ஜெயலலிதா எஸ்டேட்டில் சோதனையா? கொடநாட்டில் போலீஸ் குவிப்பு- பெரும் பரபரப்பு

ஊட்டி,

நீலகிரி
மாவட்டம் கோத்தகிரி அருகே உள்ள கொடநாட்டில் அ.தி.மு.க. பொதுச் செயலாளர்
ஜெயலலிதாவுக்கு சொந்தமான எஸ்டேட் உள்ளது. இங்கு விதி முறைகளை மீறி தேயிலை
தொழிற்சாலை கட்டப்படுவதாக புகார் எழுந்தது. புகார் குறித்து விசாரிக்க ஊரக வளர்ச்சித்துறை இயக்குனர் உதயசந்திரனை விசாரணை அதிகாரியாக தமிழக அரசு நியமித்தது.

கடந்த
மாவட்டம் ஊட்டி வந்த அவர் வருவாய்த்துறை அதிகாரிகள், ஊராட்சி அதிகாரிகள்,
காவல் துறை அதிகாரிகளிடம் விசாரணை நடத்தினார். எந்த நேரத்திலும் அவர்
கொடநாடு எஸ்டேட்டுக்கு சென்று ஆய்வு நடத்துவார் என்ற பரபரப்பு அப்போது
நிலவியது. ஆனால் அவர் ஆய்வு நடத்த வில்லை.

இந்த
நிலையில் குன்னூர் ஆர்.டி.ஓ. ராஜூ தலைமையிலான அதிகாரிகள் குழு இன்று
கொடநாடு எஸ்டேட்டில் சோதனை நடத்த உள்ளதாக தகவல் பரவியது. இதனை
உறுதிப்படுத்தும் வகையில் கொடநாட்டில் 500-க்கும் மேற்பட்ட போலீசார்
குவிக்கப்பட்டுள்ளனர். மேலும் ஊட்டி, குன்னூர், கோத்தகிரி பகுதிகளிலும்
போலீசார் பாதுகாப்புக்காக நிறுத்தப்பட்டுள்ளனர்.

கோத்தகிரியில்
இருந்து கொடநாட்டுக்கு செல்லும் அரசு போக்குவரத்து கழக பஸ்கள்
நிறுத்தப்பட்டன. கொடநாட்டுக்கு செல்லும் வாகனங்கள் தீவிர சோதனைக்கு
பின்னரே போலீசார் அனுமதித்து வருகின்றனர்.

கொடநாட்டில்
சோதனை நடைபெற உள்ளது என்ற தகவல் அறிந்ததும் நீலகிரி மாவட்ட
அ.தி.மு.க.வினர் மத்தியில் பரபரப்பு நிலவியது. அவர்கள் கும்பலாக கொடநாடு
செல்ல முயன்றனர். கோத்தகிரியில் பாதுகாப்புக்காக நிறுத்தப்பட்டுள்ள
போலீசார் அவர்களை அங்கு செல்ல அனுமதிக்க வில்லை.

போலீஸ்
ஏ.டி.எஸ்.பி.க்கள் விவேகானந்தம், காசி விஸ்வநாதன் மற்றும் 7
டி.எஸ்.பி.க்கள் தலைமையிலான போலீசார் மக்கள் நடமாட்டம் அதிகம் உள்ள
பகுதிகளில் ரோந்து வந்து கொண்டிருக்கிறார்கள். கொடநாட்டில் போலீஸ்
குவிக்கப்பட்டுள்ளதையொட்டி பதட்டமான சூழ்நிலை நிலவுகிறது.