நெல்லை மாவட்டத்தில் ரூ.4.20 கோடியில் விளையாட்டுத்துறை மேம்பாட்டுப் பணிகள்: ஸ்டாலின் இன்று தொடங்கி வைக்கிறார்

திருநெல்வேலி,

திருநெல்வேலி மாவட்டத்தில் ரூ.4.20 கோடியில் நடைபெறவுள்ள விளையாட்டுத்
துறை மேம்பாட்டுப் பணிகளை, தமிழக துணை முதல்வர் மு.க.ஸ்டாலின்
வெள்ளிக்கிழமை (ஆக.6) நடைபெறும் விழாவில் தொடங்கி வைக்கிறார். தமிழ்நாடு
விளையாட்டு மேம்பாட்டு ஆணையம் மற்றும் தமிழ்நாடு மாநில எய்ட்ஸ்
கட்டுப்பாட்டுச் சங்கம் ஆகியவை இணைந்து பாளையங்கோட்டை அண்ணா
விளையாட்டரங்கில் திருநெல்வேலி மாவட்ட அளவில் கல்லூரிகளுக்கு இடையேயான
விளையாட்டுப் போட்டிகளை புதன்,வியாழக்கிழமைகளில் நடத்தியது. இப் போட்டிகளில் 32 கல்லூரிகளைச் சேர்ந்த 1,975 மாணவ மாணவிகள் கலந்து கொண்டனர்.
புதன்கிழமை மாணவ மாணவிகளுக்கான வாலிபால், கபடி, கூடைபந்து, கால்பந்து,
ஹாக்கி போட்டிகள் நடைபெற்றன. வியாழக்கிழமை தடகளப் போட்டிகள் நடைபெற்றன.
போட்டியின் இறுதியில் வியாழக்கிழமை பரிசளிப்பு விழா நடைபெற்றது. இதற்கு
திருநெல்வேலி மாவட்ட ஆட்சியர் மு. ஜெயராமன் தலைமை வகித்து போட்டிகளில்
வெற்றி பெற்றவர்களுக்கு பரிசுகளை வழங்கினார். விழாவில் அவர் பேசியது; இன்றைய
சூழ்நிலையில் எய்ட்ஸ் குறித்த விழிப்புணர்வு இளைஞர்களிடம் கண்டிப்பாக
இருக்க வேண்டும். அப்போதுதான் எய்ட்ஸ் பரவுவதை தடுக்க முடியும். தமிழகம்
எய்ட்ஸ் இல்லாத மாநிலமாக உருவாக அனைவரும் பாடுபட வேண்டும். திருநெல்வேலி
மாவட்டத்தில் விளையாட்டுத் துறையின் சார்பில் ரூ.4.20 கோடியில் பல்வேறு
பணிகள் நடைபெறவுள்ளன. குறிப்பாக இந்த விளையாட்டு அரங்கில் ரூ.3 கோடியில்
செயற்கை இழை ஓடுதளம், ரூ.10 லட்சத்தில் செயற்கை இழை கால்பந்து மைதானம்,
மேலப்பாளையத்தில் ரூ.30 லட்சத்தில் மினி விளையாட்டு அரங்கம்,
சங்கரன்கோவிலில் ரூ.10 லட்சத்தில் மினி விளையாட்டு அரங்கம் உள்ளிட்ட
பல்வேறு பணிகள் நடைபெற உள்ளன. இப் பணிகளை தமிழக துணை முதல்வர்
மு.க.ஸ்டாலின் அம்பாசமுத்திரத்தில் வெள்ளிக்கிழமை நடைபெறும் விழாவில்
தொடங்கி வைக்கிறார். மேலும் ரூ.70 லட்சத்தில் இங்கு கட்டப்பட்டுள்ள்
விளையாட்டு வீரர்கள் விடுதியைத் திறந்துவைக்கிறார் என்றார் ஜெயராமன்
போட்டிகளில் மாவட்ட அளவில் முதலிடம் பெற்ற மாணவ, மாணவிகள் மாநில அளவிலான
போட்டியில் கலந்து கொள்ள அரசு சார்பில் அழைத்துச் செல்லப்படுகின்றனர். முன்னதாக மாவட்ட விளையாட்டு அலுவலர் க. சேவியர் ஜோதி சற்குணம் வரவேற்றார். நிகழ்ச்சியில் திரளானோர் கலந்து கொண்டனர்.