நாணயவியல் கண்காட்சி தொடக்கம்

தஞ்சாவூர்,

தஞ்சாவூர் அரண்மனை சங்கீத மகால் வளாகத்தில், தஞ்சை சோழ மண்டல நாணயவியல்
கழகம் சார்பில் நாணயவியல் கண்காட்சி வெள்ளிக்கிழமை தொடங்கியது.
மாவட்ட ஆட்சியர் எம்.எஸ். சண்முகம், கண்காட்சியைத் தொடக்கிவைத்து
நாணயவியல் அறிஞர் ஆறுமுக சீதாராமன், சென்னை நாணயவியல் கழகச் செயலர்
சங்கரன்ராமன் ஆகியோருக்கு செப்புப் பட்டயங்கள் வழங்கினார். விழா
மலரை கி. அய்யாறு வாண்டையார் வெளியிட, அதை தஞ்சாவூர் பொதுப் பணித் துறை
முதுநிலைக் கோட்ட கணக்கு அலுவலர் மு. ராசேந்திரன் பெற்றுக் கொண்டார்.
வருகிற 8-ம் தேதி வரை 3 நாள்கள் நடைபெறும் இந்தக் கண்காட்சியில் சோழர்கால
உண்டியல்கள், பிற்காலச் சோழ நாணயங்கள், சங்க கால சேரர் காசுகள், விஜய நகர
நாணயங்கள், பிரிட்டிஸ்- இந்திய நாணயங்கள், பல்லவ மன்னர் முதலாம்
மகேந்திரவர்மனின் பகா பிடுகு தமிழ்க் காசுகள், சங்க கால மன்னர் காரியின்
தமிழ்க் காசுகள், பாண்டிய மன்னரின் தமிழ்க் காசுகள், ஹைதர்அலி,
திப்புசுல்தான் காசுகள், ஆற்காடு நவாப் காசுகள் ஆகியன காட்சிக்கு
வைக்கப்பட்டுள்ளன. மேலும், கண்ட பேருண்டா பறவை காசுகள், பிற்கால
சேரர், சோழர், பாண்டியர் கால காசுகள், தமிழ் எழுத்துக் காசுகள், கடவுள்
பெயரிலான காசுகள், நாயக்க மன்னர்கள் வெளியிட்ட காசுகள், குறுநில மன்னர்கள்
கோனேரிராயன், வானதிராயரின் காசுகள், பிரெஞ்ச் வெளியிட்ட தமிழ்க் காசுகள்,
நறுமன தபால் தலைகள், பழங்கால ரூபாய் நோட்டுகள் ஆகியவையும் இடம் பெற்றுள்ளன. தவிர, அரியலூர் மாவட்டத்தில் கண்டெடுக்கப்பட்ட கல்லாக மாறிய உயிரினங்கள், மரங்கள், நத்தை, ஆமை, மீன் ஆகியவையும் வைக்கப்பட்டுள்ளன.
2-ஆம் நாளான சனிக்கிழமை (ஆக. 7) மாவட்ட அளவிலான பள்ளி மாணவர்களுக்கான
நாணயவியல் கல்வி விநாடி- வினாப் போட்டியும், நிறைவு நாளான சனிக்கிழமை (ஆக.
8) போட்டியில் வென்றோருக்கு பரிசளிப்பு விழாவும் நடைபெறுகிறது.
சோழ மண்டல நாணயவியல் கழக துணைச் செயலர் வெ. சுவாமிநாதன், செயலர் எச்.ஏ.
நசீர், மேக்ஸ்வெல் மேல்நிலைப் பள்ளி முதல்வர் துரை. வரதராஜன், வை.
ராமமூர்த்தி உள்ளிட்டோர் இதில் கலந்து கொண்டனர்.