திமுக ஆட்சியில் செய்ய முடியாதது எதுவும் கிடையாது: ஸ்டாலின்

திருநெல்வேலி,

திமுக ஆட்சியில் செய்ய முடியாதது என எதுவும் கிடையாது என்று, துணை முதல்வர் மு.க.ஸ்டாலின் கூறினார். திருநெல்வேலி
மாவட்டம், அம்பாசமுத்திரத்தில் வெள்ளிக்கிழமை சட்டப்பேரவைத் தலைவர் இரா.
ஆவுடையப்பன் தலைமையில் நடைபெற்ற அரசு விழாவில், வண்ணார்பேட்டை புதிய
மேம்பாலம், மணிமுத்தாறு, விக்கிரமசிங்கபுரம் குடிநீர் திட்டங்கள் உள்பட
ரூ. 47.89 கோடி மதிப்புள்ள 354 திட்டப் பணிகளை திறந்துவைத்தும்,
பாளையங்கோட்டை குலவணிகர்புரம் ரயில்வே மேம்பாலம், வட்டாட்சியர் அலுவலகம்
உள்பட சுமார் ரூ. 55.50 கோடி மதிப்புள்ள 40 திட்டப் பணிகளுக்கு அடிக்கல்
நாட்டியும், 2,000 மகளிர் சுய உதவிக் குழுக்கள் உள்பட 34,087 பேருக்கு ரூ.
19.98 கோடி மதிப்பிலான நலத் திட்ட உதவிகளையும் வழங்கி துணை முதல்வர்
பேசியதாவது: தமிழ்நாட்டில் உள்ள ஒரு லட்சத்து 49 ஆயிரத்து 984
மகளிர் சுய உதவிக் குழுக்களுக்கு கடந்த நான்கரை ஆண்டுகளில் சுமார் 90 மணி
நேரம் நின்று கொண்டே சுழல் நிதிகளை வழங்கியுள்ளேன். மகளிர் சுய
உதவிக் குழுவினர் ஒரு சாதாரண அமைப்பினர் அல்ல. பெண்கள் தன்மானத்தோடும்,
சுயமரியாதையோடும், சொந்தக்காலிலும் நிற்க வேண்டும் என்பதற்காக 1989-ல்
முதல்வர் கருணாநிதியால் மகளிர் சுய உதவிக் குழு தொடங்கப்பட்டது. இன்று
அவர்கள் தமிழ்நாட்டில் ஒரு மாபெரும் அமைப்பாக வளர்ந்துள்ளனர். மகளிர்
குழுவினருககு அளிக்கப்படும் சுழல்நிதிகளை அவர்கள் முறையாக பயன்படுத்திக்
கொள்ள வேண்டும்.தனிக் கால்வாய்: வடக்கு பச்சையாறு அணையில் இருந்து
நான்குனேரி பகுதியில் உள்ள 46 குளங்களுக்கு தனிக்கால்வாய் திட்டத்தை
நிறைவேற்ற வேண்டும் என வசந்தகுமார் எம்.எல்.ஏ. கேட்டுக் கொண்டார். நான்
உடனே மாவட்ட ஆட்சியரையும், சென்னையில் உள்ள பொதுப் பணித் துறை
அதிகாரிகளையும் தொடர்பு கொண்டு கேட்டேன். அந்த திட்டத்திற்கான
ஆய்வுப் பணிகள் முடிக்கப்பட்டு, அனுமதியும் அளிக்கப்பட்டுள்ளதாக
தெரிவித்தனர். எனவே, அந்த தனிக்கால்வாய் திட்டப் பணிகள் விரைவில்
தொடங்கும். இந்த ஆட்சியில் செய்ய முடியாதது என எதுவும் கிடையாது. மக்களுக்கான திட்டங்களை, மக்களுக்கு நன்மை அளிக்கும் திட்டங்களை செயல்படுத்தும் இந்த ஆட்சி தொடர எல்லாரும் துணையாக இருக்க வேண்டும். திருநெல்வேலி
வண்ணார்பேட்டை புதிய மேம்பாலத்துக்கு முன்னாள் சட்டப்பேரவைத் தலைவர்
செல்லப்பாண்டியன் பெயர் சூட்டப்பட்டுள்ளது. இந்த மேம்பாலத்துக்கு அடிக்கல்
நாட்டப்பட்ட போதே செல்லப்பாண்டியன் பெயர் சூட்டப்பட்டது பெருமைக்குரிய
விஷயமாகும். கடந்த நான்கரை ஆண்டுகளில் நான் சுற்றுப்பயணம்
மேற்கொண்டுள்ள மாவட்டங்களில் அதிக முறை வந்துள்ள மாவட்டங்களில்
திருநெல்வேலியும் ஒன்று. இங்கேதான் திமுக இளைஞரணி மாநாட்டையும்
நடத்தினோம். தற்போது துணை முதல்வராக வந்துள்ள நான் அடுத்த முறை
பெரிய பொறுப்புகளை (முதல்வர்) பெற்று இங்கே வர வேண்டும் என சட்டப்பேரவைத்
தலைவர் பேசினார். நான் பல்வேறு பொறுப்புகளில் இருந்தபோது இங்கே
வந்துள்ளேன். எந்த பொறுப்பில் இருந்து கொண்டு வந்தாலும் உங்களில் ஒருவனாக
இருந்து எனது கடமையை நிறைவேற்றுவதிலேயே நான் மகிழ்ச்சி அடைகிறேன் என்றார்
ஸ்டாலின். விழாவில், நெடுஞ்சாலைத் துறை அமைச்சர் வெள்ளக்கோவில்
மு.பெ. சாமிநாதன், சுற்றுச்சூழல் துறை அமைச்சர் டி.பி.எம். மைதீன்கான்,
தகவல் தொழில்நுட்பத் துறை அமைச்சர் பூங்கோதை ஆலடி அருணா, எஸ்.எஸ்.
ராமசுப்பு எம்.பி., சட்டப்பேரவை உறுப்பினர்கள் வீ. கருப்பசாமி பாண்டியன்,
எச்.வசந்தகுமார், பா. வேல்துரை, துணை மேயர் கா. முத்துராமலிங்கம் ஆகியோர்
பேசினர். விழாவில், குடிசை மாற்றுவாரிய துறை அமைச்சர்
சுப.தங்கவேலன்,பிற்படுத்தப்பட்டோர் நலத் துறை அமைச்சர் கே.கே.எஸ்.எஸ்.ஆர்.
ராமச்சந்திரன், சட்டப்பேரவை உறுப்பினர்கள் என். மாலைராஜா, அனிதா ஆர்.
ராதாகிருஷ்ணன், மாவட்ட ஊராட்சித் தலைவர் ம. கிரஹாம்பெல் உள்ளிட்டோர்
கலந்து கொண்டனர். மகளிர் சுய உதவிக் குழுவினருக்கு கடனுதவிகளை
வழங்குவதில் சிறப்பாக செயல்பட்ட வங்கியாளர்களுக்கு துணை முதல்வர்
சுழற்கேடயங்களையும், சால்வைகளையும் அளித்து பாராட்டினார். மாவட்ட ஆட்சியர் மு. ஜெயராமன் வரவேற்றார். மாவட்ட மகளிர் திட்ட அலுவலர் ஜி. முத்துமீனாள் நன்றி கூறினார்.