செல்போனை சார்ஜரில் போட்டு பேசிய வாலிபர் முகம் கருகி சாவு!

ரபீக் · ரபீக் Sun Aug 08, 2010 1:19 pm

செல்போனை சார்ஜரில் போட்டு பேசியவர் முகம் கருகி பரிதாபமாக இறந்தார். சென்னையை அடுத்த கும்மிடிப்பூண்டி அருகே இச்சம்பவம் நடைபெற்றுள்ளது.

கும்மிடிப்பூண்டியை அடுத்துள்ள புதுப்பேட்டை கிராமத்தில் வசித்து வந்தவர் சரித்யபோரா. அசாம் மாநிலம் கோலிகட்டை சேர்ந்தவர். கும்மிடிப்பூண்டி சிப்காட் தொழிற்சாலையில் ஒப்பந்த பணியாளராக பணியாற்றி வந்தார்.

சனிக்கிழமை காலை செல்போனை சார்ஜரில் போட்டிருந்தார். அப்போது செல்போன் ஒலிக்கவே அதை எடுத்து பேசினார். அப்போது செல்போனில் இருந்து வெளியேறிய தீப்பொறி அவரது வலது கன்னம் மற்றும் காதுகளில் பட்டு கருகியது.

மேலும் அவரது உடலில் மின்சாரம் பாய்ந்து மயங்கி விழுந்தார். உடனடியாக அவரை மருத்துவமனைக்கு எடுத்துச் சென்றனர். செல்லும் வழியிலேயே அவர் பரிதாபமாக இறந்தார். அவரது உடல் பிரேத பரிசோதனைக்காக பொன்னேரி அரசு மருத்துவமனையில் அனுமதிக்கப்பட்டது.

இது குறித்து சிப்காட் போலீசார் வழக்குப்பதிவு செய்து விசாரணை நடத்தி வருகின்றனர்.