ஆப்கானிஸ்தானில் 10 வெளிநாட்டு டாக்டர்கள் சுட்டுக்கொலை

ரபீக் · ரபீக் Sun 8 Aug 2010 - 13:22

தலிபான் தீவிரவாதிகளால் பாதிக்கப்பட்டுள்ள ஆப்கானிஸ்தானில் உலக நாடுகள் மருத்துவ உதவி செய்து வருகின்றன. அதற்காக டாக்டர்கள் மற்றும் நர்சுகள், ஊழியர்கள் அடங்கிய குழுவை அனுப்பியுள்ளனர். அங்கு அவர்கள் கண் சிகிச்சை முகாம் மற்றும் பல்வேறு நோய்களுக்கான சிகிச்சைகளை அளித்து வருகின்றனர்.

இந்நிலையில் நேற்று வெளிநாட்டு மருத்துவ குழுவினர் வடக்கு ஆப்கானிஸ்தானில் உள்ள நூரிஸ் தான் மாகாணத்தில் பின் தங்கிய கிராமங்களில் மக்களுக்கு சிகிச்சை அளித்தனர்.

மலை பகுதிகளில் உள்ள மக்களுக்கு சிகிச்சை அளிக்க வாகனங்களில் செல்ல முடியவில்லை. எனவே, குதிரைகளில் ஏறி சென்று கொண்டிருந்தனர். அப்போது அவர்களை நோக்கி தலிபான் தீவிர வாதிகள் சரமாரியாக துப்பாக்கியால் சுட்டனர். இதில் 10 டாக்டர்கள் குண்டு பாய்ந்து அதே இடத்தில் பரிதாபமாக இறந்தனர்.

அவர்களில் 6 பேர் அமெரிக்காவை சேர்ந்தவர்கள். தலா ஒரு டாக்டர் ஜெர்மனி மற்றும் இங்கிலாந்தை சேர்ந்தவர்கள். மேலும் 2 பேர் ஆப்கானிஸ்தான் டாக்டர்கள்.

மருத்துவ உதவி என்ற பெயரில் இவர்கள் அமெரிக் காவுக்கு உளவு வேலை பார்த்ததாகவும், பாமர மக்களிடம் கிறிஸ்தவ மதத்தை பரப்பி வந்ததாகவும் தலிபான் செய்தி தொடர்பாளர் ஷபியுல்லா முஜாகித் குற்றம் சாட்டியுள்ளார். அதனால்தான் அவர்களை சுட்டுக் கொன்றதாகவும் தெரிவித்துள்ளார்.

இதை பன்னாட்டு உதவி மையத்தின் இயக்குனர் டிர்க்பிரான்ஸ் மறுத்துள்ளார். இது ஒரு தன்னார்வ கிறிஸ்தவ தொண்டு நிறுவனமாகும். அரசு சார்பற்ற இந்த நிறுவனம் ஆப்கானிஸ்தான் மக்களுக்கு கடந்த 1966-ம் ஆண்டு முதல் தொண்டாற்றி வருகிறது.

இது போன்ற கொடூர செயல்களால் எங்களின் சேவையை தடுத்து நிறுத்தி விட முடியாது. தொடர்ந்து லட்சக்கணக்கான ஆப்கன் மக்களுக்கு சேவை செய்வோம் என்றார். மேலும், அவர் கூறும் போது, அடுத்ததாக பதக்ஷான் மாகாணத்தில் மருத்துவ சேவை முகாம் நடத்த இருப்பதாக தெரிவித்தார்.

சுட்டு கொல்லப்பட்டவர்களில் டாக்டர் டாம்லிட் டில் நியூயார்க்கில் உள்ள டெல்மார்நகரை சேர்ந்தவர். இவர் மருத்துவ குழுவின் தலைவராக இருந்தார். கண் மருத்துவ நிபுணர் ஆவார்.