பாவூர்சத்திரம் அருகே இன்று பயங்கரம்: காதலனுடன் ஓட முயன்ற மகளை வெட்டி கொன்ற தந்தை;

பாவூர்சத்திரம் அருகே இன்று பயங்கரம்: காதலனுடன் ஓட முயன்ற மகளை வெட்டி கொன்ற தந்தை; தடுத்த மனைவியை உலக்கையால் அடித்து கொன்றார்


பாவூர்சத்திரம்,

நெல்லை
மாவட்டம் பாவூர்சத்திரம் அருகே உள்ள நாட்டார்பட்டி கிராமத்தைச் சேர்ந்தவர்
வினைதீர்த்தான் (வயது 63) விவசாயி. இவருக்கு செண்பக கனகமணி (53), லீலாவதி
(50) என 2 மனைவிகள். செண்பக கனகமணிக்கு அருணாதேவி (21) என்ற மகளும், லீலாவதிக்கு பொன்னரசி (22) என்ற மகளும், விஜி (20) என்ற மகனும் உள்ளனர்.

அருணாதேவிக்கும்
அதே பகுதியைச் சேர்ந்த மெக்கானிக் தேவராஜன் (25) என்பவருக்கும் காதல்
மலர்ந்தது. இருவரும் கடந்த 2 ஆண்டுகளாக காதலித்து வந்தனர். இதை அறிந்த
வினைதீர்த்தான் அவர்கள் காதலுக்கு எதிர்ப்பு தெரிவித்தார். இனிமேல்
தேவராஜனை சந்திக்க கூடாது என்று மகளை கடுமையாக கண்டித்தார்.ஆனால் மகளின்
காதலுக்கு தாய் செண்பக கனகமணி உறுதுணையாக இருந்துள்ளார். இதனால்
அருணாதேவியின் காதல் தொடர்ந்தது.

இந்த
நிலையில் தந்தை தொடர்ந்து எதிர்ப்பு தெரிவித்து வந்ததால் அருணாதேவி வீட்டை
விட்டு ஓடி காதலனை திருமணம் செய்வது என்று முடிவு செய்தாள். அதன்படி
அருணாதேவி இன்று அதிகாலை 4 மணி அளவில் எழுந்து ஒரு பையில் தனது உடைகளை
எடுத்துக் கொண்டு நைசாக வீட்டை விட்டு வெளியே சென்றாள்.

இதனை
அறிந்த தந்தை எழுந்து வந்து மகளை தடுத்தார். அக்காள் பொன்னரசிக்கு இன்னும்
திருமணம் ஆகாமல் இருக்கும்போது உனக்கு அதற்குள் ஏன் கல்யாண ஆசை? என்று
கண்டித்தார். அப்போது தந்தைக்கும் மகளுக்கும் வாக்குவாதம் ஏற்பட்டது.
இதில் ஆத்திரம் அடைந்த வினைதீர்த்தான் மகளை அடித்தார். அருணாதேவி
எதிர்க்கவே கோபம் கொண்ட வினைதீர்த்தான் அரிவாளால் மகளை சரமாரியாக
வெட்டினார். இதில் அருணாதேவி ரத்த வெள்ளத்தில் துடிதுடித்து இறந்தார்.

மகள்
அலறல் சத்தம் கேட்டு தாயார் செண்பக கனகமணி ஓடி வந்து தடுத்தார். கொலை
வெறியில் இருந்த வினைதீர்த்தான் மனைவி செண்பக கனகமணியையும் சரமாரி
வெட்டினார்.

உயிரை
காப்பாற்ற அவர் அலறியபடி வெளியே ஓடிவந்தார். ஆனால் வினைதீர்த்தான் ஓட ஓட
விரட்டி முற்றத்தில் வைத்து மனைவி செண்பககனகமணியையும் உலக்கையால் அடித்து
கொலை செய்தார்.

இந்த
இரட்டை கொலை சம்பவம் அப்பகுதியில் பெரும் பரபரப்பை ஏற்படுத்தியது.
அப்பகுதி அங்கு மக்கள் திரண்டு வந்தனர். இதற்கிடையே அங்கிருந்து தப்பி
ஓடிய வினைதீர்த்தான் பாவூர்சத்திரம் போலீஸ் நிலையம் சென்று சரண்
அடைந்தார்.

தகவல்
கிடைத்ததும் மாவட்ட போலீஸ் சூப்பிரண்டு அஸ்ராகார்க் உத்தரவின் பேரில் துணை
போலீஸ் சூப்பிரண்டு ஸ்டாலின், இன்ஸ்பெக்டர் சண்முகம் மற்றும் போலீசார்
விரைந்து சென்று விசாரணை நடத்தினர்.

கொலை செய்யப்பட்ட தாய்- மகள் உடல்களை பிரேத பரிசோதனைக்காக தென்காசி அரசு மருத்துவமனைக்கு அனுப்பி வைத்தனர்.

கொலையாளி வினை தீர்த்தான் அக்காள்- தங்கையான இரண்டு பேரையும் காதலித்து திருமணம் செய்தவர் என்பது குறிப்பிடத்தக்கது.