தமிழ்நாடு காகித ஆலையில் ரூ. 4 கோடியில் ஓசோன் வாயு மூலம் கழிவு நீரைச் சுத்திகரிக்கும் திட்டம் தொடக்கம்

கரூர்,

தமிழ்நாடு செய்தித்தாள் காகித ஆலையில் ரூ. 4 கோடியில் ஓசோன் வாயு மூலம்
கழிவு நீரைச் சுத்திகரிக்கும் திட்டப் பணியின் தொடக்க விழா வெள்ளிக்கிழமை
நடைபெற்றது. விழாவிற்கு ஆலையின் மேலாண்மை இயக்குநர் டி.ஆர். ராமச்சந்திரன் தலைமை வகித்துப் பேசியது:
இந்தக் காகித சுற்றுச்சூழலுக்கு உகந்த தொழில்நுட்பங்களைப்
பயன்படுத்துவதேயே தனது நோக்ககாகக் கொண்டுள்ளது. உலகளவில் காகித கூழ்,
காகிதம் தயாரிக்கும் நிறுவனங்களால் சுற்றுச்சூழலுக்கு உகந்த வெளுக்கும்
செயல் முறையாக ஏற்றுக் கொள்ளப்பட்ட மூலகக் குளோரின் வாயு அற்ற வெளுக்கும்
முறையை, இந்த ஆலை கடந்த 2008-ல் நிறுவி திறம்படச் செயல்படுத்தி வருகிறது.
இதன் மூலம் ஆலையின் தண்ணீர் தேவையும், சுத்திகரிக்கப்பட்ட கழிவு நீரின்
வெளியேற்றமும் 50 சதம் குறைக்கப்பட்டுள்ளன. ஆலையில் இருந்து வெளியேறும்
சுத்திகரிக்கப்பட்ட கழிவு நீரீன் நிறத்தைக் கட்டுப்படுத்துவதற்காக,
ஆலையின் ஆராய்ச்சி, மேம்பாட்டு துறை மேற்கொண்ட ஆய்வில் ஓசோன் வாயு மூலம்
கழிவு நீரின் நிறத்தை நீக்கும் அமைப்பு நிறுவப்பட்டது. இதன்மூலம்
கழிவு நீரின் நிறமானது வெகுவாகக் குறையும் என எதிர்பார்க்கப்படுகிறது.
கழிவு நீர் சுத்திகரிப்பு செயல் முறையில் மூன்றாம் கட்ட சுத்திகரிப்பு
நிலையாக ஓசோன் வாயுவைப் பயன்படுத்தும் இந்த முறையை, இந்தியாவில் உள்ள
அனைத்து காகிதக் கூழ், காகிதம் தயாரிக்கும் நிறுவனங்களிடையே முதல் முறையாக
இந்த ஆலை நிறுவியுள்ளது. இதற்காக நாளொன்றுக்கு சுமார் ரூ. 20 ஆயிரம் வரை
நிர்வாகம் செலவு செய்யவுள்ளது. ஓசோன் வாயு மூலம்
சுத்திகரிக்கப்பட்ட கழிவு நீரை விவசாயத்திற்குப் பன்படுத்துவதால் கரிம
தாதுப் பொருள்கள், ஊட்டப் பொருள்களாக மாறி, மண்ணின் வளத்தை மேம்படுத்தும்.
தாவரங்களில் ஆரோக்கியமான வேர் அமைப்பை உருவாக்கி, அதிக மகசூல் கிடைக்கவும்
வழிவகுக்கும் என்றார் அவர். விழாவில், ஆலையின் ஆராய்ச்சி,
அபிவிருத்தி திட்டத் தலைவர் சுப்பிரமணியம், துணை மேலாண்மை இயக்குநர் ஆ.
வெள்ளியங்கிரி, பொது மேலாளர் ரா. மணி, காகித ஆலை பாதுகாப்பு,
விழிப்புணர்வு காவல் துறைத் தலைவர் ஐ. ராஜா, மனிதவள மேம்பாட்டுத் துறை
உதவிப் பொது மேலாளர் பா. பட்டாபிராமன், பொது மேலாளர் பிரான்சஸ் டிவோட்டா,
கரூர் கோட்டாட்சியர் அசோக்குமார், வட்டாட்சியர் தர்மராஜ் உள்ளிட்டோர்
கலந்து கொண்டனர்.