சிவகாசி அருகே தகராறை தடுத்த முதியவர் கொலை; வாலிபரை போலீஸ் தேடுகிறது

சிவகாசி,

விருதுநகர்
மாவட்டம் சிவகாசி அருகே உள்ள திருத்தங்கல் பாண்டியன் நகரை சேர்ந்தவர்
மருதையா மகன் சுரேஷ் (வயது32). இவர் சிவகாசியை அடுத்த பள்ளப்பட்டி
ரோட்டில் காலண்டர் தயாரிப்பு நிறு வனம் நடத்தி வருகிறார்.

புத்தாண்டு
பிறக்க இன்னும் சில மாதங்களே உள்ளதால் தற்போது காலண்டர் தயாரிக்கும் பணி
தீவிரம் அடைந்து உள்ளது. இதற்காக அவரது நிறுவனத்தில் ஏராளமான தொழிலாளர்கள்
இரவு- பகலாக வேலை பார்த்து வருகின்றனர்.

இந்த
நிலையில் பள்ளப்பட்டியை சேர்ந்த கோட்டைச் சாமி (32) என்பவர் வேலைக்கு
வருவதாக கூறி முன்பணமாக ரூ.25 ஆயிரத்தை சுரேசிடம் இருந்து பெற்றுக்
கொண்டார். ஆனால் 2 நாட்கள் மட்டுமே கோட்டைச்சாமி வேலைக்கு வந்தார்.

இதையடுத்து
கோட்டைச்சாமியை சந்தித்த சுரேஷ் வேலைக்கு வருமாறு கூறி யுள்ளார். அவர்
மறுப்பு தெரிவித்ததால் தான் முன்பணமாக கொடுத்த ரூ.25 ஆயிரத்தை திருப்பி
தருமாறு கேட்டுள்ளார். அதற்கு கால அவகாசம் வேண்டும் என்று கூறிய
கோட்டைச்சாமி சுரேசை அனுப்பிவிட்டார்.

நேற்று
இரவு கோட்டைச்சாமி குடித்து விட்டு சுரேசின் வீட்டிற்கு சென்றார்.
வேலைக்கு வருவதற்காக கொடுத்த முன் பணம் ரூ.25 ஆயிரத்தை தன்னால் திருப்பி
தர முடியாது என்று சுரேசிடம் கூறினார். இதனால் அவர்களுக்குள் தகராறு
ஏற்பட்டது. இதைப்பார்த்த சுரேசின் தந்தை மருதையாவும், பெரியப்பா
பெரியசாமியும் (70) தகராறை தடுத்தனர்.

அப்போது
ஆத்திர மடைந்த கோட்டைச்சாமி பெரியசாமியை உருட்டுக் கட்டையால் சரமாரியாக
தாக்கினார். இதில் தலையில் பலத்த காயம் அடைந்த பெரியசாமி ரத்தம் சொட்ட
சொட்ட உயிருக்கு ஆபத்தான நிலையில் மதுரை அரசு ஆஸ்பத்திரிக்கு கொண்டு
செல்லப்பட்டார். அங்கு அவர் சிகிச்சை பலனின்றி இறந்தார்.

இது
தொடர்பாக திருத்தங்கல் போலீசார் கொலை வழக்குப்பதிவு செய்து தலைமறைவான
கோட்டைச்சாமியை வலைவீசி தேடி வருகின்றனர். இந்த சம்பவம் திருத்தங்கல்
பகுதியில் பரபரப்பை ஏற்படுத்தி உள்ளது.