நடிகர் விவேக் ஓபராய் மீது நிகழ்ச்சி நிறுவனம் வழக்கு

புதுடெல்லி :
அமெரிக்காவில் நடைபெற்ற நிகழ்ச்சியில் பங்கேற்பதாக வாக்களித்து அட்வான்ஸ் பெற்ற நடிகர் விவேக் ஓபராய், அந்த நிகழ்ச்சியில் கலந்து கொள்ளாமல் தவிர்த்தார். இதனால் அட்வான்ஸ் பணத்தை 18 சதவீத வட்டியுடன் ரூ.4.02 கோடியாக திருப்பி தரவேண்டும் என்று விவேக் ஓபராய் மீது நிகழ்ச்சிகளை ஒருங்கிணைக்கும் நிறுவனம் ஒன்று வழக்கு தொடர்ந்துள்ளது.நிகழ்ச்சிகளை ஒருங்கிணைத்து நடத்தும் மேத்தா என்டர்டெயின்மென்ட். நிறுவனம் நடிகர் விவேக் ஓபராய் மீது டெல்லி உயர் நீதிமன்றத்தில் தொடர்ந்துள்ள வழக்கில் கூறியுள்ளதாவது:2003ம் ஆண்டு அமெரிக்காவில் சினிமா கலை நிகழ்ச்சி நடத்த எங்கள் நிறுவனம் ஏற்பாடு செய்தது. இதில் பங்கேற்று நிகழ்ச்சியை நடத்துவதற்காக நடிகர் விவேக் ஓபராயுடன் பேச்சுவார்த்தை நடத்தினோம். விவேக் ஓபராயின் தந்தை சுரேஷ் ஓபராய் நடத்தும் யஷி மல்டி மீடியா நிறுவனத்தின் மூலம் விவேக் ஓபராய் எங்கள் நிறுவனத்துடன் ஒப்பந்தம் செய்து கொண்டார். உடன்பாடு ஏற்பட்டதை தொடர்ந்து அவருக்கு 3 லட்சம் அமெரிக்க டாலர்களை அட்வான்சாக கொடுத்தோம்.ஆனால், அவர் நிகழ்ச்சியில் கலந்து கொள்ளவில்லை. உடல்நலம் சரியில்லாத தால் தன்னால் பங்கேற்க முடியவில்லை என்று தெரிவித்தார். இதைத்தொடர்ந்து அட்வான்ஸ் பணத்தை திருப்பி தருமாறு கேட்டோம். ஆனால், தரவில்லை. எங்களிடம் இருந்து வாங்கிய அட்வான்ஸ் பணத்தை 18 சதவீத வட்டியுடன் ரூ.4.02 கோடியாக திருப்பி அளிக்க அவருக்கு நீதிமன்றம் உத்தரவிட வேண்டும். இவ்வாறு வழக்கில் கூறப்பட்டுள்ளது. நீதிபதி எஸ்.ரவீந்திர பாட் முன்னிலையில், இந்த வழக்கு விசாரணைக்கு வந்தது. அதைத்தொடர்ந்து நடிகர் விவேக் ஓபராயிடம் விளக்கம் கேட்டு நோட்டீஸ் அனுப்ப நீதிபதி உத்தரவிட்டார்.