ரூ. 100 கோடியில் 10 ஆயிரம் இளைஞர்களுக்கு சுய வேலைவாய்ப்பு: பொங்கலூர் நா. பழனிச்சாமி

தூத்துக்குடி,

தமிழகத்தில் 10 ஆயிரம் வேலையில்லா இளைஞர்களுக்கு சுய வேலைவாய்ப்பு
அளிக்கும் வகையில் வேலைவாய்ப்பு உருவாக்கும் புதிய திட்டம் வெள்ளிக்கிழமை
(ஆக. 6) முதல் அமலுக்கு வருவதாக ஊரக தொழில்துறை அமைச்சர் பொங்கலூர் நா.
பழனிச்சாமி தூத்துக்குடியில் அறிவித்தார். தூத்துக்குடி மாவட்ட சிறு தொழில் சங்கம் சார்பில் 3 நாள்கள் தொழில் கண்காட்சியைத் தொடங்கி வைத்து அவர் மேலும் கூறியதாவது:
கடந்த ஏப்ரல் மாதம் நடைபெற்ற பட்ஜெட் கூட்டத் தொடரில் 2010-2011-ம்
ஆண்டிற்கான குறு, சிறு மற்றும் நடுத்தர தொழில்துறையின் மானியக்
கோரிக்கையின் போது 13 புதிய அறிவிப்புகள் வெளியிடப்பட்டன. இந்த 13
அறிவிப்புகளில் முக்கிய அறிவிப்பான வேலைவாய்ப்பு உருவாக்கும்
திட்டத்திற்கான அரசாணை ஜூலை 30-ம் தேதி வெளியிடப்பட்டது. இந்த
திட்டத்தின் கீழ் ரூ.100 கோடி மதிப்பீட்டில் 10 ஆயிரம் வேலையில்லா
இளைஞர்களுக்கு சுய வேலைவாய்ப்பு உருவாக்கப்படும். இந்த திட்டத்தில்
பயன்பெற வயதுவரம்பு எதுவும் கிடையாது. 18 வயதுக்கு மேல் உள்ள யாரும்
பயன்பெறலாம். ஆண்டு குடும்ப வருமானம் ரூ. 1.50 லட்சத்திற்கு மிகாமல்
இருக்க வேண்டும். கல்வித் தகுதி தேவையில்லை. இந்த திட்டத்தின் கீழ்
உற்பத்தி நிறுவனங்கள் தொடங்க அதிகபட்சமாக ரூ. 5 லட்சம் வரையும், சேவை
நிறுவனங்கள் தொடங்க ரூ. 3 லட்சம் வரையும், வியாபார நிறுவனங்களுக்கு ரூ. 1
லட்சம் வரையும் கடனுதவி வழங்கப்படும். சொந்த மூலதனம்
தாழ்த்தப்பட்ட, பழங்குடியின, பிற்படுத்தப்பட்ட மற்றும் மிகவும்
பிற்படுத்தப்பட்ட, மகளிர், மாற்றுத் திறனாளிகள் மற்றும் முன்னாள் ராணுவ
வீரர்களுக்கு 5 சதவிகிதம் இருக்க வேண்டும். மற்றவர்களுக்கு 10 சதவிகிதம்
இருக்க வேண்டும். இந்த புதிய திட்டம் வெள்ளிக்கிழமை முதல் தமிழகத்தில்
அமலுக்கு வருவதாக இங்கே அறிவிக்கிறேன். இதற்கான விண்ணப்பங்கள் மாவட்ட
தொழில் மையங்களில் கிடைக்கும் என்றார் அமைச்சர்.