போலி மதிப்பெண் விவகாரம்: கைதானவரை மிரட்டிய மர்ம மனிதர்கள் யார்? ஜெயலலிதா கேள்வி

சென்னை,


அ.தி.மு.க. பொதுச்செயலாளர் ஜெயலலிதா விடுத்துள்ள அறிக்கையில் கூறி இருப்பதாவது:-

கடந்த
மார்ச் மாதம் ஆசிரியர் தேர்வு வாரியத்தால் வெளியிடப்பட்ட பட்டதாரி
ஆசிரியர் தேர்வுப்பட்டியலில் இடம் பெற்றுள்ள பலர், ஜூலை 14-ஆம் தேதி
வெளியிடப்பட்ட பட்டதாரி ஆசிரியர் தேர்வுப் பட்டியலிலும் இடம்
பெற்றுள்ளனர். பொதுவாக ஒருமுறை
ஒருவர் ஆசிரியர் பணிக்கு தேர்வு செய்யப்பட்டுவிட்டால், அவருடைய பெயரை
எப்படி மறுபடியும் வேலை வாய்ப்பு அலுவலகம் ஆசிரியர் தேர்வு வாரியத்திற்கு
பரிந்துரை செய்ய முடியும்? ஒருவரை எப்படி இருமுறை தேர்வு செய்ய முடியும்?
ஒருவருக்கு எப்படி இரண்டு வேலை அளிக்க முடியும்?

முதுநிலை
ஆசிரியர் தேர்வுப்பட்டியலிலும் மிகப்பெரிய குளறுபடி நடந்துள்ளது. வேலை
வாய்ப்பு அலுவலகத்தின் பரிந்துரைப் பட்டியலில் இடம் பெறாத பலர் முதுகலை
ஆசிரியர் தேர்வுப்பட்டியலில் இடம் பெற்றுள்ளதாகவும், வேலை வாய்ப்பு
அலுவலகம் மற்றும் ஆசிரியர் தேர்வு வாரியத்தால் வெளியிடப்பட்டுள்ள
பட்டியலில் பதிவு மூப்பு தேதி மாறுபட்டு இருப்பதாகவும்
பாதிக்கப்பட்டவர்கள் தெரிவிக்கின்றனர்.

கடந்த
ஆண்டு நவம்பர் மாதம் 283 தமிழாசிரியர் பணியிடங்களுக்காக ஒரு இடத்திற்கு
ஐந்து பேர் என்ற வீதத்தில், 1,415 பேர் சான்றிதழ் சரிபார்ப்புக்கு
அழைக்கப்பட்டிருந்தனர். ஆனால், 256 பேர் தான் தேர்வு செய்யப்பட்டனர்.
மீதமுள்ள 27 பணியிடங்களுக்கு யார் நியமிக்கப்பட்டார்கள் என்ற விவரம்
தெரியவில்லை.

இதே
போன்று, கடந்த மே மாதம் 206 தமிழாசிரியர் பணியிடங்களுக்காக 1,030 பேர்
சான்றிதழ் சரிபார்ப்புக்கு அழைக்கப்பட்டிருந்தனர். ஆனால் 196 பேர் மட்டுமே
தேர்வு செய்யப்பட்டனர். மீதமுள்ள பத்து பணியிடங்களில் யார்
நியமிக்கப்பட்டார்கள் என்ற விவரம் தெரியவில்லை. இதுபோன்ற கேள்விகள்
எல்லாம் பாதிக்கப்பட்ட ஆசிரியர்களால் ஏற்கனவே எழுப்பப்பட்டு விட்டன.
பத்திரிகைகளிலும் வெளி வந்திருக்கிறது.

இது
மட்டுமல்லாமல், போலிகளின் வரிசையில், போலி மதிப்பெண் சான்றிதழ் வேறு
சேர்ந்துவிட்டது. போலி மதிப்பெண் சான்றிதழ் கொடுத்து மருத்துவம் மற்றும்
பொறியியல் கல்லூரிகளில் மாணவர்கள் சேர்ந்தது கண்டுபிடிக்கப்பட்டு, இதன்
விளைவாக கல்வித் துறை ஊழியர் ஒருவர் கைது செய் யப்பட்டு இருக்கிறார்.

இவரை
பார்வையாளர்கள் என்ற போர்வையில் சில மர்ம நபர்கள் சந்தித்து உண்மையைச்
சொல்லக் கூடாது என மிரட்டியுள்ளதாக பத்திரிகைகளில் செய்திகள் வந்துள்ளன.
இந்த மர்ம நபர்கள் யார் என்ற விவரத்தை காவல் துறையினர் இதுவரை
கண்டுபிடிக்கவில்லை.

இந்த ஊழலில் தொடர்பு டையவர்கள் பிடிபடும் நாள் வெகு தூரத்தில் இல்லை என்பதை மட்டும் இந்தத் தருணத்தில் தெரிவித்துக் கொள்கிறேன்.

இவ்வாறு ஜெயலலிதா கூறி உள்ளார்.