்த திமுக தலைவர்-இளங்கோவன் 'குண்டு'

மத்திய அமைச்சர் மு.க.அழகிரி கலந்து கொண்ட திருச்செந்தூர் நிகழ்ச்சியில் ஒரு மூத்த திமுக தலைவர், ராஜீவ் காந்தி, ராகுல் காந்தியை மிகக் கடுமையாக பேசியுள்ளார். அந்த சிடியை வெளியிட்டால் காங்கிரஸார் கொந்தளித்துப் போவார்கள். இதுகுறித்து முதல்வர் விளக்கம் அளிக்க வேண்டும் என்று கூறியுள்ளார் முன்னாள் மத்திய இணை அமைச்சர் ஈவிகேஎஸ் இளங்கோவன்.

திமுகவுக்கும், இளங்கோவனுக்கும் இடையிலான மோதல் நாளுக்கு நாள் வலுத்து வருகிறது. அவரது சீண்டல், முதல்வர் கருணாநிதியையும் கோப்படுத்தி வருகிறது. இளங்கோவனின் பேச்சு கூட்டணிக்கு வலிமை சேர்க்காது, மாறாக வலியையே சேர்க்கும் என்று முதல்வர் சூடாக கூறியுள்ளார்.

இந்த நிலையில், மீண்டும் திமுகவை சீண்டியுள்ளார் இளங்கோவன். சென்னையில் இன்று நடந்த நிகழ்ச்சியில் கலந்து கொண்ட அவர் செய்தியாளர்களிடம் பேசுகையில்,

கடந்த 31-ம் தேதி திருச்செந்தூரில் மத்திய அமைச்சர் அழகிரி பங்கேற்ற ஒரு நிகழ்ச்சியில் ராஜீவ்காந்தி, ராகுல் காந்தி பற்றி திமுகவின் மூத்த தலைவர் ஒருவர் மரியாதைக் குறைவாகப் பேசியுள்ளார்.

அதன் குறுந்தகடு எனக்கு வந்துள்ளது. அதை வெளியிட்டால் காங்கிரஸ் தொண்டர்கள் கொதித்துப் போவார்கள். என்னுடைய பேச்சுகள் திமுக - காங்கிரஸ் கூட்டணியில் வலியை ஏற்படுத்துவதாகக் கூறியுள்ள கருணாநிதி, திருச்செந்தூர் பேச்சு பற்றி இதுவரை எதுவும் கூறாதது ஏன் என்று தெரிவிக்க வேண்டும்.

ஆட்சியில் நடக்கும் தவறுகளை சுட்டிக்காட்ட வேண்டிய பொறுப்பு எங்களுக்கு இருக்கிறது.

நான்கு ஆண்டுகளாக நாங்கள் பொறுமையாக இருந்தோம். நீங்கள் யார் என்பதை மக்களுக்கு மீண்டும் நினைவுபடுத்த வேண்டிய காலம் வந்துவிட்டது. இதுபோன்ற பிரச்சார கூட்டங்கள் தமிழகம் முழுக்க நடக்கும் என்றார்.

காமராஜருக்கு செய்யத் தெரியாததா...?

அதேபோல இலவசத் திட்டங்கள் குறித்து இளங்கோவன் கருத்து தெரிவிக்கையில், பெருந்தலைவர் காமராஜர் நினைத்திருந்தால் ஆளுக்கு ஒரு இலவச ரேடியோவைக் கொடுத்திருக்கலாம். அப்படிச் செய்திருந்தால் ஆட்சியை நிரந்தரமாக அவர் தக்க வைத்திருக்கலாம். ஆனால் அவர் அப்படிச் செய்யவில்லை. மாறாக மக்களின் முன்னேற்றத்தை மட்டுமே அவர் கருத்தில் கொண்டு செயல்பட்டார் என்றார்.

ராமதாஸின் நல்ல கருத்து

தமிழகத்தில் காங்கிரஸ் தலைமையில் புதிய கூட்டணி அமைய வேண்டும் என பாமக நிறுவனர் டாக்டர் ராமதாஸ் கூறியுள்ளாரே என்று செய்தியாளர்கள் கேட்டதற்கு, டாக்டர் ராமதாஸ் எப்போதாவது இதுபோன்ற நல்ல கருத்துகளைக் கூறுவதுண்டு. தமிழகத்தில் நல்லவர்கள் பலரின் கருத்துகளும் இதுதான் என்றார் இளங்கோவன்.

இளங்கோவன் சற்றும் தொய்வில்லாமல் திமுகவை கடுமையாக வாரி வருவது திமுக வட்டாரத்தில் பெரும் அதிர்ச்சி அலைகளை ஏற்படுத்தியுள்ளது. திமுக கூட்டணிக்கு பாதகம் ஏற்படும் வகையில், விமர்சித்துப் பேசக் கூடாது என்று தமிழ்நாடு மாநில காங்கிரஸ் தலைவர் தங்கபாலு எச்சரிக்கை விடுத்தும் கூட தொடர்ந்து இளங்கோவன் அதேபோல பேசி வருவதால் அவரது பேச்சைக் கன்ட்ரோல் செய்யும் அதிகாரம் தற்போது வேறு 'எங்கோ' இருப்பதாகவும் திமுகவினர் மத்தியில் சந்தேகம் எழுந்துள்ளது.