புதிய அணை கட்டுவதில் கேரளம் தீவிரம்: பரிசோதனைக்காக மண் சேகரிப்பு

கம்பம்,

பெரியாறு அணைக்குப் பதில் புதிய அணை கட்டுவது தொடர்பாக கேரள அரசின்
சார்பில் அதிகாரிகள் அணைப் பகுதியில் இரு நாளாக பரிசோதனைக்காக மண்
சேகரிக்கும் பணியில் ஈடுபட்டு வருகின்றனர். பெரியாறு அணைக்குப்
பதிலாக புதிய அணை கட்டுவதற்கு, முன்னாள் முதன்மைப் பொறியாளர் என்.சசி
தலைமையில் ஒரு குழுவினர், மத்திய நீர்வளத் துறையின் சந்தேகங்களுக்கு
விளக்கம் அளிக்கும் விதத்தில் கடந்த ஒரு வாரமாக பெரியாறு அணைப் பகுதியில்
ஆய்வு மேற்கொண்டு வருகின்றனர். இந்த நிலையில், மேலும் ஒரு
குழுவினர் நீர்ப்பாசனத் துறை செயற்பொறியாளர் ஜார்ஜ் டேனியல் தலைமையில்
பெரியாறு அணையின் தெற்குப் பகுதியில் புதிய அணை கட்டுவதற்காக கேரள அரசு
முடிவெடுத்துள்ள இடத்தில், மண் உறுதித் தன்மைய கண்டறியும் பணியில் கடந்த
வியாழன், வெள்ளி ஆகிய 2 நாளாக அதிகாரிகள் ஈடுபட்டு வருகின்றனர். இதற்காக
பல்வேறு இடங்களில் மண் தோண்டி எடுத்துள்ளனர். இந்த மண்னை திருவனந்தபுரம் அரசு பொறியியல் கல்லூரி கட்டடவியல்துறையினர்
ஆய்வு மேற்கொள்ள இருப்பதாக கேரள அதிகாரிகள் தெரிவித்தனர். தொடர்ந்து
புதிய அணைக்கான ஆக்கப்பூர்வமான பணிகளில் கேரள அரசு முறைப்படி ஈடுபட்டு
வருவதாகவும் அதிகாரிகள் தெரிவித்தனர். ஓய்வு பெற்ற நீதிபதி
ஆனந்த் தலைமையிலான குழு அணை குறித்து முதல் கட்டமாக கலந்து
ஆலோசித்துள்ளது. மேலும், சில வாரங்களில் இந்தக் குழுவினர் அணைப் பகுதியை
ஆய்வு செய்ய உள்ளதாகத் தெரிகிறது. இந்த நிலையிலும், கேரள அரசு
புதிய அணை கட்டுவதற்கான பணிகளில் தொடர்ந்து தீவிரமாக ஈடுபட்டு வருவதாலும்,
தமிழக அரசு இதுபற்றி கருத்து எதுவும் தெரிவிக்காமல் அமைதியாக இருப்பதாலும்
கம்பம் பள்ளத்தாக்கு பகுதி விவசாயிகள் கவலை அடைந்துள்ளனர்.