மத்திய அரசின் கல்வித் திட்டங்களை பயன்படுத்திக் கொள்ள வேண்டும்: ஜி.கே. வாசன்

சென்னை,
கல்வி வளர்ச்சிக்காக ஐக்கிய முற்போக்கு கூட்டணி அரசு அறிமுகம் செய்து
வரும் பல்வேறு திட்டங்களை மாணவர்கள் பயன்படுத்தி, நாட்டை பெருமை கொள்ளச்
செய்ய வேண்டும் என மத்திய கப்பல் துறை அமைச்சர் ஜி.கே. வாசன் கூறினார்.சென்னையில்
உள்ள ஹிந்துஸ்தான் பல்கலைக்கழகத்தின் வெள்ளி விழா வெள்ளிக்கிழமை
கொண்டாடப்பட்டது. இதில் பங்கேற்று பல்கலைக்கழகத்தில் புதிதாக
அமைக்கப்பட்டுள்ள ஆராய்ச்சி மையம் மற்றும் மத்திய டிஜிட்டல் நூலகத்தை
தொடங்கி வைத்த அமைச்சர் வாசன் பேசியது:மைக்ரோ சாஃப்ட் போன்ற பெரிய
வெளிநாட்டு நிறுவனங்கள், இந்தியர்களை பணியமர்த்துவதற்கே முன்னுரிமை
அளிக்கின்றன. இதற்கு இந்தியர்களின் கடின உழைப்பும், நேர்மையும்தான்
காரணம். பிரிட்டன், அமெரிக்கா, கனடா, ஐக்கிய அரபு நாடுகள் உள்ளிட்ட
பல்வேறு நாடுகளில் 40 லட்சம் இந்தியர்கள் இப்போது பணியாற்றி வருகின்றனர்.
இவர்களைப் போல் முன்னறே கடின உழைப்பு மாணவர்களுக்கு அவசியம். இந்தியாவின்
வளர்ச்சியைக் கருத்தில் கொண்டு, கல்விக்காக பல்வேறு திட்டங்களை ஐக்கிய
முற்போக்கு கூட்டணி அரசு அறிமுகம் செய்து வருகிறது. மத்திய அரசு
கொண்டுவந்துள்ள குழந்தைகளுக்கான இலவச கல்வி உரிமை சட்டம் - 2009-ன் மூலம்,
6 முதல் 14 வயது வரையுடைய 92 லட்சம் குழந்தைகள் பயனடைந்துள்ளனர்.கல்வி
வளர்ச்சிக்காக 2010-11-ம் ஆண்டில் 45 ஆயிரத்து 711 கோடி ரூபாய் நிதியை
மத்திய அரசு ஒதுக்கியுள்ளது. இது கடந்த ஆண்டைக் காட்டிலும் 25 சதவீதம்
கூடுதலாகும்.உயர் கல்வி வளர்ச்சிக்காக ரூ.11 ஆயிரம் கோடி
ஒதுக்கப்பட்டுள்ளது. இது கடந்த ஆண்டைக் காட்டிலும் 12 சதவீதம் கூடுதல்
நிதியாகும். இதுமட்டும் அல்லாமல் வட்டத்துக்கு ஒரு உயர் தரம் கொண்ட
மாடர்ன் பள்ளி என்ற திட்டத்தின் மூலம், நாடு முழுவதும் 6 ஆயிரம் பள்ளிகள்
அமைக்கப்பட்டு வருகின்றன. 11-வது ஐந்தாண்டு திட்டத்தின் மூலம்
நாடு முழுவதும் 16 மத்திய பல்கலைக்கழகங்கள், 7 புதிய இந்திய மேலாண்மை
நிறுவனங்கள் (ஐஐஎம்), 10 புதிய தேசிய தொழில்நுட்ப நிறுவனங்கள் (என்ஐடி)
ஆகியவை அமைக்கப்பட்டுள்ளன.குடும்ப ஆண்டு வருமானம் ரூ. 4.5
லட்சத்துக்கு குறைவாக இருக்கும் ஏழை மாணவர்களுக்கு வட்டியில்லா கல்விக்
கடன் திட்டத்தை மத்திய அரசு அறிமுகம் செய்துள்ளது. இதுபோல் நாட்டின்
வளர்ச்சிக்காக மத்திய அரசு அறிமுகம் செய்துள்ள பல்வேறு திட்டங்களை
மாணவர்கள் பயன்படுத்தி, நாட்டை பெருமை கொள்ள வைக்க வேண்டும் என்றார்.விழாவில் கேரள நாடாளுமன்ற உறுப்பினர் குரியன், ஹிந்துஸ்தான் பல்கலைக்கழக வேந்தர் எலிஸபெத் வர்கீஸ் உள்ளிட்ட பலர் பேசினர்.