ரூ.200 கோடி முன்வைப்புத்தொகை செலுத்தி நிறுவன துணைத் தலைவர் ஜாமீனில் செல்ல அனுமதி

மதுரை,


ஸ்டெர்லைட் நிறுவனத்தின் சுங்கவரி ஏய்ப்பு தொடர்பாக கைதான, நிறுவனத்தின்
துணைத் தலைவர், திருநெல்வேலி சுங்கத்துறை ஆணையர் அலுவலகத்தில் ரூ. 200
கோடி முன்வைப்புத்தொகை செலுத்திவிட்டு, ஜாமீனில் செல்லுமாறு உயர் நீதிமன்ற
மதுரைக் கிளை வெள்ளிக்கிழமை உத்தரவிட்டது.இதுகுறித்த வழக்கு விவரம்: ஸ்டெர்லைட்
நிறுவனம், தூத்துக்குடி துறைமுகம் வழியாக தாமிரத் தாதுவை இறக்குமதி
செய்து, அதிலிருந்து தாமிரத்தை உற்பத்தி செய்து வெளிநாட்டிற்கு ஏற்றுமதி
செய்ய வேண்டும். ஆனால், அந்நிறுவனம் தாமிரத்தாதுவில் ஒரு பகுதியை
உள்நாட்டில் விற்பனை செய்து, சுங்கவரி கட்டாமல் ரூ. 740 கோடி வரை
ஏமாற்றியதாக திருநெல்வேலி சுங்கத்துறை ஆணையகம் நடவடிக்கை மேற்கொண்டது. இதுதொடர்பாக
ஸ்டெர்லைட் நிறுவன ஏற்றுமதி- இறக்குமதி நிர்வாக துணைத் தலைவர் வரதராஜன்
கைதுசெய்யப்பட்டார். அவருக்கு ஜாமீன் வழங்கக் கோரி, உயர் நீதிமன்ற மதுரைக்
கிளையில் தாக்கலான மனு நீதிபதி ஆர். மாலா முன்னிலையில் விசாரணைக்கு வந்தது. அப்போது,
மத்திய கலால் மற்றும் சுங்கத்துறை வழக்கறிஞர் எஸ். அருள்வடிவேல் சேகர்
ஜாமீன் மனுவை ஆட்சேபித்துத் தாக்கல்செய்த பதில் மனுவில், ஸ்டெர்லைட்
நிறுவனம் வெளிநாட்டில் இருந்து தாமிரத்தாது இறக்குமதி செய்வதற்கு 183 முன்
அனுமதிகள் வழங்கப்பட்டன. அதில் 175 அனுமதிகளின் பேரில் 91,94,498 டன்
தாதுப்பொருளை 2005 பிப்ரவரி முதல் 2010 வரை இறக்குமதி செய்தது. இதிலிருந்து
வரும் தாமிர உற்பத்தியில் 53 சதம் வெளிநாட்டிற்கு ஏற்றுமதி செய்ய
வேண்டும். ஆனால், அதை உள்நாட்டில் பல இடங்களில் விற்பனை செய்து, சுங்கவரி
செலுத்தாமல் ரூ. 740 கோடி அளவுக்கு முறைகேடாக ஏமாற்றி உள்ளனர். ரூ. 363
கோடி அளவுக்கு வரி கணக்கில் வரவில்லை என்பதை ஒப்புக்கொண்டுள்ளனர். அதை
முன்பணமாகச் செலுத்த வேண்டும் எனக் குறிப்பிட்டிருந்தார். மனுதாரர்
தரப்பில் வாதிடுகையில், சுங்கத்துறை, எங்கள் நிறுவனத்துக்கு ரூ.283
கோடிவரை திரும்பத் தரவேண்டி உள்ளது. எனவே, மேலும், ரூ. 80 கோடியை
வேண்டுமானால் முன்வைப்புத் தொகையாகச் செலுத்துகிறோம் எனத் தெரிவித்தனர்.
இருதரப்பு வாதங்களையும் கேட்ட நீதிபதி, ரூ.200 கோடியை திருநெல்வேலி மத்திய
சுங்கவரித் துறை ஆணையர் அலுவலகத்தில் டெபாசிட் செய்துவிட்டு, நிறுவனத்
துணைத் தலைவர் சம்பந்தப்பட்ட நீதிமன்றத்தில் ஜாமீன் பெற்றுக்கொள்ளவும்,
சுங்கத் துறையினர் விசாரணைக்கு நிறுவனம் முழு ஒத்துழைப்பு அளிக்க வேண்டும்
எனவும் உத்தரவிட்டார்.