விலைவாசி ஏறத்தான் செய்யும், எகிறிய அமைச்சர் பொன்முடி!

எந்த காலத்தில்தான் விலைவாசி ஏறவில்லை; விலைவாசி ஏறத்தான் செய்யும்" என அமைச்சர் பொன்முடி அதிரடியாக பேசி பரபரப்பை ஏற்படுத்தியுள்ளார்.

விழுப்புரம் மாவட்டம் ஒலக்கூர் ஊராட்சியில் இலவச வண்ண தொலைகாட்சி வழங்கும் விழாவில் அவர் பேசும்போது, "தேர்தல் வாக்குறுதியில் கூறியது போல், தொலைகாட்சி இல்லாதவர்கள் மட்டுமல்லாமல், ரேஷன் கார்டு உள்ள அனைவருக்கும் தொலைகாட்சி வழங்கப்படுகிறது. ஜாதி, மதம், கட்சி பார்க்காமல் வழங்குகிறோம். ஒலக்கூர் ஒன்றியத்தில் இன்னும் ஒரே ஒரு ஊராட்சிக்கு மட்டுமே வழங்கப்பட வேண்டும். ஒரு மாதத்தில் விழுப்புரம் மாவட்டத்தில் உள்ள 1,104 ஊராட்சிகளுக்கும் தொலைகாட்சி வழங்கப்பட்டு விடும்.

விலைவாசி ஏறிவிட்டது என்று சிலர் பேசுகின்றனர். விலைவாசி ஏறத்தான் செய்யும். எந்த காலத்தில் விலைவாசி ஏறவில்லை?. விலை ஏறிய அளவிற்கு வருமானம் உயர்ந்துள்ளது. மத்திய அரசின் நூறு நாள் திட்டத்தின் மூலம் தினமும் 70, 80 ரூபாய் கிடைக்கிறது. இந்த வேலைக்கு 80 வயது, 85 வயது கிழவி கூட கடப்பாரையை தூக்கிக் கொண்டு வந்து நிற்கிறார். காமராஜர் காலத்திலிருந்து, கருணாநிதி ஆட்சி வரை அனைத்து ஆட்சியிலும் விலைவாசி உயர்ந்துக் கொண்டு தான் இருக்கிறது. விலைவாசி உயரும் போது, வருமானமும் உயர வேண்டும். அப்போது தான் பொருளாதார நிலை உயரும்.

சிலர் ஜாதி, மதம், கட்சி என பேசுவர். ஆனால், கருணாநிதி தான் மக்களை நினைக்கிறார். முதல்வர் கருணாநிதி என்ன செய்தார் என எந்த கட்சியில் இருப்பவர்களும் கேட்க முடியாது. அவ்வளவு நலத் திட்டங்களை செயல்படுத்தியுள்ளார். நான் சொல்ல வேண்டியதை சொல்லி விட்டேன். நீங்கள் செய்வதைச் செய்யுங்கள். உங்கள் வீட்டிற்கு ஏதாவது நல்லது நடக்க வேண்டுமென்றால் நீங்கள் திமுகவை ஆதரிக்க வேண்டும்" என பொன்முடி குறிப்பிட்டார்