கவுதமின் துடுக்குப் பேச்சு 'கிராஸ் செக்' பண்ணிய அஜீத்!

நம்பிக்கையின் கடைசி இழையையும் அறுத்து தொங்கவிட்டிருக்கிறார்கள் அஜீத்தின் ரசிகர்கள். விரல் சொடுக்குவதை தவிர வேறொன்றும் தெரியாது என்று கணிக்கப்பட்ட சிம்புவுக்கே வேறொரு பரிணாமம் கொடுத்தவர் கவுதம் மேனன். இவரது இயக்கத்தில் அஜீத் நடித்தால் எப்படியிருக்கும் என்ற கற்பனைக்கு மெகா சைஸ் முக்காடு போட்டிருக்கிறார்கள் தல ரசிகர்கள். இதற்கு காரணம் கவுதமின் வாய் துடுக்கு என்பது ஒருபக்கம்! என்றாலும், லாபம் யாருக்கு என்பதல்லவா இந்த இடத்தில் கவனத்தில் கொள்ளப்பட வேண்டும்?

முன்னணி ஆங்கில நாளிதழ் ஒன்றுக்கு பேட்டியளித்த கவுதம், கமல் அல்லது சூர்யாவுக்காக வேண்டுமானால் காத்திருக்கலாம். அஜீத்திற்காக காத்திருக்க முடியாது என்று கூறியதுடன், தோளுக்கு மேல் தலையிருப்பவர்களுடன் மட்டுமே என்னால் வேலை பார்க்க முடியும் என்று கூறியிருந்தார். இதையடுத்து அஜீத் பேன்ஸ்.காம் என்ற இணையதளத்தில் கவுதமை பிரித்து மேய்ந்திருக்கிறார்கள் அவரது ரசிகர்கள். கவுதமுக்கு கற்பனை வறட்சி. ஆங்கில பட டிவிடி களை பார்த்துதான் காப்பியடிக்கிறார் என்ற ரீதியில் போகிறது அந்த விமர்சனங்கள்.

கவுதமின் பேட்டியை படித்துவிட்டு "அவர் அவ்வாறு சொன்னாரா?' என்று உறுதிப்படுத்திக் கொண்டார்களாம் அஜீத்திற்கு மிக நெருக்கமானவர்கள். ஆமாம் என்று கூறப்பட்டதும், சற்று நேரம் மவுனம் காத்த அஜீத் ஒரு நீண்ட பெருமூச்சு விட்டதுடன் அமைதியாக இருந்துவிட்டார் என்கிறது அங்கிருந்து வரும் தகவல்கள்.

நிலைமை இப்படியிருக்க நு£ல் அளவு விரிசலை பெருமளவு தகர்த்தது ரசிகர்களே என்ற விமர்சனமும் எழுந்துள்ளது. இவ்வளவுக்கு பிறகு இனிமேல் இருவரும் இணைந்து பணியாற்றப் போவதில்லை என்பது கிட்டதட்ட உறுதியாகிவிட்டது. அப்படியென்றால் அந்த இடத்திற்கு வரப்போகும் இயக்குனர் யார்? அதுதான் அடுத்த விவாதத்தை துவங்கி வைத்திருக்கிறது மீடியாக்களிடம்!